Read Thado Chin 1 Lengte 11 Bible Online

1 Lengte 11 - Thado Chin bible

1 Lengte 11

¹ Ahinla Solomon lengpan gamdang numei tamtah adeichatan, Pharaoh chanutoh kigomin, Moab numei ho, Ammon numei ho, Edom numei ho, Zidon numei ho chule Hit numei ho;

² Pakaiyin Israel chate jah-a, ahenguva nachelou dingu, amahojong naheng uva hunglou diu ahi; ajehchu thonlouva amahon nalungthimu a-pathen lamuva aheikoi dingu ahi; anatina miho chu Solomon'in ngailutna-in akolchahtai.

³Hitichun aman leng chanute jasagi ji-in aneijin, chule thaikem jathum aneijin; ajiten alung ahei mangpeh taove.

⁴Ajehchu ahitin ahi, Solomon ahungteh phatnin, ajiten pathen dangho lama alung aheikonpeh-un, chule apa David lungput bangin Pakai a-Pathen lama alungput aphachamkim tapon ahi.

⁵Ajehchu Solomon'in Zidon mite pathen Astorath, chule thet umtah Ammon mite pathen Milchom lama chun akiheitan ahi.

⁶Chuin Solomon'in Pakai mitmun thilse ahinboltan, apa David bangin Pakai chu ajui bukim tapoi.

⁷Hitichun Solomon'in Jerusalem masang lhanga chun thet umtah Moab mite Chemosh dingle, thet umtah Ammon chate Molech dingin munsang khat asemin ahi.

⁸Chutobang machun gamdang numei ajite jouse pathenho dingin gimnamtui halna le ganlhaina aseme.

⁹Chuin Pakai Israel Pathen, ahenga niveijen kilahpa-a kona akiheimang jehchun, Solomon chunga Pakai alunghang tan,

¹⁰Aman pathen dang ahoulou nadinga, hiche thudola hi thu anapehsa ahin; ahinla aman Pakaiyin ana thupeh chu anitpon ahi.

¹¹Hijeh chun Pakaiyin Solomon henga, hitobang tah-a hi na-uma, nangma kathupeh kathulhun le kachondanho nanit loujeh-in, lenggam chu thonlouva kabotela nasohpa kapeh ding ahitai, ati.

¹²Ahijeng vangin napa David jal-in nahin sungin bolponge; ahinla nachapa khutna kona kalhe khending ahitai.

¹³Hijeng jongle lenggam jouse chu lhehkhen pongting, kasoh David jal leh kalhentum Jerusalem jala phungkhat vang nachapa kapeh ding ahi, ati.

¹⁴Chuin Pakaiyin Solomon doudingin Edom mi Hadad chu ahintildoh-in, amachu Edom leng chilhah ahi.

¹⁵Ajehchu ahitin ahi, David Edom gama auma, janel gal lamkai Joab chun Edom gama pasal takip atha nungin, amithaho vuidin ache touvin ahi;

¹⁶(Ajehchu Edom pasal takip athagam soh kahseuvin, Joab chu chua chun Israelte jousetoh lhagupjen aga umun ahi,)

¹⁷Hadad chu apa sohte lah-a Edom mi phabep toh Egypt gama dingin ajamun; Hadad chu chapang neocha bou ahinalaije.

¹⁸Amaho Midian gama konin akipat doh-un, Paran'a ahungun; Paran'a konin mi akipuijun, Egypt gama, lengpa Pharoah henga ahungun; amachun in apen, nehlechah angaitopeh-in, gamjong anapen ahi.

¹⁹Chule Hadad chu Pharoah mitmun lungsetna lentah achangin, chutichun amatah jinu sopinu, Tahpenes lengnu sopinu chu ajidin apen ahi.

²⁰Tahpenes sopinu chun chapa Genubath ahinpeh-in, amachu Tahpenes'in Pharoah in'a noichep abansah-in; Genubath chu Pharoah insungmi, Pharoah chapatetoh alhakhomin ahi.

²¹Chuin Hadad'in Egypt gama konin, David chu apu apatetoh alumkhom tan, chule sepai vaipipo Joab athitai ti ajah phatnin, Hadad'in Pharoah henga, kagamlama kachethei nadin neipotdoh sahtan, ati.

²²Chuphatnin Pharoah'in ajah-a, kakoma naumhi ipi lhahsamna naneija, hitia chu phulou helouva nagam lama cheding nagot ham? ati. Chuin aman adonbutnin, imacha kalhasampoi, ahin neichesah pou pouvin, ati.

