Read Thado Chin 1 Lengte 14 Bible Online

1 Lengte 14 - Thado Chin bible

1 Lengte 14

¹Hiche laichun Jeroboam chapa Abijah adampon ahi.

²Chuin Jerobaom'in ajinu jah-a, nahenga katao ahi, kipat in lang Jerobaom jinu ahi ti ahetlouna diuvin na-umdan khelin lang, Shiloh'a gache temin; ven, hia chun Ahijah themgao, hiche miho chunga lenga kahungpan ding kachung chang thuseipa chu aume, ati.

³Chule changlhah somle changlhah lum neocha cha, chule khoiju haikhat kenginlang ahenga gachen; aman chapang umdan ding nahinhil teiding ahi, ati.

⁴Chuin Jeroboam jinun chutichun abolin, akipatnin, Shiloh'a achen, Ahijah in'a ahungtai. Ahin Ahijah chun atehjeh-in kho amutheipoi.

⁵Chuin Pakaiyin Ahijah henga, ven, Jeroboam jinu nahenga achapa dinga thilkhat thumdingin ahunge, ajehchu ama adamlou ahi. Chule hitiding ahi, amanu ahunglut tengle, numei dangho bangtah-a hung umding ahi.

⁶Chuin ahitin ahi, Ahijah'in amanu kotphung ahunggeija akhodap gin ajah phatnin, amanu jah-a, nangma Jerobaom jinu hunglutnin; ibolla midang kihisah-a nahim? ajehchu keima thuhil phaloutah hildinga nahenga eikisola ahi.

⁷Chen, Jeroboam jah-a gaseipeh-in, Pakai Israelte Pathen'in hitin ati, ajehchu mipi ho lah-a kona kachoisanga, kami Israelte chunga vaipo-a kapansah-a,

⁸Chule David insunga kona alenggam kalhe khena, nang kapeh nahin; ahivangin nangma kathupeh ho nitna, chule kamitmu-a adih jeng bolna dingin alungthim pumpi-a eijuija, kasoh David bangin na-umpon;

⁹Ahivangin nangman keima lunghansah nadingin, namasanga mijouse sangin thilse nabol dehsetne; ajehchu nachen Pathen danghole milim kilhajol nakisemin, nanung lama neipaitai.

¹⁰ Hijeh chun vetan, keiman Jeroboam insung chunga thilse kalhunsah ding, chule Jeroboam'a kona pasal tapou akihen hihen, ongthol hijongle, Israel gamsunga kona kasuhmang ding; chule Jeroboam insungmi ahingdoh amoh chengse chu, min eh abeikahse atheh banga katheh ngim ding ahi.

¹¹Jerobaom insungmi khopi sunga thitapou chu ui jin aneh ding, gama thitapou chungleng vachaten anehdiu ahi; ajehchu hichu Pakai seisa ahitai.

¹²Hijeh chun kipat in, na inlama chetan; khopi sunga nakho nalhah lutlutleh chapang chu thiding ahi.

¹³Chutia chu Israel jousen apul adouvuva, avuidiu ahi. Ajehchu Jeroboam insung mi amabou lhana kivui hiding ahi, ajehchu Jeroboam insunga amabouhin Israelte Pakai Pathen lama phatna themkhat aneijin ahi.

¹⁴Chukal vala Pakaiyin Jeroboam insung sumang dinga Israel chunga lengkhat atundoh ding; tujenga jong, ahile itiding hitam?

¹⁵Ajehchu Pakaiyin twilah-a peng kilingling banga Israel ajepding, chule Pakai lunghansah nadinga milim akisemthu jeh uva, aman Israel chu apu apateu anapeh hiche gam phatah-a kona hi abodoh-a, chule vadunglen gala athecheh ding ahi.

¹⁶Jeroboam chonset naho jehle chonset anabola Israel achonsetsah jeh-a, aman Israel apaidoh ding ahi.

¹⁷Chuin Jeroboam jinu akipat doh-in, apotnin, Tirzah ahunglhung tai. Chuin kotbul kempum agaphah phah-in chapang chu athitai.

¹⁸Chuin amahon avuitaovin; Pakaiyin asoh Ahijah themgao henga anasei, Pakai thu dungjui chun avuijun, Israelte jousen apul adoutaove.

¹⁹Jeroboam thilbol adang jouse, gal iti asatna, lengvai iti apoh thuho chu, veuvin, Israel lengte thusimbua hihochu akisunin ahi.

²⁰Jeroboam lengchan nikhoho chu kum somni le kumni ahi. Chuin ama apu apate toh alumkhomin, achapa Nadab chu ama khelin alengchang tai.

²¹Chuin Solomon chapa Rehoboam Judah gama aleng changin ahi. Rehoboam ahung lengchan patchun kum somli le kumkhat ahitan, Pakaiyin amin umna dinga Israel phung jouse lah-a kona analhentum khopi Jerusalem'a chun kum somle kumsagi aleng changin ahi. Anu minchu Naamah ahin, Ammon mi ahi.

²²Chule Judah te chun Pakai mitmun thilse abolun, apu apateu jouse sanga chungnung-jo-a chonset abolnaova chun, Pakai chu thangsetna dingin achoh thouvun ahi.

²³ Ajehchu amahon munsang jouse, chule thinghing phungnoi tinna munsang ho, milimho, khomho, chule thinga kisem milim atungdoh-un ahi.

²⁴ Chule gamsunga chun Sodom mijong aumun; Israel chate masanga Pakaiyin anapaidohsa thet umtah namho bolbangchu anabolun ahi.

²⁵Chuin Rehoboam lengchan kum ngana-a chun ahitin ahi, Egypt lengpa Shishak chu Jerusalem doudin ahung touvin,

²⁶ Chule Pakai in'a gouho le lengpa in'a gouho chu alan, abonchan apomangin; Solomon'in anasem sana lumdal ho chu abonchan apomangtai.

²⁷Chuin Rehoboam lengpan hicheho khelchun sum-eng in lumdal asemin, hicheho chu lengpa kot ngah-a pang, ngahtup pipui khutna apedoh-in ahi.

²⁸Chule hitihi anahi, lengpa chu Pakai in'a achetengle, ngahtup pachun hicheho chu ahinkengjin, chujou tengle ngahtup indan sunga alekoi kitjin ahi.

²⁹Tun Rehoboam thilbol danghole anatoh jouse chu, Judah lengho thusimbu ho-a kisun soh hel hilouham?

³⁰Chule Rehoboam le Jeroboam kah-a chun ahinkho lhumkei lhonin kidouna aumjinge.

³¹Chuin Rehoboam chu apu apate toh alumkhomin, apu apateu toh David khopi-a avuitha taove. Chule anu minchu Naamah ahin, Ammon numei ahi. Chuin achapa Abijam akhelin alengchang tai.