Read Thado Chin 2 Samuel 9 Bible Online

2 Samuel 9 - Thado Chin bible

2 Samuel 9

¹ Chuin David'in, Jonathan khohsahna jala hepina kamusah ding Saul insungmi khatbeh akikhendoh umlou ham? ati.

²Chuin Ziba kiti Saul insungmi lah-a soh khat aumin ahi. Chuin amahon amachu David henga akouvun, chuin lengpan ajah-a, Nangma Ziba nahim? ati. Chuin aman, Nasohhi amachu kahinai, ati.

³ Chuin lengpan ajah-a, Achunga Pathen mihepina kamusah ding Saul insungmi khatbeh umlou ham? ati. Chuin Ziba'in lengpa henga, Jonathan chapa khat aumin, amachu kengbai ahi, ati.

⁴Chuin lengpan ajah-a, Amachu hoilaija umam? ati. Chuin Ziba'in lengpa henga, Ven amachu Lodebar kho-a um Ammiel chapa Machir in'a aumin ahi, ati.

⁵Chuin David lengpan mi asolin, Lodebar kho-a um Ammiel chapa Machir in'a konchun agapuidoh tan ahi.

⁶Tun Saul chapa, Jonathan chapa Mephibosheth chu David kom ahunglhun phatnin, ama aboh khupmin jana apen ahi. Chuin David'in, Mephibosheth, ati. Chuin aman, ven nasohhi! tin adonbutnin ahi.

⁷Chuin David'in ajah-a, Kicha hih-in: ajehchu keiman thonlouva napa Jonathan khohsahna jala nangma hepina kamusah ding, chule napu Saul gam sese jong kalepeh kitna, nangma tanglou hela kadokhang chunga changlhah naneh jing ding ahitai, ati.

⁸Chuin ama akunin, Nasohhi ipi kahia, chule uicha thisa tobang keimahi nei khohsah ham? ati.

⁹Chuin lengpan Saul sohpa Ziba chu akouvin, ajah-a, Saul neijouse le a-in jouse napakai pa chapahi kapeh ahitai.

¹⁰Hijeh-a chu nangma le nachapate, chule nasohten amadinga leiset chu nalhopeh diu, chule napakai pau hin nehding an aneitheina dinga agasoh hochu nahin pohdiu ahi: ahin napakai pao chapa Mephibosheth hin phattina kadokhanga changlhah anehding ahi, ati. Tun Ziba'n chapa somle ngale soh somni aneijin ahi.

¹¹Hichun Ziba'n lengpa jah-a, Ka pakai lengpan asoh athupeh dungjuija hi nasoh-in kabol ding ahi, ati. Mephibosheth chungchanga, lengpan hitin ati, aman kadokhang chunga chapateho khat banga an anehding ahi.

¹²Chule Mephibosheth'in chapa khangdong khat aneijin, amin chu Mica ahi. Chule Ziba insunga cheng jouse chu Mephibosheth soh ahi taovin ahi.

¹³Hitichun Mephibosheth chu Jerusalem'a achengin ahi: ajehchu aman tanglou helin lengpa dokhanga anen; chule ama akeng ni-a baija ahi.