²³Chuin Pathen'in akidoupi chomkhat, Eliadah chapa Rezon, a-pakaipa Zaboh lengpa Hadadezer'a kona jamdohpa atildohpeh kitnin;

²⁴David'in Zobah kho miho athagam laija chu, amapa hin ahenga mi anakhopma, chule honkhat chunga gal lamkaija hungpanga; chule amaho Damascus'a acheuva, chua chu gachenguva, Damascus'a vaipo-a panga ahi.

²⁵Chule Hadad'in thilphalou anabol tilouvin jong, Solomon hinkho lhumkeijin amapa chu Israel kidoupi ahijingin; Israelte aho lheh-in, Syria gamchunga vai ahomin ahi.

²⁶Chule Zerada kho-a Ephrath mi, meithai khat amin Zeruah kitinu chapa, Solomon sohpa, Nebat chapa Jeroboam jongchun, lengpa dounan akhut alamin ahi.

²⁷Lengpa chunga akhut alapna ajehchu hiche ahi: Solomon in Millo asa-in, apa David khopi aselaiho asemphan ahi.

²⁸Chule Jeroboam kiti mipa hi hattahle hangsantah ahin; chule Solomon'in chuche gollhang chu miphachom tah ahi ahetjeh-in, Joseph insung natohjouse chunga vaihomin apansah-in ahi.

²⁹Chuin chuphat laitah chun ahitin ahi, Jeroboam Jerusalem'a kona apotdoh-a ahile, Shilon mi Ahijah themgaovin amachu lamdunga akimupin; amachun pon thahbeh akivon ahin, chule gamlah-a chu amanibou umlhona ahi.

³⁰Chuin Ahijah chun achunga pon thahbet-a chun amanin, halsomle halni in abottelin,

³¹Chuin aman Jeroboam jah-a, nangman halsom kilah-in, ajehchu Pakai Israel Pathen'in hitin aseije; vetan, keiman Solomon khutna kona lenggam chu kalhekhena, phung som chu nangma kapeh ding nahi, ati.

³²(Ahinla kasoh David jalle Israel namjouse lah-a kalhendoh khopi Jerusalem jala, namkhat vang aman aneiding ahi.)

³³Ajehchu amahon eida lhaovin Zidon mite pathen nu Astoreth, Moab mite pathen Chemosh, chule Ammon chate pathen Milcom ahouvun, apa David bangin kalampiho ajuipon, kamitmu-a thildih abolpon, kachondan kisunho le kathutanho anitpon ahi.

³⁴Ipi hitaleh gam pumpi vang akhutna konin lahpeh ponge; ahinla kathupeh ho le kachondan kisunho nitpa, kalhendohsa kasoh David jal-in, ahinlaisen leng khatnin pansah nange.

³⁵Amavang lenggamhi achapa khutna kona kalah-a, phung somho chu nangma kapeh ding nahi.

³⁶Chule kamin koina dinga kalhentum khopi Jerusalem, kasoh David'in kamasanga a-imatih chana vah aneitheina dinga, namkhat chu achapa kapeh ding ahi.

³⁷Nangma tungdoh-ing kating, nalunggot bangtah-a vai nahom ding, Israel chunga lenga napanding ahi.

³⁸Chule hitiding ahin, kathupeh jouse nanitna, kalampiho najotna, kasoh David banga kachondan kisunhole kathupeh ho nanitna, kamitmu-a adih chu nabola ahile; chutichun nakoma umjinging ting, David dinga kasahpeh banga nangma jong insung dettah kasahdohpeh ding, chule Israelte hi kapeh ding nahi.

³⁹Chule hiche jeh-a hi David chilhahte kabol genthei ding ahin, ahinla tonsotna ding ahipoi.

⁴⁰Hijeh chun Solomon'in Jeroboam thadingin aholtan ahi. Chuin Jeroboam akipat doh-in, Egypt gama Egypt lengpa Shishak henga ajamlutnin, Solomon thi kahsen Egypt'a aumtai.

⁴¹Tun Solomon thilbol dangho jouse, anatohho jouse, chule achih naho chu, Solomon thilbolho kijihna lekhabua kisun hilouham?

⁴²Chule Jerusalem'a Israel pumpi chunga Solomon analengchan sungchu, kum somli anahi.

⁴³Chuin Solomon chu apu apate toh alumkhomin, chule apa David khopi-ah akivuitai. Chule Rehoboam achapa chu akhelin alengchang tan ahi.