Read Thado Chin 1 Lengte 1 Bible Online

1 Lengte 1 - Thado Chin bible

1 Lengte 1

¹Tun leng David chu ateh-in kum tamtah ahitan, chuin pon tamtah asilpeh-un, ahinla lum asajoupoi.

²Hijeh chun asohten ahenga, ka pakai lengpa dingin khangdong nungah theng khat kihol hen, amanu lengpa anga dinghen lang, vesuihen lang, chule ka pakai lengpa tilumthei nadin, na-anga lumjihen, atiuve.

³Chutichun amahon Israel gamsung pumpi-a nungah hoitah khat aholuvin ahile, Shunam mi Abishag amuvin, lengpa henga ahinpui taove.

⁴Nungahnu chu ahoilheh jengin, lengpa chu avesuijin, ajenletan ahi. Ahinla lengpan amanu chu akitimatpi pon ahi.

⁵ Chuphatnin Haggith chapa Adonijah chu ama akichoisangin, keima kalengchan ding ahi, tin kangtalai ho le sakol touthemho, chule mi somnga amasanga lhaidin akigottan ahi.

⁶Chule apan, ibola hitobang nabol ham? tin adongin alungnatsah khapoi. Amapa hi mi melhoitah jong ahin, anun Absalom nunga ahin ahi.

⁷Chule aman Zeruiah chapa Joab le Abiathar thempu chu ana kihoutoh pin, chule amanin Adonijah ajoplhonin, akithopi lhonin ahi.

⁸Ahinla Zadok thempu, Jehoida chapa Benaiah, Nathan themgao, Shimai, Rei chule David mihangsan ho vangchu Adonijah toh apangkhom pouvin ahi.

⁹Chuin Adonijah'in kelngoiho, bongchalho, chule gancha thao ho Enrogel koma um Zohaleth songpi chunga chun athatnin; leng chapate asopiho jouse le Judah gama lengpa lhachaho jouse akouvin;

¹⁰Ahin Nathan themgao, Benaiah, mihangsan ho le asopipa Solomon vang akoupon ahi.

¹¹ Hijeh chun Nathan'in Solomon nu Bethsheba jah-a, Haggith chapa Adonijah alengchana, ipu David'in ahetlou khu najahdoh louham?

¹²Hijeh chun tun hungin, katao ahi, nangmatah hinkhole nachapa Solomon hinkho huhdoh theina din thumopming kate.

¹³Leng David henga lutnin lang, ajah-a, kapu vo lengpa nasohnu henga thonlouva nachapa Solomon kakhela lengchanga, kalaltouna-a touding ahi tia nana kihahsel hilouham? Ibola Adonijah lengchanga hitam? tin gaseijin ati.

¹⁴Vetan, lengpa toh nakihou laitahle, keima jong nanunga hunging ting, nathusei kahung suhdet ding ahi, ati.

¹⁵Chuin Bethsheba chu lengpa henga indan sunga chun aluttai. Lengpa chu atehlheh jengtan, chule Shunam mi Abishag chun lengpa chu ajenlen ahi.

¹⁶Chuin Bethsheba chu aboh khupmin, lengpa chu janan chibai abohtai. Chuin lengpan, ipi nangaichat ham? anati.

¹⁷Amanun ajah-a, ka pakai, nangman nasohnu henga Pakai na Pathen min panin, kanungle nachapa Solomon thonlouva lengchanga, kalaltouna chunga touding ahi, tin nana kihahsel in ahi.

¹⁸Chule tun, vetan, Adonijah alengchang tan; chule tun, ka pakai lengpan hichu nahepoi.

¹⁹Aman bongchalho, gancha thao ho, chule kelngoiho nengtah-in athatnin; lengpa chapate jousele Abiathar thempu chule sepai janel gallamkai Joab akouvin, ahin nasoh Solomon vang akoupon ahi.

²⁰Chule nangma, ka pakai, vo lengpa, nangma nunga ka pakai laltouna-a chu koi hungtou dingham ti naseipeh dingu ngah-in, Israel chate jouse mit chu nangma chunga aume.

²¹Achutiloule hung hitiding ahi, ka pakai lengpa hi apu apate toh ahung lupkhom tengle, keile kachapa Solomon hi mi kisuhmosah-a eiki simlhon ding ahi, ati.

²²Chule veuvin, amanu lengpa toh akihou petnin, Nathan themgao jong chu ahunglut tan ahi.

²³Chuin amahon lengpa ahilun, Nathan themgao ahunge, atiuve. Ama lengpa ang ahunglut phatnin lengpa anga akunin amai tolah asulut tai.

²⁴Chuin Nathan'in aseijin, ka pakai, vo ka lengpa, nangman kanungle Adonijah hi kalaltouna-a touding, chuleh vai ahomding ahi tia naseikhah ham?

²⁵Ajehchu ama tuni hin achesuh-in, bongchalle gancha thao chule kelngoi nengtah-in athatnin, leng chapate jouse, janel gallamkai, chule Abiathar thempu akouvin; chule vetan, amasanga aneuvin adonun, Pathen'in Adonijah lengpa huhhing hen atiuve.

²⁶Ahinla keima, nasoh keimatah jengjong, chule Zadok thempu, Jehoida chapa Benaiah, chule nasoh Solomon vang akoupon ahi.

²⁷Hiche thilhi kapu lengpan nabol hija, kapu lengpa nunga alaltouna chunga koi atouding nasohpa henga nahetsah lou khattou ham? atin ahi.

