Read Thado Chin 2 Samuel 6 Bible Online

2 Samuel 6 - Thado Chin bible

2 Samuel 6

¹Chuin David'in Israel mi akilhengdoh sangthum hochu akhom khomin ahi.

² Hichun David akipatdoh-in, aumpi jouse toh Juda gam Baale'a konin, Cherubim teni kikah-a um janel ho Pakai minna kikou, Pakai thingkhong chu gapotou dingin ache taovin ahi.

³ Chuin amahon Pathen thingkhong chu bongkang thah khat chunga akoijun, Gibeah kho-a cheng Abinadab in'a konchun ahin podoh taovin ahi. Hitichun Abinadab chapateni Uzzah le Ahio chun hiche bongkang thah chu ahintol lhonin ahi.

⁴Chule amahon Pathen thingkhong chu Gibeah kho-a Abinadab in'a konin ahinpodoh-un; Pathen thingkhong chutoh ahung kilhonpeh-un, chule Ahio chu Pathen thingkhong masanga chun achen ahi.

⁵Chuin David le Israel insung mijouse chun Pakai masanga chun chahthinga kisem manchah jatchom chomho, selangdah, tumgingtheiho jouse, khongchaho, sumkon bineiho, chule thih khutbeh ho atum gingun ahi.

⁶Chuin amaho Nacon pholmun ahunglhun phatnun, Uzzah chun Pathen thingkhong lama chun akhut ajahdoh-in, atuh-in ahi: ajehchu bongchal teni chun hichu athin lhon ahi.

⁷Chuin Pakai lunghanna chu Uzzah chunga ahung koujah jengin; chuin Pathen'in athemona jeh-in hikoma chun ajepmin; chule ama Pakai Pathen thingkhong koma chun athitan ahi.

⁸Chuin Pakai Uzzah chunga achuh jehchun David alung nommo lheh jengtan; hiche mun chu Perezuzzah asah-in, tunigeijin akisah tan ahi.

⁹Chuin hicheni chun David'in Pakai akichan, Pakai thingkhong chu kahenga iti hung thei dingham? ati.

¹⁰Hijeh chun David'in Pakai thingkhong chu ahenga David khopi sunga pohlut ding anomtapon; ahinla David'in hichu Gitt mi Obed-edom insunga chun apolut tan ahi.

¹¹ Chuin Pakai thingkhong chu Gitt mi Obed-edom in'a chun lhathum aumin; chuin Pakaiyin Obed-edom le a-insung pumpi chu phatthei aboh tan ahi.

¹²Chuin David lengpa jah-a, Pathen thingkhong jal-in Obed-edom le a-insung pumpi le anei agou jouse phatthei achang tai, ti akiseipeh tan ahi. Hijeh chun David achen, Pathen thingkhong chu Obed-edom in'a konin kipah tah-in David khopi-a ahin potou tan ahi.

¹³Chuin anahitin ahi, Pakai thingkhong puhon kalgup ason jouvun, aman bongchal le gan kivahthaova ganlhainan abolin ahi.

¹⁴Chuin David chu Pakai angsunga chun athanei chasunin alamin; chule David chun tupat ponnem thempu sangkhola atai akigah ahi.

¹⁵Hijeh chun David le Israel insung miho jouse chun aw thongjeju le sumkon ginto thon Pakai thingkhong chu ahin putouvun ahi.

¹⁶Chule Pakai thingkhong chu David khopi sunga ahung lhunto lhonin, Saul chanu Michal'in bangkotna konin ahinven ahile, David lengpa Pakai masanga akhut alea alam chu amutan; amanun alungthimin amuneo lheh-in ahi.

¹⁷Chuin amahon Pakai thingkhong chu ahinpolut nun, aumna dinga David'in anasah ponbuh lailung tah-a chun akoitaovin ahi. Chuin David'in Pakai anga govam thilto le chamna thilto abolin ahi.

¹⁸Chuin David'in athilto, govam thilto le chamna thiltoho achai phatnin, aman mipi hochu Pakai janel minin phatthei aboh tan ahi.

¹⁹ Chuin David'in mijouse le Israel mite jouse chu, anumei apasal'in changlhah lum khatcheh le sachan khatcheh, chule lengpitheija kisem changlhah khatcheh ahoppeh'in ahi. Hitichun mijouse chu a-inlam cheh uva achetauvin ahi.

²⁰Chuin David chu a-insung miho phatthei bohdingin ahung kiletan ahi. Chuin Saul chanu Michal chu David kimupi dingin ahungdoh-in, ahenga, Tunia Israelte lengpa pannabei mijahmo tah khat asagoh-a aum banga, tunia asoh numei ho mitmu-a asagoh-a aum jengchu iti loupi hitam! ati.

²¹Chuin David'in Michal jah-a, Pakai mite Israelte chunga vaihom dinga eitungdohpa, napa le a-insung miho jouse khella eilhengdoh pa Pakai masang ahi; hijeh achu Pakai masanga lamding kahi.

²²Chule hiche sunga kamelse cheh ding, chule kamitmu-a kakisuhnem ding ahi. Nangman nasei soh numei ho chungchanga vang, keima amaho jabola kaum ding ahi, ati.

²³Hijeh chun Saul chanu Michal chun athini geijin cha aneitapon ahi.