Read Thado Chin 2 Samuel 23 Bible Online

2 Samuel 23 - Thado Chin bible

2 Samuel 23

¹Tun hiche hohi David thusei nunungpen ahitai. Chungnung pena dopsanga umpa le Jacob Pathen'in thao anu, chule Israelte lah-a lathempen Jesse chapa David'in aseitai;

²Pakai lhagao chun keija konin thu aseidoh-in, chule athu kaleija achengin ahi.

³Israel Pathen'in hitin aseijin, Israel songpin kajah-a hitin aseije, Mihem chunga vaihompa chu thudih ding, Pathen ging puma vai ahomding ahi.

⁴Chule amachu meibol kailouni jingkah, nisa ahungso doh-a khovah tobang hiding; gojuh jouva leisetna kona thengsela hungdon doh h amhing tobang hiding ahi.

⁵Ka-insung hi Pathen'a dingin chutobang chu hihih jongle; aman keimatoh tonsot kitepna asemin, thiljouse thonlou dingin kitoh tah-in akoijin ahi. Ajehchu aman hichehi kahuh hingna jousele kangaichat ho jouse chu ahi; aman akhantousah lou dingham?

⁶Ahinla Belial [2] chapate chu ling kisatlha-a kipaidoh tobang hidingu ahi, ajehchu amaho khutna kiman theilou ahiuve.

⁷Ahinla amaho gatongkha-a michu thih le tenglung ki-um khumding; chule amaho hiche mun'a chu meija kihalvam ding ahiuve.

⁸Hichehohi David'in anei mihat ho minchu ahi. Tachmon mite touna-a tou, lamkaiho lah-a pipu chu Ezni mi Adino ahi: aman mi jaget dounan atengcha alamin, amaho chu khatvei tha-in athat gamin ahi.

⁹Chule ama bantah-a chu ahile, David le amihat thumho lah-a khat, Ahoh mi Dodo chapa Eleazar ahin, amahon galsat dinga galmuna kikhom Philistine te agahchou laijun, Israel miho chu ajam mang taovin;

¹⁰Chuin ama akipatdoh-in, chemjam le akhut kikhen louvin, akhut angoi tokahsen Philistine te chu athatnin ahi. Chule hicheni chun Pakaiyin nasatah-in gal ajosah-un; chule mipi chu ama nunga thil kichom dingin akileuvin ahi.

¹¹Chule ama bantah-a chu Harar mi Agee chapa Shammah ahi. Chuin Philistine te chu louthul dimsetna gambih khatna apunin akikhom khomun: chule mipi chu Philistinete-a konin ajamtaovin ahi.

¹²Ahinla ama loujao lailunga chun adingin, ngahtupmin apangin, chule Philistine te chu athatnin ahi. Hichun Pakaiyin nasatah-in agaljo sah-in ahi.

¹³Chule lamkai pipui somthum lah-a thum chu achesuh-un, chuin chang at laijin Adullam songkoa David henga ahungun: chule Philistine te sepaiho chun Rephaim phaichama gebuh akisonun ahi.

¹⁴Chule David chu kosung khatna aumin, chule Philistine te sepaihon chu Bethlehem'a umuva ahi.

¹⁵Chuin David'in ngaicha tah-in, Ohe Bethlehem kotpi phungkom twikul'a twi chu dondin mi khat touvin eihung pethei taveleh! ati.

¹⁶Chuin mihat thumho chun Philistine janelho lahchu aphujalun, Bethlehem kotpi phung koma um twikul'a twi chu athalun, chule David henga ahindomun ahi. Ahijeng vangin aman hichu adonpon, ahinla aman Pakai henga asunglhatan ahi.

¹⁷Chule aman, Vo Pakai hiche kabol dinghi keija konin gamlahen: hiche ahinkhou tijat umtah-a dinga phaldoh miho thisan hilou ham? ati. Hijeh-a chu aman adon tapon ahi. Hiche mihat thumho hin hicheho hi aboldoh-u ahi.

¹⁸Chule Zeruiah chapa Joab sopipa Abishai chu thumho lah-a apipuipen ahi. Chuin aman mi jathum dounan atengcha chu alamin, amaho chu athatnin, chuin thumho lah-a chun aminthang tan ahi.

¹⁹Amachu thumho lah-a ja umpen hilouham? Hijeh chun ama amaho gallamkai ahitai. Hijongle amasa thumho lah-a chun apang phapon ahi.

²⁰Chule Kabzeel'a mihangtah khat chapa Jehoiada chapa Benaiah, thil tamtah tongdohpa chun, keipi bahkai tobang Moab mini athatnin ahi. Chule aman buh lhahlaijin achesuh-in, kotong sung khatna keipi bahkai khat jong athatnin ahi.

²¹Chuin aman Egypt mi miphatah khat athatne: Egypt mipa chun akhutna tengcha akichoi ahin, hinlah aman tenggol khat achoijin achesuh-in, Egypt mipa khutna konchun tengcha chu alahpeh-in, ama tengcha mama-a chun ama chu athatnin ahi.

²²Jehoiada chapa Benaiah'in hiche thilhohi anabolin, chule mihat thumho lah-a chun ama aminthang tan ahi.

²³Amachu somthum hosangin ja aum cheh-in, ahinla amasa thumho chu aphapon ahi. Chuin David'in ama ngahtupho chungvuma akoitan ahi.

²⁴Joab sopipa Ashahel chu somthum holah-a khat ahin; Bethlehem'a um Dodo chapa Elhanan,

²⁵Harod mi Shammah, Harod mi Elika,

²⁶Palt mi Helez, Teko mi Ikkesh chapa Ira,

²⁷Anathoth mi Abiezer, Hushath mi Mebunnai,

²⁸Ahoh mi Zalmon, Netophah mi Maharai,

²⁹Netophah mi Baanah chapa Heleb, Benjamin gam Gibeah'a kona Ribai chapa Ittai,

³⁰Pirathon mi Benaiah, Gaash vacha dungho-a kon Hiddai.

³¹Arbath mi Abialbon, Bahur mi Azmaveth,

³²Shaalhon mi Eliahba, Jashen chapate lah-a Jonathan,

³³Harar mi Shammah, Harar mi Sharar chapa Ahiam,

³⁴Maachath chapa, Ahasbai chapa Eliphelet, Gilon mi Ahithophel chapa Eliam,

³⁵Karmel mi Hezrai, Arbai mi Paarai,

³⁶Zobah'a Nathan chapa Igal, Gad mi Bani,

³⁷Ammon mi Zelek, Zeruiah chapa Joab galvonpopa Beeroth mi Naharai,

³⁸Ithrite mi Ira le Ithrite mi Gareb,

³⁹Hit mi Uriah ahiuvin, abonun mi somthum le sagi ahiove.