²⁸Chuphatnin David lengpan adonbutnin, Bethsheba chu kahenga dingin hinkou lutnun, ati. Chutichun amanu lengpa angsunga ahunglutnin, lengpa angah adingtai.

²⁹Chuin lengpa akihahselin, lung gentheina jouse-a kona kahinna eilhatdoh jingjeng Pakai chu ahinjing bangin,

³⁰Keiman nahenga Pakai Israel Pathen mina kana kihahsela, thonlouva nachapa Solomon keima nunga lengchanga, keima khela kalaltouna chunga touding ahi, tia kanasei banga, tunikho-a hi chutia chu kabol tahbeh ding ahi, ati.

³¹Chuphatnin Bethsheba'in amai tolah asulutnin, lengpa jana apen, kapu David lengpa a-imatih-in hingjing hen, ati.

³²Chuin David lengpan Zadok thempu, Nathan themgao, chule Jehoiadah chapa Benaiah chu kahenga dingin hinkoulut nun ati. Chuin amaho lengpa henga ahungtaovin ahi.

³³Lengpan jong amaho henga, napu sohte hi puijun lang, kachapa Solomon chu kasakol chunga tousah unlang, Gihon'a puisuh-un;

³⁴Chule Zadok thempupa le Nathan themgaovin hikoma chun Israel chunga leng dingin thao nulhon hen; chule nanghon sumkon mut un lang, Solomon lengpa Pathen'in huhhing hen, tiuvin.

³⁵Chujoule ama kalaltouna-a atoutheina dingin, nanghon anung hinjui touvun; ajehchu kei khella ama lenga pangding ahi. Chule keiman ama Israel le Judah chunga vaipo dinga katun ahitai, ati.

³⁶Chuin Jahoiada chapa Benaiah chun lengpa adonbutnin, Amen, kapu lengpa Pakai Pathen'in jong chutichun seihen.

³⁷Pakaiyin kapu lengpa anaumpi bangin, Solomon jong umpi henlang, alaltouna chu kapu David laltouna sanga lenjon sempeh hen, ati.

³⁸Hitichun Zadok thempu, Nathan themgao, Jahoiada chapa Benaiah, Chereth mite, chule Paleth mite achesuh-un, David lengpa sakol chunga chun Solomon atousah-un, Gihon'a ahinpui taovin ahi.

³⁹Chuin Zadok thempu chun houbuh-a konin thao koina saki khat aladoh-in, Solomon chu anutai. Chuin amahon sumkon amutnun; mijouse chun, Pathen'in Solomon lengpa huhhing hen, atiuve.

⁴⁰Chuin mipi jouse anunga akitol touvun, mipin kuli amutnun, hachangpan akipah-un, hitichun ahusaovin leiset akithing leovin ahi.

⁴¹Chuin Adonijah le ajinho jousen a-anneh jouvun hichu ajataovin ahi. Chuin Joab'in sumkon gin ajah phatnin, ipidinga khopi sunga awgin kithong lenglung ham? atin ahi.

⁴²Aman hichu asei nalaijin, veuvin, Abiathar thempu chapa Jonathan ahunge; chuin Adonijah'in ajah-a, hunglutnin, nang mihangsan nahin, kipanathu nahinpoi, ati.

⁴³Chuin Jonathan'in Adonijah adonbutnin, tahbeh-in ipu David'in Solomon lengin asemtai, ati.

⁴⁴Chule lengpan Zadok thempu, Nathan themgao, Jehoiada chapa Benaiah, Chereth mite, chule Peleth mite chu amatoh asolin, amahon amachu lengpa sakol chunga atousah-un;

⁴⁵Zadok thempu le Nathan themgaovin amachu Gihon'a lengdin thao anulhonin, amaho chua kona thanom tah-a hungtou uva, hijeh-a chu ahusan uva khopi kithonga ahi. Nanghon najah-u hi hiche husa chu ahi.

⁴⁶Chule Solomon jong lenggam laltouna achun atoutan ahi.

⁴⁷Chukalvalin lengpa sohte chu ipu David lengpa phattheiboh dingin ahungun, Pathen'in nangma min sangin Solomon min chu kithansah johenlang, chule alaltouna chu nangma laltouna sanga lenjon semhen atiuve. Chule lengpa chu alupna chunga akunjin ahi.

⁴⁸Chule lengpan jong, kamitnin amu petna, tunikho-a kalaltouna-a touding mikhat eipe-a Israel Pakai Pathen chu nunnom hen, tin aseije, ati.

⁴⁹Chuin Adonijah toh umkhom ajinho jouse akicha taovin, akipat doh-un, mijouse amadoncheh-a achedoh taove.

⁵⁰Chule Adonijah chu Solomon jeh-in atijan, akipatnin, achen, maicham ki hochu atuh dentan ahi.

⁵¹Chuin hichu Solomon aseipeh-un, veuvin, Adonijah'in Solomon lengpa akichatai; ajehchu, vetan, aman maicham ki hochu atuh-in, Solomon lengpan asohpa chemjam'a atha louna dingin tuni hin kahenga kihahsel hen atie, atiuve.

⁵²Chuin Solomon'in, aman mi tahsan um ahina avetsah-a ahile asamjang khat jong tolla lhalou ding ahi; amavang ama-a khangitlouna akimu dohle, thiteiding ahi, ati.

⁵³Chutichun leng Solomon chun mi asolin, amahon maichama konin ahin puisuh taove. Chuin ama ahungsuh-in Solomon henga chun abohkhuptan; chuin Solomon'in ajah-a, na inlama chetan, ati.