Read Thado Chin 1 Lengte 18 Bible Online

1 Lengte 18 - Thado Chin bible

1 Lengte 18

¹Chuin nikho tamtah jouvin ahitin ahi, Pakai thuchu akum thum na-in Elijah henga ahung lhungin, chen Ahab gakimusah-in, leichunga go kajuh sah ding ahitai, ati.

²Chuin Elijah Ahab kimusah dingin achetan; chule Samaria gama chun kel akhoh lheh-in ahi.

³Chuin Ahab min a-insung vaipopa Obadiah chu akouvin ahi (tun Obadiah hi Pakai gingtah ahi.

⁴Ajehchu hitichun, Jezebel'in Pakai themgaoho athagam laichun, Obadiah'in themgaoho jakhat apuijin, songkoa somnga ngan aselin, chule amaho chu changlhah le twijin avah-in ahi.)

⁵Chuin Ahab'in Obadiah henga, gamsunga twinahho jousele vachadung jouse-a gachen; ganchaho jouse manghel louva ijemtia hampa imuva, sakol ho le sanganho ihuhhing theina dingun, atin ahi.

⁶Hitichun gamsung chu chotsoh nadin amani akihomlhonin, Ahab amatah akipatnin langkhat lama achen, Obadiah amatah akipatnin lamchom lama chun achen ahi.

⁷Chuin Chutia Obadiah lampia achepet chun, veuvin, Elijah'in akimupin; chule amapa chun ahen, amai tolla asulutnin, nangma kapu Elijah nahim? ati.

⁸Aman adonbutnin, kahi; chen, napakai pa jah-a, ven, Elijah hikoma aume, tin gahilin, ati.

⁹Chuin aman, ipi chonsetna kabola nasohhi thadinga Ahab khutna neipeh hitam? ati.

¹⁰Pakai na Pathen ahinjing banga kasei ahi, ka pakaiyin nangma holdinga asol louna mun le gam aum tapoi. Chule ama khu-a aumpoi ati tenguleh; nangma namu lounao thuah lenggam le namchu akihahsel sahjin ahi.

¹¹Chule tun nangman, chen, napakai pa jah-a, ven, Elijah hikoma aume, tin naseije.

¹²Chule hung hitiding ahi, keima nakoma kona kachedoh dohleh, Pakai Lhagaovin kahetlouna gama napuimang tantin; chutia chu kache-a Ahab kaga hila, aman nangma namudeh louteng, eitha ding ahi. Ahin nasoh keiman kakhangdon laijapat Pakai kanagin jing ahi.

¹³Jezebel'in Pakai themgaoho athalaija kathilbol, Pakai themgaoho somnga nga-a mi jakhat songkoa kaselguh-a, changlhah le twija kavah chu ka pakai hi naseipeh louvu hijaham?

¹⁴Tun nangman, chen, napakai pa jah-a, ven, Elijah hikoma aume, tin gaseijin neiti; aman eithatei ding ahi, ati.

¹⁵Chuin Elijah'in, a-anga kadinjing janel Pakai hingjing mina kasei ahi, tunikho-a hi thonlouva kakimusah teiding ahi, ati.

¹⁶Chuin Obadiah Ahab kimupi din achen, amachu ahiltai. Chuin Ahab Elijah kimupi dingin achetai.

¹⁷Chuin ahitin ahi, Ahab'in Elijah amuphatnin ajah-a, nangma Israelte sulungjing pachu nahim? ati.

¹⁸Chuin aman, keiman Israelte kasulung jingpoi; nangma le napa insungmiten Pakai thupeh ho nadalhah uva, Baal nung najuijuva kona nasuh lungjingu ahi bouve.

¹⁹Hijeh chun tun Israelte jouse, Baal themgaoho jali, chule Jezebel dokhanga an nejing Asherah themgao jali chu kahenga Carmel lhanga gakoukhom sah-in, ati.

²⁰Hitichun Ahab'in Israel chate jouse akoukhomin, Carmel lhanga themgaoho chu akou khomin ahi.

²¹Chuin Elijah chu mipi jouse henga chun ahungin, ahenguva, itihchan lunggel ni saikah-a naum jing diuham? Pakai chu Pathen ahile, juijun; ahin Baal joh ahi nati ule, amachu juijun, ati. Ahin mipin chengkhat chanjong adonbut pouve.

²²Chujouvin Elijah'in mipi jah-a, kei, keima bouhi Pakai themgao umnalai kahitan; Baal themgaoho vang mi jali leh somnga aumuve.

²³Hijeh chun amahon bongchal ni eipeuhen; chule amahon bongchal khat kilhen uhen, chen bongselu henlang, thing chunga koijuhen, anoija mei tih hih-u hen. Chule bongchal chomjoh chu ken sem ingting, thing chunga koi jingting anoija mei kati louding ahi.

²⁴Chule nanghon na pathen hou minchu kou unlang, chule keiman Pakai min kakouding; chule meija hindonbut Pathen chu, Pathen hiding ahi, ati. Chuin mipijouse chun adonbutnun, nathusei chu apha lheh-e, atiuve.

