Read Thado Chin 1 Lengte 15 Bible Online

1 Lengte 15 - Thado Chin bible

1 Lengte 15

¹Tun Nebat chapa Jeroboam lengchan kum somle kumget na-in, Judah gam chunga Abijam aleng changin ahi.

²Ama Jerusalem'a kumthum alengchange. Chule anumin chu Maachah ahin, Abishalom chanu ahi.

³Chule apan masanga anabol chonsetna jouse-a chun achonin; alungthim chu apa David lungthim bangin Pakai a-Pathen'a apha chamkimpon ahi.

⁴ Hijeng jongle David khohsahna jal-in Pakai a-Pathen'in ama nunga achapa tundoh nadingle, Jerusalem phudoh nadingin, Jerusalem'a meivah khat anapen ahi.

⁵ Ajehchu Hit mi Uriah chungchang tilouvin, David'in Pakai mitmun thildih jeng anabolin, ahin laisen athupeh khatcha-a konin akihei mangpon ahi.

⁶Chule Rehoboam chu Jeroboam toh ahin laisen akidou jing lhonin ahi.

⁷Tun Abijam thilbol danghole anatohho Judah lengho thusimbu ho-a kisun soh hel louham? Chule Abijam le Jereboam kah-a chun kidouna anaumin ahi.

⁸Chuin Abijam chu apu apate toh alumkhomin, David khopi-a avuitaove. Chule achapa Asa chu ama khelin alengchang tai.

⁹Chuin Israel lengpa Jeroboam lengchan kum somni na in Juda gamsunga Asa aleng changin ahi.

¹⁰Chule ama Jerusalem'a kum somli le kumkhat alengchange. Anu minchu Maachah ahin, Abishalom chanu ahi.

¹¹Chule Asa chun apa David'in anabol bangin, Pakai mitmun adih chu abolin ahi.

¹²Chuin aman gamsunga jonthanhoi bolhochu anodoh-in, chule apatehon anasem milim jouse asumang soh-in ahi.

¹³Chule anu Maachah, apena anu jengjong Asherah lim anasemjeh-in lengnu ahina ahaisah-in; Asa'in amanu milim chu asumangin, Kidron vapanga ahalvamin ahi.

¹⁴Ahinla munsang ho vang asumangpon, ahijeng vangin Asa lungthim chu ahinlai chansen Pakai lama achamkimin ahi.

¹⁵Chule apan asuhthengsa thilhole, amatah-in apeh thengsaho dangka le sana kong leh bel hochu, Pakai in'a apolutnin ahi.

¹⁶Chule Asa le Israelte leng Baasha kikah-a ahinkho lhungkei lhonin kidou kinahna aumjinge.

¹⁷Chuin Israel lengpa Baasha chu Judah doudin achetouvin, Judah te lengpa Asa henga dinga koima alut le apot aumlouna dingin, Ramah kho asadoh-in ahi.

¹⁸Chuphatnin Asa'in Pakai in'a anakidalhaho le lengpa in'a gouho, dangka le sana jouse chu alan asohte khutna apetai. Chuin lengpa Asa chun Damascus kho-a cheng Syria lengpa, Hezion chapa, Tabrimon chapa Benhadad henga chun aseijin,

¹⁹Keima le nangma kikah, kapale napa kikah-a kinoptona aumin, ven, keiman nangma dangka le sana kipaman thilpeh kahinthotne; hungin lang, keija kona apotdoh nadingin, Israel lengpa Baasha toh nakinoptona hungsu keh-in, ati.

²⁰Chuin Benhadad'in Asa lengpa thu angaijin, Israel khopiho doudingin janel gal lamkaiho asolin, Israel khopiho Ijon, Dan, Abel-beth-maachah, Cinneroth gam pumpi, chule Naptali gamjouse pumin asumangin ahi.

²¹Chuin ahitin ahi, Baasha'n hiche thuchu ajah phatnin, Ramah'a kho asah banchu adalhan, Tirzah'a achengtai.

²²Chujouvin lengpa Asa chun Judah gam pumpi-a thu athejalin, koimacha ahoi doh-a aumpoi. Baasha'in anasah Ramah'a songhole thingho aphedoh-un, chule hicheho chu Asa lengpan Mizpah le Benjamin gama Geba kho sahnan aneijin ahi.

²³Asa thilbol dang jouse, athibol theina jouse, chule anatoh jouse, akhopi sahho chu Judah lengho thusimbu ho-a kisun hilouham? Hijeng jongle ateh lamin akhut akenga natna aneitan ahi.

²⁴Chuin Asa chu apu apate toh alumkhomin, apa David khopi-a apu apate toh avuitaove. Chuin achapa Jehoshaphat'in ama khellin lengvai apotai.

²⁵Chule Jeroboam chapa Nadab chu Judah lengpa Asa lengchan kal kum nina-in Israelte chunga vaipon apangin,Israelte chunga kumni alengchange.

²⁶Chule Pakai mitmun thilphalou abolin, apa lampia achen, achonsetna-a chun Israelte achonsetsah-e.

²⁷Chuin Issachar insung mi lah-a Ahijah chapa Baasha chun ama dounan thilphalou agongin, Philistine ho gam Gibbethon'ah Baasha'n amachu athat tai. Ajehchu Nadab le Israelte jousen Gibbethon aumkol petnu ahi.

²⁸Judah leng Asa kumthum channa'in Baasha'n Nadab chu athatnin, amakhelin alengchang tai.

²⁹ Chuin ahitin ahi, ama alengchan phatnin Jeroboam insung pumpi athatnin; Shilon mi asoh Ahijah henga Pakai thusei dungjuijin, asuh manghel kahsen Jeroboam'a dingin ahingthei khatcha akhenpeh poi.

³⁰Jeroboam'in anabol chonset naho jehle, Israel achonsetsah jeh, chule Israel Pakai Pathen chu asuh lunghang jeh ahi.

³¹Tun Nadab thilbol danghole atoh jouse chu Israel lengte thusimbua kisun hilouham?

³²Asale Israel leng Baasha kah-a ahinkho pumpi lhonin kigalna anaum jingin ahi.

³³Judah leng Asa lengchan kal kumthum lhina-in, Ahijah chapa Baasha chu Tirzah'a kum somni le kumli Israelte chunga aleng changin ahi.

³⁴Chule aman Pakai mitmun thilse anabolin, Jeroboam lampia chun anachen, aman achonsetna-a chun Israelte achonsetsah-in ahi.