Read Thado Chin 2 Samuel 7 Bible Online

2 Samuel 7 - Thado Chin bible

2 Samuel 7

¹Chuin ahitin ahi, lengpa insunga atouva, Pakaiyin akimvela amelmaho-a konin choldona apeh phatnin,

²Chutichun lengpan themgao Nathan henga, Tun vetemin, keima Cedar in'a kachengin, ahin Pathen thingkhong chu ponbuh maimai sunga aumin ahi, ati.

³Chuin Nathan'in lengpa henga, Chenlang nalunga umjouse chu gaboltan, ajehchu Pakaiyin na-umpinai, ati.

⁴Chuin chuche janchun ahitin ahi, Pakai thu chu Nathan henga ahungin, hitin ati,

⁵Chenlang kasoh David jah-a, Nangman keima dinga kachenna ding in khat neisahpeh dingham?

⁶Keiman Israel chate Egypt gama kona kahin puidoh ni-a pat tuni geijin in'a kachengpon, amavang ponbuh sungle houbuh sungabou kachen ahi.

⁷Keima Israel chateto kana valena mun jouse-a, kami Israelte vahdinga kathupeh Israel phungho henga thu kanaseija, ahenguva, Ipi dinga nanghon keima dinga Cedar thinga in khat neisahpeh louvu ham tia kanasei khah-em?

⁸Hijeh-a chu tuahi nangman kasoh David henga hitia hi nasei ding ahi, Janel Pakaiyin hitin aseije, Keiman nangmahi kelngoi lhatna hamhing lah-a kelngoi najuina-a kona kamite Israelte chunga vaihom dinga kalhendoh nahi:

⁹Chule keiman nachena chana kalhonpin, namitmu-a konin namelmate jouse kasumangin, leiset chunga miminthang ho minkhat bangin namin kathansah tan ahi.

¹⁰Hiche chungvuma chu keiman kami Israelte dinga chu munkhat kalhendoh pehding, chule amaho agam mong monguva achenuva, akichon lele tahlou nadinguva kaphudet dingu; chule masanga banga migilou chaten jong asuhgenthei tahloudiu;

¹¹Kami Israelte chunga dinga thutan ho kana thupeh laija patna ana chutiu ahin; chule namelmate jouse-a konin kakicholdo sahtan ahi. Chujongle Pakaiyin nahenga na-insung katundoh pehding nahi ati.

¹² Chule nahin nikhoho ahunglhina, nangma napu napate toh nalupkhom tengle, keiman nanunga nachilhah, nangma taijola mong monga peng khat katundoh ding, Chule keiman alenggam kaphudet ding ahi.

¹³Ama chun kamina in khat asah ding, chule keiman alenggam chu atonsotna dinga kaphudet ding ahi.

¹⁴ Keima apa kahi ding, chule ama kachapa hiding ahi. Aman khangit louna aneija ahile keiman amachu mihem sehgimna tenggol le mihem chate kajepna-a chu kasehgim ding ahi.

¹⁵Amavang namasanga kona kachondoh Saul'a kona kalahmang banga, kami hepina chu ama-a kona kalahmang louding ahi.

¹⁶ Chule na-insung le nalenggam chu a-itih a dinga namasanga kiphutdet ding; na laltouna jong a-itih-a dinga kiphutdet ding ahi, tin gaseipeh-in ati.

¹⁷Hicheng thuho dungjui le hiche gaothilmu ho dungjui hin Nathan'in David chu aseipeh tan ahi.

¹⁸Chuin David lengpa chu alutnin, Pakai masanga atouvin, hitin aseije, Vo Pakai Pathen, keima koi kahi ham? chule ka-in chu ipiham hija nangman hichan geija neipuiham?

¹⁹Chule vo Pakai Pathen, hichehi nangma dinga thil neocha bou ahinalaijin; chule nangman khonungpeh-a nasoh insunga hunglhung ding jong naseijin ahi. Chule Vo Pakai Pathen, hichehi mihem chonna dan ngaimong hinam?

²⁰Chule David'in nahenga ipi aseibe dingham? Ajehchu Pakai Pathen nangin nasoh hi nahenai.

²¹Ajehchu nathu jal le nangmatah lung ngaito dungjuija, hiche thil loupitahhi nasoh-in ahetthei nadinga nabol ahitai.

²²Hijeh chun vo Pakai Pathen, nangma naloupin ahi: ajehchu keihon kanaova kajah dungjuijun nangma tobang aumpon, nangma tailou Pathen dang aumpoi.

²³ Chule leiset chunga hi nami Israelte tobanga namkhat Pathen'in nangma-a hidinga Egypt gama kon, namtin le a-pathen hou lah-a kona, namite hiding le namin loupi sah ding, chule nangma dinga thil loupitahho le nagama dinga tijat umtahho boldinga nalhatdoh umkham?

²⁴Ajehchu nangma tah-in nami Israelte hi a-itih-a namite hidinga nanamdet ahitan: chule Pakai, nangma a-Pathen'u nahung hitai.

²⁵Chule tun, vo Pakai Pathen, nasoh chungchang le a-insung chung chang thua nasei thuhi a-itih a dingin phutdet ninlang, naseibang chun boltan.

²⁶Chule Janel Pakai hi Israelte Pathen ahi tin namin hi a-imatih chanin choisangin umhen lang: chule nasoh David insung hi namasanga kiphutdet hen.

²⁷Ajehchu nangma Vo janel Pakai le Israel Pathen'in nasoh henga naphong doh-in, Keiman na-insung katundoh ding ahi tin naseije. Hijeh-a chu nasoh hin hiche taona neina dinga hi alungsunga hansana amu ahi.

²⁸Chule tun, vo Pakai Pathen, nangma Pathen nahin, chule nathu hohi thutah ahin, chule nangman hiche phatna hi nasoh henga nahahsel in ahi.

²⁹Hijeh chun tun a-itih-a namasanga aumjing nadin, nasoh insung phatthei naboh dinghi nalung lhaina hihen:ajehchu vo Pakai Pathen, nangman hichehi nasei ahitai; chule nangma phatthei bohna-a chun, nasoh insunghi a-itih-in phatthei changjing tahen.