Read Thado Chin 2 Samuel 22 Bible Online

2 Samuel 22 - Thado Chin bible

2 Samuel 22

¹Chule Pakaiyin amelmate jouse khut le Saul khutna kona ahuhdoh nikhon, David'in Pakai koma hiche lachengho hi aseijin ahi.

²Chuin aman, Pakai hi kasongpi le kakulpi, chule eihuhhingpu ahi;

³Kasongpi Pathen ahin; keiman ama katahsan ding ahi: Ama kalum le kasochatna ki, ka-insang le kahoidohna, kahuhhingpu ahin; nangman pumhatna konin neihuhdoh tai.

⁴Keiman pachat dinga lomtah Pakai chu kakou ding: hiti achu kamelmaho-a kona huhdoh-a kaumding ahi.

⁵Thina twi kinongin eium kimvel teng, Pathen heloute twisoh-in eikichatsah-e;

⁶Thikholkhul lungkham nan eium kimvelin, thina thanghon eikimaitopi-e.

⁷Kagenthei tengle Pakai kakouvin, ka Pathen henga kapengin, Chule aman a-houin'a konin ka aw ahinjan, kapena chun anakhang sunga alutnin ahi.

⁸Hichun leiset akilingin akihotnin; van kibulphuna ho akihotnin, akilinge, ajehchu ama lunghanga ahi.

⁹Chuin anah homa konin meikhu ahungdoh-in, chule akama kona meikong chun aval lhumin; hiche chun meihol ho chu ahal kong tan ahi.

¹⁰Aman van ho jong aloi nemin, chule ahung kumlhan; muthim chu akengto noija umin ahi.

¹¹Chule ama Cherub chunga atouvin, alengin; chule amachu hui lhavingho chunga akimun ahi.

¹²Aman akimvela muthim lhangkhal akihehsah-in, twi thimjeju le van'a meilom satah ho chu.

¹³Ama masang vah-a kon chun mei-am ho ahung aldoh-in ahi.

¹⁴Pakaiyin vangin bangin a-aw ahin sodoh-in; chungnung pen chun thu ahin seijin ahi.

¹⁵Chule aman thalpi ho akapdoh-in, chule athe jal-in; kol aphet sah-in, amaho chu ajoutan ahi.

¹⁶Pakai phosalna le anahhoma ahu alhadoh-a konin; Twikhanglen toho chu akilangdoh-in, vannoi kibulphu naho jong akimudoh-in ahi.

¹⁷Aman chunga konin ahinsolin, keima eiladoh-in; twi tamtah lah-a konin aman eikaidoh-in ahi.

¹⁸Ka melma hattah ho-a konle eithetboltea konin eihuhdoh-in; ajehchu amaho keima dingin ahat behseh-un ahi.

¹⁹Kahamsetna nikhon amahon eikimaitopi-un; ahinla Pakai chu kapanmun ahijinge.

²⁰Aman munlen tah-a jong eipuilutnin, kachunga akipa jeh-in eihuhdoh tai.

²¹Pakaiyin kachon phatna dungjuijin kipaman eipen, kakhut teni thenna dungjuijin aman eilethuh-in ahi.

²²Ajehchu keiman Pakai lampiho kajuijin, chule ka-Pathen'a konin giloutah-in kapot pon ahi.

²³Ajehchu ama thutan ho jouse kamasanga aumin: achonna dan kisunho thudola vang, keima hicheho-a konchun kapotdoh pon ahi.

²⁴Keima amasanga chondih tah kanahin; kakhangit louna-a konin kakikangsen ahi.

²⁵Hijeh chun Pakaiyin kachon phatna dungjui eilethuh-a; amitmu-a kathena dungjuijin eilethuh ahi.

²⁶Hepina neite henga nangman hepinanei nahi namusah ding; michondih ho henga nangma chondih nahi nakimusah ding ahi.

²⁷Mitheng ho henga atheng nahi nakimusah ding; milungkon te henga chingtah nahi nakimusah ding ahi

²⁸Chule bolgentheija umte nangman nahuhdoh ding; mikiletsahte chu suhnema aumtheina dingun, namit chu achunguva aumin ahi.

²⁹Ajehchu vo Pakai nangma kathaomei nahin; Pakaiyin kamuthim eisalvah pehding ahi.

³⁰Ajehchu nangma jala galmi honkhat douna kalhai ding; ka-Pathen jala bang kachop khup ding ahi.

³¹Pathen vang, alampi achamkimin; Pakai thu chu akipho chenin; ama tahsan te jouse dingin ama alumdalu ahi.

³²Ajehchu Pathen tailou, Pakai koiham? chule Pathen tailou, koiham songpi?

³³Pathen chu kathahatna le kathaneina ahin: aman kalampi achamkimsah-in ahi.

³⁴ Aman kakeng sajuhnu keng bangin asemin; kamun sangho-a eitousah-in ahi.

³⁵Kakhutnin thih thalpi ho ajetboh nadingin; Aman kakhut galbolje ahilin ahi.

³⁶Nangman nahuhhinga lumdal neipetan; nanun nem nachun keima lentah-in eisemdohtai.

³⁷Nangman kalhuh louna dingin, kanoija kakalsona ding neikeh letpeh-in ahi.

³⁸Keiman kamelmate kadelin, amaho kasumangin; chule amaho kasuh manghel kahsen kahungkile pon ahi.

³⁹Athokit theilouna diuvin keiman amaho kamavon, kasumang helin; henge, amaho kakengto noija alhusoh taovin ahi.

⁴⁰Ajehchu nangman galsatn-a dingin thahat na-in katai neigah peh-in; keima douna-a kipandoh hochu kanoija nakoitan ahi.

⁴¹Nangman keima eihot bolte chu kasuhmang nadingin, kamelmate lolho chu neipedoh-in ahi.

⁴²Amahon aveovin, ahinla ahuhdohdiu koima aumpon; Pakai jengin jong amaho adonbutpon ahi.

⁴³Hichun keima amaho chu vutvai bangin kavongoijin, chule lamlen dunga bonlhoh bangin kachotphan, akithejalji taovin ahi.

⁴⁴Nangman kamite kiphinna-a konin neihuh doh-in, Pathen hephalouho luchang dingin neikoitai: kahet khahlou mihon eijen nadingu ahi.

⁴⁵Gamdang miho kahenga hungkipelut dingu: amahon ajah jah ule kasei angai dingu ahi.

⁴⁶Gamchom mihochu hung lhadah untin, chule akikul khupnao mun'a kona kicha ding ahiuve.

⁴⁷Pakai chu ahingjingin, chule kasongpi chu nunnom hen; huhhingna songpi Pathen chu choisangin umhen.

⁴⁸Kaphu eilah peh-a, mihemte kanoija sunema Pathen ahin,

⁴⁹Chule kamelmate lah-a kona eipuidoh-a chu Pathen ahi: keima douna-a kipandoh ho chungvuma neidomsangin: mihuham ho-a konin neihuhdoh tan ahi.

⁵⁰ Hijeh-a chu vo Pakai, Pathen hephalouho lah-a nangma thangvah ingting, chule namin vahchoi La kasah ding sange.

⁵¹Amachu aleng dinga sochatna insang ahin; chule athaonu David le achilhahte henga a-itih chanin hepina amusah-in ahi.