²⁵Chuin Elijah'in Baal themgaoho jah-a, nangho dingin bongchal khat kilhenun, chule kisem masatnun; ajehchu nangho natam uve; chule na pathen hou min chu kouvun, anoijavang mei natilou diu ahi, ati.

²⁶Chuin amaho kipe bongchal chu athatnun, asemun, chule jingkah-a pat sunkim geihel Baal minchu akouvun, vo Baal, neihouvun, atiuve. Ahinla awgin ahiloule ahin donbutna khatcha aumpoi. Chuin amaicham semu chunga akichomchom jenguve.

²⁷Chuin sunkimin ahitin ahi, Elijah'in amaho a-eng houvin, hapenun, ajehchu ama pathen ahin; aman thu aseiham, minung ajuiham, kholche ham, ahiloule a-ihmu khat touham hintin, suhkhah ngaiding ahi, ati.

²⁸Chuin hasapmin asamun, achonnau ngaibangin chemchan chule thih hemin aki-atnun, achunguva athiu alonlhah kahsen aki-atnun ahi.

²⁹Chuin ahitin ahi, nilhangkai ahi phatnin, amahon nilhah lam ganlhaina anneh thilto phat geijin gaothu aseijun; hinlah aw khatcha aumpon, chule donbutna khatchala aumpon, koima chanjong ijin asepeh pouvin ahi.

³⁰Chuin Elijah'in mipi jouse jah-a, neihin naijun, ati. Chuin mijouse chu akoma ahung naijun ahi. Chuin Pakai maicham akivochimsa chu asemphan ahi.

³¹ Chuin Elijah'in, namin Israel hiding ahi tia Pakai thu hunglhuna Jacob chapate phungjat dungjuijin, songtum somleni alan ahi.

³²Songho-a chun Pakai minin maichan khat asemin, maicham kimvela chun muchi tena dimni doljou dinga lenin leiko khat alai kimvelin ahi.

³³Aman thingho agol golin akoijin, bongchal chu achenbongin, thingho chunga ajamin; chuin ajah uva, bel li chu twi sungdim munlang, govam ganlhaina le thing chunga chun sungun, ati.

³⁴Chuin aman, aniveinan bolkitnun, ati. Chuin aniveina-in abolkitnuve. Chuin aman athumvei na-in bolkitnun, ati. Chuin amahon athumvei na-in jong abolkit taove.

³⁵Chuin twi chu maicham kimvela alongin, aman leiko jongchu twija adipmin ahi.

³⁶Chuin nilhah lam ganlhai phat ahiphatnin, Elijah themgao ahungnaijin, hitin aseije; Abraham, Isaac chule Israel Pakai Pathen, nangma Israel Pathen nahi-a, chule keima nasoh kahia, chule hiche thiljousehi nangma thua kabol ahi ti tuni hin kihedoh hen, ati.

³⁷Neihin ngaipeh-in, vo Pakai, neihin ngaipeh-in, chutile hiche mipihohin nangma Pakai Pathen nahi-a, chule nangman alungu nalehei ahitai ti ahet dingu ahi, ati.

³⁸Chujouvin Pakai meikong chu ahungleng lhan, govam ganlhai, thingho, songho, leivuiho chu akavamin; chule leiko a twi chu ahulsahtan ahi.

³⁹Chuin mipi jousen hichu amuphatnun, amaiju tolla asulutnun, Pakai, amachu Pathen ahi; Pakai, amachu Pathen ahi, atiuve.

⁴⁰Chuin Elijah'in ajah uvah, Baal themgaoho chu man-un; khatcha hoidoh sah hih-un, ati. Chuin amahochu amanun; Elijah'in Kishon vachadunga apuisuh-in, hiche munachun athatgamtai.

⁴¹Chuin Elijah'in Ahab jah-a, chetouvin, nenlang donin, ajehchu go hajuh-a juhding husa aume, ati.

⁴² Hitichun neding le dondingin Ahab achetoutai. Chuin Elijah chu Carmel lhangvuma akaltouvin, tolla akunchah-in, akhupteni kah-a amai asulutnin ahi.

⁴³Chuin asohpa jah-a, tun chetouvin, twikhanglen lam ven, ati. Chuin ama achetouvin, agahven, imacha aumpoi, ati. Chuin ajah-a, sagivei chekitnin, ati.

⁴⁴Chuin asagivei lhinnan, aman Elijah henga, vetemin, mihem khut tobang twikhanglen'a konin meilhang neocha ahung kitungdoh-e, ati. Chuin aman chetouvin, Ahab jah-a, nakangtalai kigotnin lang, gon nahen lounadin chesuh-in, tin gaseipeh-in, ati.

⁴⁵Chuin chomkah louvin, van chu meilhang le huijin athimletlut jengin, go nasatah in ajutan ahi. Chuin Ahab kangtalai ja atouvin Jezreel lama achetai.

⁴⁶Chule Pakai khut Elijah chunga aumin; aman atai akigah-in, Ahab masanga Jezreel lutna lama alhaitai.