Read Thado Chin 1 Lengte 19 Bible Online

1 Lengte 19 - Thado Chin bible

1 Lengte 19

¹Chuin Ahab'in Elijah thilbol, Baal themgaoho jouse chemjam'a athajedan jouse chu Jezebel ahilin ahi.

²Chuin Jezebel'in Elijah henga thupole asolin, jingle tuphat vela amaho khatpen hinkho banga nahinkho kabol louleh, pathen hon kachunga hitobang chun bolhen, chule akalvalin jong bolu hen ati.

³Chuin hichu amuphatnin, akipatdoh-ni, ahinnadin ajamdoh-in, Judah gama um Beersheba-a ahung lhungin, hikoma chu asohpa chu adalhatai.

⁴ Ahin amatah vang gamthip sunga nikhat lama achen, chuin ahungin juniper thingphung noikhatna atoutai. Chuin athina dingin athumin, tun aphaset tai, vo Pakai, kahinna ladohtan, kapu kapate sangin kaphachom jopoi, ati.

⁵Chuin ama juniper thingphung noija alupma a-imut chun, vetan, vantil khatnin athamin, thouvin, an kineh-in, ati.

⁶Chuin avetle, vetan, mei-am chunga changlhah khatle twi umkhat alu lhuna anaumin ahi. Chuin aman anen adonin, alumkit tai.

⁷Chuin Pakai vantil chu aniveinan ahungkitnin, ahinkhoijin, ajah-a, thouvin lang nen; ajehchu nakholjin nading chu nangma-a dingin asao behsetne, ati.

⁸Chuin ama athouvin, anen adonin, chule hiche an thahat chun Pathen Molsang Horeb lama nisomli le jansomli achen ahi.

⁹Chuin chulama songko khatna alutnin, chua chun agehden tai. Chule vetan, Pakai thu ahenga ahung lhungin, ajah-a, Elijah hikoma ibol nahim? ati.

¹⁰ Chuin aman, keima janelho Pakai Pathen dinga tompan behseh jeng kanahi; ajehchu Israel chaten nakitepna adondauvin, namaicham ho asuchimun, nathemgao ho chemjamin athatnun; kei, keima sehseh bouhi asohcha kahi; chule amahon kahinnahi lahmang dingin aholun ahi, ati.

¹¹Chuin aman, potdoh-in, chule molsang chunga khun Pakai anga gadingin, ati. Chuin veuvin, Pakai ahungin, chule Pakai angsunga chun huipi hattah le nasatah-in molsang ho chu asemkeh-in, songpiho ahal halin asuchipmin; ahin huilah-a chun Pakai aumpoi; chule hui akichai phatnin ling akihotnin; ahin inlinga chun Pakai aumpoi.

¹²Ling kiho jouvin mei akan; ahin meija chun Pakai aumpoi; chuin meikah jouvin aw ngatselin ahung gingin ahi.

¹³Chuin ahitin ahi, Elijah'in hichu ajah phatnin, aponin amai akitomin, apotdoh-in songko lutna-a chun adingtan ahi. Chuin vetan, ahenga awkhat ahung gingin, Elijah hikoma hi ipibol nahim? ati.

¹⁴Chuin aman, keima janelho Pakai Pathen dinga tompan behseh jeng kanahi; ajehchu Israel chaten nakitepna adondauvin, namaicham ho asuchimun, nathemgao ho chemjamin athatnun; kei, keima sehseh bouhi asohcha kahi; chule amahon kahinnahi lahmang dingin aholun ahi, ati.

¹⁵ Chuin Pakaiyin ajah-a, chen Damascus gamthip lama kilen lang, nahung lhunteng Hazael chu Syria chunga leng dinga thao nu-in.

¹⁶ Chule Nimshi chapa Jehu chu Israel chunga lengdinga thao nanuding; chule na indan sunga Abel-meholah khomi Shaphat chapa Elisha chu themgao dinga thao nanuding ahi.

¹⁷Chule hung hitiding ahi, Hazael chemjam'a kona hoidohchan Jehu'n atha ding; Jehu chemjam'a kona hoidohchan Elisha'n athading ahi.

¹⁸ Hijongle Baal anga akhupma bohkhup khaloulai, chule amuh-a ama chopkha louhel Israel gamsunga mi sangsagi kakikhen nalaije, ati.

¹⁹Hitichun hichea konchun apotnin, chule Shaphat chapa Elisha amun, amachun lou anakai jin, ama masanga bongchal tosomleni achen, chule ama somleni chana tochun alhonkhomin ahi; chuin Elijah'in ama agah jotpan, achunga apon agah sekhumin ahi.

²⁰Chuin aman bongchalho chu adalhan, Elijah nunga alhaijin, katao ahi, kanule kapa gachop tading ting, chutengle juinange, ati. Chuin aman ajah-a, kinungle kitnin; ajehchu keiman nangma ipi kabolpeh em? ati.

²¹Chuin ama ama-a konin akinunglen, bongchal tokhat akaijin, athatnin, asa ho chu bong manchah ho-a chun ahonin, miho chu apen, aneovin ahi. Chuin ama akipatdoh-in, Elijah nung ajuijin, ama ajenletai.