Read Thado Chin 1 Lengte 13 Bible Online

1 Lengte 13 - Thado Chin bible

1 Lengte 13

¹Chule veuvin Pathen mikhat Juda gama konin Pakai thusah-in Bethel'a ahungin, Jeroboam chu maicham pangah gimnamtui haldin anadinge.

² Chuin Pakai thun maicham douna asap khumin, vo maicham, maicham Pakaiyin hitin aseije; vetan David insunga chapa khat, amin Josiah kiti hungpeng ding; nachunga gimnamtui haljia munsanga thempuho nachunga atodoh ding, mihem guho chu nachunga kihalding ahi, ati.

³Chule hiche nikho mama chun melchihna apen, hichehi Pakaiyin asei melchihna chu ahi; vetan maicham hi khikeh intin, achunga um vutvamhohi kisung lhading ahi, ati.

⁴Chuin ahitin ahi, Pathen mipa thusei, Bethel'a maicham douna-a athusei chu leng Jeroboam'in ajah phatnin, man-uvin, tin akhut maichama konin ahinlhangin ahi. Ahin amapa heng lama ahinlhandoh akhutchu agoheltan, hitichun akhut chu aleloi theitapon ahi.

⁵Pathen mipan Pakai thua melchihna asei bangchun, maicham jongchu akhikeh-in, meivamho chu maichama konin akisung lhatai.

⁶Chuin lengpa chun adonbutnin Pathen mipa jah-achun, kakhut hi ahungdamkit theina din Pakai na Pathen maikoh-a neitao peh-in, ati. Chuin Pathen mipa chu Pakai henga ataovin ahile, lengpa khutchu adamkit tan, atila toh ahungbang kit tai.

⁷Chuin lengpan Pathen mipa jah-a chun, keimatoh in lama hungin lang, hungkichol don, chule keiman kipaman napenge, ati.

⁸Chuin Pathen mipa chun lengpa jah-a, na in kehkhat neipehding hijongle nangma toh lhonin hung pongting, hikoma jonghin anneh twidon himhim jong bolponge.

⁹Ajehchu changlhah nehih-in, twi himhim jong donhih-in, chule nahung nalam mama-a jong kilekit hih-in, tia Pakai thua thupehsa kahi, ati.

¹⁰Chuti chun lamchoma achen, Bethel jona ahungna lampia chun akiletapoi.

¹¹Tun Bethel'a chun themgao tehsepu khat achengin, chuin achapate chu ahungun, chuchenia Bethel'a Pathen mipa thilbol jouse chu ahilun; lengpa henga athuseiho jong chu apau ahilun ahi.

¹²Chuin apauvin ajah uvah, hoilama che am? ati. Ajehchu Juda gama kona hung Pathen mipa chena lampia chu achapaten anamu-u ahi.

¹³Chuin aman achapate jah-a, sangan neigon peh-un, ati. Hitichun amahon sangan agonpeh-un, achunga chun atoutan,

¹⁴Pathen mipa nunga chu achele gangpi phung noija atou agamun ahi. Chuin aman ajah-a, nangma Juda gama kona hung Pathen mipa chu nahim? ati. Chuin aman kahi, ati.

¹⁵Chuin aman ajah-a, keitoh in'a chehitin an hungnen, ati.

¹⁶Chuin aman, keima nangtoh kilethei pongting, nangto jong na-in lutthei ponge; hiche mun'a hin nangtoh anneh twidon himhim bolponge;

¹⁷Ajehchu kajah-a Pakai thuchun, hikoma chu an naneh-a, twi nadon louhel ding; nahungna lampia jong nakilekit louhel ding ahi, ati.

¹⁸Chuin aman ajah-a, keijong nang bang bang themgao khat kahin, chule Pakai thun vantil khatnin kajah-a, aman an aneh-a, twi adonthei nadin na in'a hinlepuitan eiti, ati. Ahin aman ajou asei ahibouve.

¹⁹Hitichun ama amapa chutoh anungchen, a-in'a an anen, twi adontan ahi.

²⁰Chuin ahitin ahi, amani dokhang phunga agatou lhona ahile, ama lepui themgaopa henga chun Pakai thu chu ahung lhungin;

²¹Juda gama kon Pathen mipa jah-a chun ahin samdoh-in, Pakaiyin hitin aseije, Pakai kamsung thu ngailouva, Pakai na Pathen'in nathupeh nanitda-a,

²²Nahung nung hunga, Pakaiyin nahenga an nehih-in, chule twi jong donhih-in atinamuna, an naneh-a, twi nadon jeh-in; nalonghi napu napate lhan hunglhung louhel ding ahi, atin ahi.

²³Chuin ahitin ahi, aman an aneh jouva, twi adonjou phatnin, themgao ahin lepuipa chunn sangan agonpeh-in ahi.

²⁴Chuin ama achephatnin, keipi bahkai khatnin lampia ana kimaito pin, athat tai. Chule along chu lamdunga selhah-in aumin, sangan chu akoma adingin, keipi bahkai jongchu thilong koma chun adinge.

²⁵Chuin veuvin, mihon ahin jotpaovin, chule lamdunga along kiseplha-a, keipi bahkai thilong koma adinchu amuvin ahi. Chuin amaho ahungun themgao tehsepu chenna khopi-a agasei taovin ahi.

²⁶Chuin lampia kona galepui themgao chun ajah phatnin, Pathen mi, Pakai thusei ngailoupa chu ahije; hijeh-a chu Pakaiyin ahenga asei athu bangtah-a, Pakaiyin keipi bahkai apeh doh-a, keipi bahkaijin amaltela atha ahi, ati.

²⁷Chuin aman achapate jah-a, sangan neigotpeh un, ati. Chuin amahon agotpeh taove.

²⁸Chuin ama achen ahile along lampia kiseplha chu agamun, chule sangan le keipi bahkai akoma adinlhon chu amun ahi. Keipi bahkai chun thilong chu anepon, sangan jongchu abot telpon ahi.

²⁹Chuin themgao chun Pathen mipa long chu adomin, sangan chunga akoijin, ahinlepoh tai. Chule themgao tehsepu chu lunghem dingle avuidin khopi-a chun ahunge.

³⁰Chuin aman thilong chu amatah lhanna alupsah-in; ohe, kasopipa! tin achunga alunghem uvin ahi.

³¹Chuin ahitin ahi, ama avuijou phatnin achapate jah-a, keima kathiteng Pathen mipa kivuina lhan nahin neihin vuijun lang, ama gu koma kagu hinkoijun, ati.

³²Ajehchu Bethel maicham chungle Samaria khopi-a um munsanga in jouse douna-a Pakai thua anaseidohho chu hung guilhung teiding ahi, ati.

³³Hicheng thilsoh nung jonghin Jeroboam setna lampia konin akilehei dehpon, ahinla minoinung dehho chu munsang ho thempun asemin; anomchan aman asuthengin, amatah munsang ho thempu khatnin apangin ahi.

³⁴Hiche thilhohi Jeroboam insung dinga chonsetna, kisuhgamna, chule leisetna kona suhmang helna ahung hitai.