Read Thado Chin 1 Lengte 16 Bible Online

1 Lengte 16 - Thado Chin bible

1 Lengte 16

¹Chujouvin Pakai thuchu Baasha dounan, Hanani chapa Jehu henga ahungin, hitin aseije.

²Leivuija kona nangma kachoi sanga, kami Israelte chunga vaipo-a kapansah; chule Jeroboam lamlhah najuija, achonset naova eilung hansah nadinguva, kami Israelte nachonset sah dungjuijin;

³Vetan, keiman Baasha phattheina le a-insung phattheina kasuhmanga, chule Nebat chapa Jeroboam insung banga kasemding ahi.

⁴Baasha mi khopi sunga thia chu uichan aneh-a, loujaova thipa chu chungleng vachahon anehdiu ahi.

⁵Tun Baasha thilbol danghole, ipi abol, chule athahatna chu Israel lengte thusimbu ho-a kisunlut hilou ham?

⁶Hitichun Baasha apu apate toh alumkhomin, Tirzah'a avuitaove. Chuin achapa Elah akhelin alengchang tai.

⁷Jeroboam insung tobanga Pakai mitmu-a thilsetah abola, akhutsoh-a Pakai achunga alunghansah jeh, chule amachu atha jeh-in; Hanani chapa Jehu themgaova konin Pakai thuchu, Baasha le a-insung dounan ahung lhungtan ahi.

⁸Judah lengpa Asa lengchan kal kum somni le kumgup lhinna-in, Baasha chapa Elah chu Tirzah'a Israelte chunga alengchang panin, kumni alengchange.

⁹Chuin akangtalai kehkhat chunga vaipopa, asohpa Zimri chun ama dounan thil agongin; ama Tirzah'a um ahito lhonin, Tirzah'a a-insung gouchingpa Arza in'a chun ju adonkhamin ahi.

¹⁰Chuin Zimri chu agalutnin avon, athatnin, akhelin alengchang tan ahi. Hichu Judah leng Asa alengchan kal kum somni le kumsagi lhinkum ahi.

¹¹Chuin ahitin ahi, Ama ahung lengchan patna, alaltouna chunga atou touchun, Baasha insungmi jouse athatnin; a-insungmi chule agol apaite chapaho pasal tapouchu khatcha khen neilouvin asumangin ahi.

¹²Hitichun Jehu themgaova kona Baasha chungchanga Pakai thusei dungjuijin, Zimri'in Baasha insung mijouse chu athat gamheltai.

¹³Ajehchu apannabei houva Israel Pakai Pathen alunghansah uva, Baasha chonset naho jousele achapa Elah chonset naho jouse, hiche achonsetna ho-a chu Israelte achonset sah-u anahi.

¹⁴Tun Elah thilbol danghole anatoh jouse Israel lengte thusimbua kisunna hilouham?

¹⁵Judah lengpa Asa lengchan kal kum somni le kum sagi lhinkum chun, Zimri chu Tirzah'a nisagi aleng changin ahi. Chuin mipi chun Philistine gama um Gibbethon dounan gebuh asongun ahi.

¹⁶Chuin gebuh songho mipi chun, Zimri'in thilphalou agongin lengpa jong atha ahitai, tia kisei aja taovin; hijeh chun Israelte jouse chun janel gallamkai Omri chu Israelte chunga chun alengchansah taove.

¹⁷Chuin Omri le Israelte jouse chu Gibbethon'a konin achetouvun, Tirzah chu aumkimvel taove.

¹⁸Chuin ahitin ahi, Zimri chun khopi chu akilatai ti ahet phatnin, leng inpi sunga alutnin, leng inpi akihal khumin, athitai.

¹⁹Ajehchu Pakai mitmu-a thilsetah abola achonsetnaho jehle, Jeroboam lamlhahho ajotna, achonsetna-a Israel chate achonsetsah jeh ahi.

²⁰Tun Zimri thilbol danghole ami philguhna thuho chu Israel lengte thusimbu ho-a kisunlut hilouham?

²¹Chujouvin Israel mipi chu hopni in akihom khenun; mipi akeh khatnin Ginath chapa Tibni ajuijun, akeh khatnin Omri ajuitaove.

²²Ahivangin Omri jui mipi ho chun Ginath chapa Tibni juiho chu ajoujovin; hitichun Tibni athin Omri alengchang tai.

²³Judah lengpa Asa lengchan kal kum somthumle kumkhat alhinin, Israelte chunga Omri kum somle kumni alengchang pannin; Tirzah'a kumgup alengchange.

²⁴Chuin aman Samaria lhang chu Shemer'a konin dangka talent ni in achon, lhang chunga chun khopi asemin, akhopi sem minchu lhang neipa Shemer min dungjuijin Samaria asahtai.

²⁵Ahinla Omri chun Pakai mitmun chonset abolin, ama masanga ho jouse sanga sejocheh-in abolin ahi.

²⁶Ajehchu aman Nebat chapa Jeroboam lamlhah ajuijin, chule achonsetna-a chun Israel achonsetsah-in, apannabei houva Israel Pakai Pathen alunghan sah-un ahi.

²⁷Tun Omri natohdoh athilbol dangho le athilbol theina atahlangho chu Israel lengte thusimbua kisun hilouham?

²⁸Hitichun Omri chu apu apate toh alumkhomin, Samaria'a akivuitai. Chuin achapa Ahab ama khelin alengchang tai.

²⁹Judah lengpa Asa lengchan kal kum somthumle kumget alhinin, Israelte chunga Omri chapa Ahab alengchang panin; Omri chapa Ahab chun Israelte chunga Samaria'a kum somni le kumni alengchange.

³⁰Chule Omri chapa Ahab chun Pakai mitmun ama masanga ho jouse sangin thilse abolin ahi.

³¹Chuin ahitin ahi, Nebat chapa Jeroboam chonsetna juichu amadingin ima hilou bangtah-in, Zidon mite lengpa Ethbaal chanu Jezebel akichenpin; Baal agajenin, ahoutan ahi.

³²Chule Samaria gama Baal dinga in asahna-a chun, Baal ding maicham khat aseme.

³³Chuin Ahab chun thingin milim asemin; ama masanga Israel lengho jouse sangin Ahab chun Pakai Israelte Pathen lunghana abol betan ahi.

³⁴ Ama nikho laichun Bethel'a Hiel chun Jericho khopi chu anasan ahi. Nun chapa Joshua'a kona Pakaiyin anaseidoh bangin; a-inbul agon patnin achapa lenpen Abiram hinkho achanlon, akotpiho atungdoh-in achapa lhumpen Segub achanin ahi.