Read Thado Chin 1 Lengte 17 Bible Online

1 Lengte 17 - Thado Chin bible

1 Lengte 17

¹ Chuin Gilead gama cheng Tishbi mi Elijah'in Ahab henga, A-anga kadinjing Pakai Israel Pathen hingjing mina kasei ahi, kum ijat-ham kathulouva daitwi le gotwi long louhel ding ahi, ati.

²Chuin Pakai thuchu ahenga ahung lhungin,

³Hia konin kipat inlang solam sanga kiheijin; Jordan masanga um Cherith vachadunga gakiselin.

⁴Chule hitiding ahi, nangman vachadung chu nadon ding; chukoma chu nangma vah dinga va-ah ho thu kapehsa ahitai, ati.

⁵Hitichun ama achen Pakai thudungjui chun aboltai; ajehchu ama achen Jordan masanga um Cherith vachadung panga agachengtai.

⁶Chuin va-ah ten jingkahle changlhah leh sa, chule nilhahle changlhah leh sa ama ahin pohpeh jiuvin; vachadung twi chu adonin ahi.

⁷Chuin chomkhat jouvin ahitin ahi, gamsunga go ajuh louhel phatnin, vachadung chu akangtan ahi.

⁸Chuin Pakai thuchu ahenga ahung lhungin,

⁹ Kipat in, Zidon gama Zarephat'a chenlang hiche munachun gachengin; vetan, keiman nangma nanavah dingin meithai khat thu kapetai, ati.

¹⁰Hitichun ama akipatnin Zarephat'a achetai. Chuin ama khopi lutna kotpi ahunglhun phatnin, veuvin, meithainu chu chua anaumin, thingkang anachome. Chule aman amanu chu akouvin, ajah-a, kadon ding bela twi themkhat neipen tia nahenga katao ahi, ati.

¹¹Chuin amanu twidom dinga achen ahile, amanu chu akouvin, kangeh nahi, changlhah kamkhat nakhutna neihin choipeh than, ati.

¹²Chuin amanun, Pakai na Pathen hingjing mina kasei ahi, changlhah kaneipon, ahin bel'a changbong khutdim khat le thao theija thao themcha vang aume; chule ven, kagalutna keima le kachapa dinga kasemtheina dinga thingkang ni kachom ahin, hitia chu kaneh lhona kathi lhonding ahitai, ati.

¹³Chuin Elijah'in amanu jah-a, kicha hih-in, nasei bangchun gaboltan; ahin hichea konchun keima-a ding changlhah neocha hinsem masan lang, kahenga hinchoijin; chujoule nangle nachapa ding semin.

¹⁴Ajehchu Israel Pakai Pathen'in hitin aseije, Pakaiyin leichunga go ahinjuhsah nikho kahse-a, bel'a changbong chu kemlou ding, thao thei jong kanglouhel ding ahi, ati.

¹⁵Chuin amanun Elijah thusei bangchun agaboltan; amanule amapa chule a-insung miten nitamtah aneuvin ahi.

¹⁶Chuin Pakaiyin Elijah'a kona asei dungjuijin, bubel chu akempon, thao umjong chu akangpon ahi.

¹⁷Chuin hicheho jouchun ahung hitin ahi, numei inneinu chapa chu ahung natan; anat chu alel lheh jengin ahile ama a chun haina hu aumtapoi.

¹⁸Chuin amanun Elijah henga, vo nangma Pathen mipa, nangma i-kalo ding nahim? Ka chonsetna geldohsah dingle kachapa thatdinga hunga nahim? ati.

¹⁹Chuin aman amanu jah-a, nachapa chu neipen, ati. Chuin anun a-angsunga apomna-a konin aladoh-in, ama umna chung dana chun apomtouvin, ajalkhuna alupsah-in ahi.

²⁰Chuin aman Pakai chu asamin, vo Pakai ka Pathen, kakholjina meithainu chunga jonghi, achapa thapeh-a kona thilse nahin lhunsah hija hitam? ati.

²¹ Chuin chapang chunga chun thumvei akijah-in, Pakai chu akouvin, vo Pakai ka Pathen, kangeh nahi, hiche chapangpa hinna hi ama-ah hinkilesah kitnin, ati.

²²Chuin Pakaiyin Elijah aw chu angaipeh-in; chapangpa hinna chu ama-a ahungkile kitnin, ahaldoh tai.

²³Chuin Elijah'in chapang chu alan, a-indana konin insunga apuisuh-in, anu henga apen ahi. Chule Elijah'in amanu jah-a, ven, nachapa ahingtai, ati.

²⁴Chuin numeinu chun Elijah henga, tun hichea konhin nangma Pathen mikhat nahin, nakamsunga Pakai thuchu adih ahi ti kahetai, ati.