Read Thado Chin 2 Samuel 24 Bible Online

2 Samuel 24 - Thado Chin bible

2 Samuel 24

¹Chuin Pakai lunghanna chu Israelte dounan ahung koujah kittan, chuin amaho douna-a David atilin, Chenlang, Israel le Judah gasimin, atisah-in ahi.

²Ajehchu lengpan aumkhompi janel gal lamkaipa Joab henga, Amijat kahet theina dingin, tun chenlang Israel phungho jouse Dan'a pat Beersheba geijin gasimin, ati.

³Chuin Joab'in lengpa henga, Ka pakai lengpa mitnin amutheina dingin, Pakai na-Pathen'in amaho ijat hijeng jongleu ajat jakhat-in punsah hen: ahinla ipi dinga ka pakai lengpan hiche hohi nangaichat ham? ati.

⁴Ahijeng vangin lengpa thu chu Joable janel lamkaiho chu anehjou jotan ahi. Chuin Joab le janel lamkaiho chu lengpa mitmu tah-in Israel mipi ho sim dingin apotdoh taovin ahi.

⁵Chuin amaho Jordan agalkaijun, Gad vachadung koma uma khopi jetlam Jazer langsang Aroer mun'a chun ponbuh asong taovin ahi.

⁶Chujouvin amaho Gilead le Tahtim-hodshi gam ahung lhungun; chuin amaho Dan-jaan le Zidon veldung ahung lhungun,

⁷Chule Tyre kulpi dettah le Hiv mite khopi jouse le Canaan miho khopi jouse-a ahungun: chuin amaho Judah lhang lamsang Beersheba changeijin acheuvin ahi.

⁸Hitichun amaho agamsung jouse-a acheleuvin, lhakole nisomni alhinin amaho Jerusalem ahung lhungun ahi

⁹Chuin Joab'in mipi akisimdoh jat chu lengpa apedohtan: chule Israelte lah-a chun mihangsan chemjam lamthei cheh sang jaget aumin, chule Judah miho lah-a chun mi sangjanga aume.

¹⁰Chuin aman mipi asimjou phatnin David chu alung nalheh jengin ahi. Chuin David'in Pakai henga, Kana thilbol chungahin kachonse lheh jengtai: chule Vo Pakai, tu-a hi nahenga katao ahi, nasoh khangit lounahi ladoh in; ajehchu keiman ngolhoi tah-in na kanatongin ahi, ati.

¹¹Tun David jingkah-a ahungtho phatnin, Pakai thu chu David mitvah neipa Gad themgao henga ahungin, aseije,

¹²Chenlang David henga, Pakaiyin hitin aseije, keiman nangma thil thum kapei, nachunga kalhunsah dingin, thumlah-a hin khat penpen kilhenin, tin gaseijin ati.

¹³Hitichun Gad David henga ahungin, amachu aseipeh-in, ajah-a, Nagam sunga kum sagi kel hunglha ding ham? ahiloule nangma namelmate masanga lhathum najama amahon nanung adeldiu ham? ahiloule nagamsunga hiset nithum lang dingham? Tun eihinsolpa henga kakilea kadonbut theina dingin neihilin, ati.

¹⁴Chuin David'in Gad henga, Keima nasatah in kagenthei tai; tun eiho Pakai khutna kipelut jenguhite; ajehchu amihepina alenin ahi: chule mihem khutna vang lutpou hite, ati.

¹⁵Hitichun Pakaiyin jingkah-a pat, aphat kitep geichun Israelte lah-a chun natset alhahsah tan ahi. Chutichun mipi lah-a konin Dan'a pat Beersheba geijin mi sangsomsagi athitan ahi.

¹⁶Chuin Jerusalem suhmangna dinga vantil'in achunga akhut alap phatnin, Pakaiyin thilphalou abolgotna konin alung aheijin, mipi sumang ding vantil henga chun, Aphaset tai: nakhut chu tuhtang tan, ati. Chuin Pakai vantil chu Jebus mi Araunah pholla chun aumin ahi.

¹⁷Chuin David'in mipi ho sumang dinga vantil chu amuphatnin, Pakai henga, Ven keima giloutah-in kanachonin, kachonse tai: ahinla hiche kelngoiho hin ipiham abollu? nahenga katao ahi, nakhut chu keima le kapa insung dounan chujohen, ati.

¹⁸Chule hicheni chun David henga Gad ahungin, ajah-a, Kipatdoh-in, Jebus mi Araunah pholmuna khun Pakai dingin maicham khat gasemin, ati.

¹⁹Chuin Pakai thupeh le Gad seidung juijin David achetoutan ahi.

²⁰Chuin Araunah'in aven ahile lengpa le asohte chu ahenglama ahung amun ahi. Chuin Araunah chu achedoh-in, lengpa masanga chun tolla amai asulut tan ahi.

²¹Chuin Araunah'in, Ipi dinga ka pakai lengpa hi asoh henga hunga ham? ati. Chuin David'in, Mipi ho-a kona natset suhtanga aumna dinga, Pakaiya dinga maicham khat semna dinga nachangphol chodinga hunga kahi, ati.

²²Chuin Araunah'in David henga, Ka pakai lengpan aman phante atibang chun kilah henlang pejenghen: Ven, hikoma hin govam thilto-a toding bongchal, chule thinga manding changphola manchah ho le bongchal manchah dangho aumin ahi.

²³Hicheho jousehi Araunah'in lengpa dinga abola apehdoh ahi, ati. Chuin Araunah'in lengpa henga, Pakai na-Pathen'in nasanpehhen, ati.

²⁴Chuin lengpan Araunah henga, Ahipoi, keiman thonlouva nangma-a kona aman uma kachoh ding ahi: chule keiman imacha suhmang louhela Pakai ka-Pathen henga govam thilto katolou ding ahi, ati. Hitichun David'in changphol le bongchalho chu dangka shekel somnga in achotan ahi.

²⁵Chuin David'in hia chun Pakaiya dingin maicham khat asemin, govam thilto hole chamna thiltoho atohtan ahi. Hitichun Pakaiyin gamsung taona chu angaipeh-in, chule Israelte lah-a konin natset chu akitolmang tan ahi.