Read Thado Chin 1 Lengte 12 Bible Online

1 Lengte 12 - Thado Chin bible

1 Lengte 12

¹Chuin Rehoboam Shechem'a achen ahi: ajehchu Israelte jouse ama lengchansah dinga Shechem'a hunga ahiuve.

²Chuin ahitin ahi, Egypt gama umnalai Nebat chapa Jeroboam'in hichu ahinjatan, (ajehchu ama Solomon lengpa-a kona jam-a ahin, chule Jeroboam Egypt gama chenga ahi;)

³Hitichun amahon ama agakousah taovin ahi. Chuin Jeroboam le Israel mipi ho jouse chu ahungun, Rehoboam henga thu aseijun, hitin aseijuve,

⁴Napan kanamkol jonu agihsah behseh-in, hijeh chun tun napa kinbol hahsatahle kachunguva angap anamkoljon gihchu jansah-in, chutile nangma kin bolnao vinge, atiuve.

⁵Chuin aman ajah uva, nithum sunga din kikhin kang tadiuvin, chuteng kahenga hungkitnun, ati. Chuin mipi chu akikhin kangtaove.

⁶Chuin Rehoboam lengpan apa Solomon hinlaija ahenga dingjing upaho chu akihoulim pin, hiche miho kadonbut theina ding thu iti neipeh diuham? tin adongin ahi.

⁷Chuin amahon ajah-a, tunia hiteho soh-a napana, najenna, amaho nadonbutna, chule thungei tah naseipeh-a ahile; amaho a-itih-a nasoh hijingdiu ahitai, atiuve.

⁸Ahinla aman tehse hon apeh-u thumop ho chu anot thapmin, amatoh khandohtha-a, amasanga dingjing khangdongho chu adong jotan;

⁹Chuin aman ajah uvah, kahenga, napan kachunguva angap namkoljon hi jansah-in, tia seija mipi ho idonbut theina dinguva itobang thumop neipeh dingu ham? ati.

¹⁰Chuin amatoh khandohtha khangdongho chun ajah-a, nahenga, napan kanamkol jonu agihsah behseh-in, nangman vang jansah dommin, tia seiho koma chu hitia hi naseiding ahi; kamecha hi kapa taibuh sanga sajo ahi.

¹¹Chule kapan namkol jon gihtah nasepeh-u ahin, keiman nanamkol jonu kasebe ding; kapan khaohola najepmu ahin, keiman vang aipi-a kasuhgim ding nahiuve, atiuve.

¹²Chutichun lengpan nithum nile kahenga hungkitnun tia anateppeh bangchun, anithumnin Jeroboam le mipi jouse chu Rehoboam henga ahung kitnun ahi.

¹³Chuin lengpan mipi ho chu khautah-in adonbutnin, chule tehse hon athumop naochu anot thapmin;

¹⁴Chule khangthah ho thumop dungjui chun, kapan na namkol jonu agihsah ahin, keiman na namkol jonu kabelap ding: kapan khaohola najepmu ahin, kenvang aipiho-a kasuh gimding nahiuve, tin ahenguva aseitan ahi.

¹⁵Ajehchu thilsoh chu Pakaiya kon ahin, Nebat chapa Jeroboam henga Shilon mi Ahijah mangcha-a Pakaiyin anaseisa chu tohdoh theina dinga, lengpan mipi ho thusei chu angaipeh lou ahitai.

¹⁶ Hitichun Israelte jouse chun lengpan athu angaipeh lou amu phatnun, mipi chun lengpa adonbutnun, eihon David'a ipi chan ineijum? chule Jesse chapa-a jong gouloding inei pouve. Vo Israelte, napon in cheh kijotnun; vo David, tun nangmatah in kivetan, atiuve. Hitichun Israel ten apon in cheh akijot taove.

¹⁷Ahinala Judah khopiho-a cheng Israel chate chunga vang Rehoboam'in lengvai apotai.

¹⁸Chujouvin Rehoboam lengpan kaidong vaipo Adoram chu asolin ahile; Israelte jousen songin anasepmun, athitai. Hijeh chun Rehoboam lengpa Jerusalem'a jamdin akangtalaija kinotah-in akaldoh-in ahi.

¹⁹Hitichun Israel'in tunigei hin David insungmite adouvin ahi.

²⁰Chuin ahitin ahi, Israelte jousen Jeroboam ahungkit ahet phatnun, mipi kikhomho hengadin akou asolun, Israelte jouse chunga dingin lengin atungtaove. Judah phung tailou David insung nungjuija khatcha aumpouve.

²¹Chuin Rehobaom Jerusalem'a ahungphatnin, Israel insung kisatpi dingle, lenggam chu Solomon chapa Rehoboam dinga lelahkit dingin, Judah insung jousele Benjamin phunga gal hat hangsan cheh mi sangsom le sangget hel akhomin ahi.

²²Ahinla Pathen mi Shemaiah henga Pathen thu ahung lhungin, aseije,

²³Judah lengpa Solomon chapa Rehobaom hengle, Judah le Benjamin insung mijouse, chule mipi amoho henga chun seijin,

²⁴Pakaiyin hitihin aseije; nangho nachetou loudiu, nasopiu Israel chate chu nasat louheldiu ahi; amitakip a-incheh-a kileuhen, ajehchu hiche thil hi keijakon ahi. Amahon Pakai thuchu angaijun, Pakai thu dungjuijin akileuvin akikhen taove.

²⁵Chuin Jeroboam'in Ephraim molsanga chun Shechem kho asemin, hia chun achengin; chua konin achedoh-in, Penuel kho asemin ahi.

²⁶Chuin Jeroboam'in alungsunga, tun lenggam chu David insung mite henga kilekit khaget nunte;

²⁷Hiche mitehi Jerusalem'a Pakai in'a ganlhaina bola acheuva ahile, chuteng hiche mite lungthimhi a-pakai pao, Judah lengpa Rehoboam lama kiheijintin, chutengle keima eitha uva, Judah leng Rehoboam lama chekit diu ahi, ati.

²⁸Chuti chun lengpan mi aki thumop sah-in, sana bongnou lim ni asemin, ajah uva, nanghodin Jerusalem kaltou ahahsa behseh-e; vo Israel mite, veuvin, Egypt gama kona nahin puidoh uva na-pathen'u hi, ati.

²⁹Chuin khat Bethel'a akoijin, khatchu Dan'a akoijin ahi.

³⁰Ahin hiche thilhi chonset ahunghitai; ajehchu mipichu khatjoh chu houdingin Bethel'a acheuvin, khatjopa houdingin Dan'a ache jiuvin ahi.

³¹Chule aman munsanga in asan, Levi chapate hilou, jalhang lah-a minoinungpen hochu thempun apansah-in ahi.

³² Chuin Jeroboam'in Judah gama kut bangin, lhagetna-a chuche nisomle ninga ni chu kut nikho din asudetnin, maicham chunga chun atoh doh-in ahi. Chutichun Bethel'a jong abolin, asem bongnou henga chun ganlhaina abolin ahi. Chutichun aman munsang asem ho-a thempuho chu Bethel'a akoijin ahi.

³³Chutichun aman alungdei bangtah-a agot, lhagetna nisomle ninga ni chun, Bethel'a amaicham asemin ahi. Chule Israel chate dingin kut asudetnin, chule maicham chunga chun thilto atoh-in, gimnamtui ahalin ahi.