Read Thado Chin 2 Samuel 8 Bible Online

2 Samuel 8 - Thado Chin bible

2 Samuel 8

¹Chuin hiche jouchun ahitin ahi, David'in a Philistinte chu asatnin, amaho chu asunemin ahi. Chuin David'in Metheg-ammah chu Philistinte khutna konin aladohtan ahi.

²Chule aman Moab asatnin, chule amahochu tolla alupsah-in, khaovin aten; thading ho chu golni in aten, chule hinghoi dingho chu golkhat lhingsetnin aten ahi. Chutichun Moab mite chu David soh-in ahung pangun, thilpeh ahinchoi jiuvin ahi.

³Chuin David Euphrate luidunga agamgi lelah dinga achea chun, aman Zobah lengpa Rehob chapa Hadadezer jong chu athatnin ahi.

⁴Chuin David'in amapa-a konchun sakol kangtalai sangkhat le sakol sepai jasagi, chule keng sepai sangsomni ahinlan ahi. Chuin David'in sakol kangkai jouse chu asubaijin, ahinla sakol kangtalai jakhat kaiding vang akhendoh-in ahi.

⁵Chuin Damascus'a Syria mite chu Zobah lengpa Hadadezer kithopi dingin ahungun ahile, David'in Syria mite chu sangsomni le sangni athatnin ahi.

⁶Chuin David'in Syria'a um Damascus'a chun sepai tampi akoitan ahi. Chuin Syria mite chu David soh-in ahung pangun, thilpeh ahinchoi jiuvin ahi. Chule Pakaiyin David chu achenna jouse-ah aveng jingin ahi.

⁷Chuin David'in Hadadezer sohpa khutna um sana lumdal chu alan, Jerusalem'a ahin polut tan ahi.

⁸Chuin Hadadezer khopi Betah le Berothai'a konin, David lengpan sum-eng tamtah ahinpon ahi.

⁹Hamath lengpa Toi'in David lengpan Hadadezer janel jouse athattai ti ajah phatnin,

¹⁰Hichun aman Hadadezer asatna ajo jehchun, Toi'in ama chibai bohding le phatthei bohdingin achapa Joram chu David henga ahinsolin ahi; ajehchu Hadadezer chu Toi toh anakigal jinga ahi. Chule Joram'in dangka, sana, chule sum-eng kong le belho ahinpon:

¹¹Hicheho chengse chu David'in asuhnem namtin jouse-a kona alah dangka le sana jouse chutoh Pakai henga atohdoh-in ahi.

¹²Hicheho chu Syria'a kon, Moab'a kon, Ammon chate'a kon, Philistinete-a kon, Amalek'a kon, Zobah lengpa Rehob chapa Hadadezera'a kon galthil kichomho ahi.

¹³ Chuin David'in chi phaicham mun'a Syria mite sangsom le sangget atha-a ahung kinunglekit chun amin athang tan ahi.

¹⁴Chuin aman Edom'a sepai tampi akoijin, Edom gamsung jouse chun sepai akoisoh keijin, chuin Edom mite jouse David sohte ahung hitaovin ahi. Chule David chu Pakaiyin achena jouse-a avengbit jingin ahi.

¹⁵Chuin David'in Israel pumpi chunga vai ahomin; chule David'in amite jouse chunga chun phatah le dihtah-in na atongin ahi.

¹⁶Chule Zeruiah chapa Joab chun janel chunga vaipo ahin; chule Ahilud chapa Jehoshaphat chu thuching ahin;

¹⁷Ahitub chapa Zadok le Abiathar chapa Ahimelech chu thempu ahilhonin; chule Seraiah chu danthu sun ahin;

¹⁸Jehoiada chapa Benaiah chu Chereth mite le Peleth mite chunga vaihomin apangin; chule David chapate chu vaihom pipun apangun ahi.