Read Thado Chin 1 Lengte 2 Bible Online

1 Lengte 2 - Thado Chin bible

1 Lengte 2

¹Tun David thi nading nikho chu anaitan; aman achapa Solomon chu athupeh-in, ajah-a,

²Keima leiset pumpi chena lampi-a chu cheding kahitai; hijeh chun hatninlang, pasal nahina chu tahlangin.

³Chule Pakai na Pathen thupeh chu nit jingin; Mosi lekhabua kisun bangin alampiho juijin, adan kisunho, adan thupeh ho, athutan lhahho le, ahetthohsahna ho nitjingin; chutile nakihei nalam jouse le nabol jouse-a naphatthei ding;

⁴Chutiachu Pakaiyin keima chungchanga, nachaten alung pumpiu le ahinna pumpiuva kamasanga thutah-a achonna dinguva, akalsona lampi houva achihthei uva ahile, Israel laltouna-a touding kiphasam louva nanei ding ahi, tia anaseichu aguilhunsah ding ahi.

⁵ Chukal vallin Zeruiah chapa Joab'in kachunga athilbol, chule Israel janel gallamkai teni, Ner chapa Abner le Jether chapa Amasa atha-a, achung hona athilbol; chamna aumlaija gal thisan aso-a, akonga agah konggah chungle akenga akibu kengkoh chunga gal thisan anu chu nangman nahen ahi.

⁶Hijeh chun nachihna bangtah-in bolinlang, alukan nung hijongle lungmong tah-in lhankhuh-a chesuhsah hih-in.

⁷ Ahinla Gilead mite Barzilai chapate henga chun lungsetna chu musah inlang, nadokhanga an neho lah-a chun amahochu ankong umsah-in; ajehchu nasopipa Absalom jeh-a kajamle laijin kakoma ahungun ahi.

⁸ Chule ven, Mahanaim'a kache petna gaosapna khohtah eina gaosap, Bahurim'a cheng Benjamin son Gera chapa Shimei chu nahenga uma ahi. Ahinla Jordan'ah eikimupidin ahungsuh-in, keiman Pakai minin kahahselin, chemjamin that ponge kanatin ahi.

⁹Hijeh chun tun ama mona beijin koihih-in; ajehchu miching nahin, achunga ipi bolding ahi nahenai; Ahin alukan nung hijongle thisan puma lhankhuh najotsah ding ahi, ati.

¹⁰Chutichun David chu apu apate toh analum khomin, David khopi-a anavuitaove.

¹¹ Chule David'in Israelte chunga lengvai anapoh sung chu kum somli ahin, Hebron'ah kum sagi analeng changin, Jerusalem'a kum somthum le kumthum ana lengchange.

¹² Chujouvin Solomon chu apa David laltouna-a atouvin; chule alenggam lentah-in anaki phutdoh tai.

¹³Chuin Haggith chapa Adonijah chu Solomon nu Bethsheba henga ahungin ahi. Amanun ajah-a, chamdela nahung hinam? tin adongin ahile, amapan, chamdelin kahung nai, ati.

¹⁴Chukalvalin aman amanu jah-a, nahenga seinom themkhat kaneije, ati. Amanun ajah-a, seijin, ati.

¹⁵Hichun amapan, lenggam chu keija ahi-a, chule Israelte jousen jong keima lengvai poding ahi tia eivet cheh-u ahi ti nangman nahenai; hijongle lenggam chu akiheidoh-in, kasopipa-a ahunghitai. Ajehchu Pakaiya kona hichu ama-a hija ahi.

¹⁶Chule tun nahenga ngehnom khat kaneijin, nei itpeh hihbeh-in, ati. Chuin amanun, seijin, ati.

¹⁷ Chuin aman katao ahi, Solomon lengpa henga Shunam mi Abishag khu kaji dingin neithum peh-in, (ajeh chu aman nathu nelponte,) ati.

¹⁸Chuin Bethsheba'n, aphai, lengpa henga nangma-a dingin seipeh nange, ati.

¹⁹Hijeh chun Bethsheba chu Adonijah'a dinga seipeh dingin Solomon lengpa henga achetai. Chuin lengpa amanu kimuto pidin akipatdoh-in, a-anga akunin, chuin alaltouna-a atouvin, chule lengpa nu-a ding chun laltouna ado sah-in; akhutjet lama chun atoutai.

²⁰Chuin amanun ajah-a, nangma henga ngehna neokhat kanei nome; katao ahi, kanompoi neitipeh hih-in, ati. Chuin lengpan amanu henga, thumin, kanu, ajehchu kanompoi tipeh ponge, ati.

²¹Chuin amanun, Shunam mi Abishag hi nasopipa Adonijah ji dingin kipehen, ati.

²²Chuin leng Solomon'in anu adonbutnin, ibola Shunam mi Abishag chu Adonijah ji dinga nathum ham? ama dingin lenggam jonghi thumin; ajehchu ama ka upa ahi; amadingin, Abiathar thempu dingin, chule Zeruiah chapa Joab dinjong thumin, ati.

²³Chujouvin Solomon lengpa Pakaiya akihahselin, Adonijah'in ama hinkho douna-a hiche thuhi aseilou hileh, Pathen'in kachunga chutichun bolhen, chukalvallin jong bolhen.

²⁴Hijeh chun tun, Pakai ahin jing bangin, athutep bangtah-a eitungdoh-a, kapa David laltouna-a eitousah-a, insungkhat eisempehpa mina kahahsel ahi; tunikho-a hi Adonijah thi teitei ding ahi, ati.

²⁵Chuin Solomon lengpan Jehoiada chapa Benaiah chu asolin, ama achunga achun athat tai.

²⁶ Chuin lengpan Abiathar thempu henga, nangma Anathoth kho na inle lou mun'a kichetan, athidinga lom nahi; kapa David masanga Pakai Pathen kitepna thingkhong naput jehle, kapa kibolgimna chana kibolgim nahi jeh-in, tuchunghin thatponge, ati.

²⁷ Chutichun Pakaiyin Shiloh'a Eli insung thudol anaseichu aguilhunsah theina dingin; Solomon'in Abiathar chu Pakai thempu ahina chu ahaisahtai.

²⁸Chujouvin Joab henga thu ahung lhungtai: ajehchu ama Absalom lama kiheihih jongle Joab chu Adonijah lama akiheija ahi. Hijeh chun Joab chu Pakai houbuh lama ajamin, maicham sakiho chu atuhchah tai.

²⁹Chuin, Joab chu Pakai houbuh lama ajamin, chule ven, maicham koma aume, tin Solomon lengpa aseipeh taove. Hichun Solomon'in Jehoiada chapa Benaiah asolin, chenlang gathatnin, ati.

³⁰Chuin Pakai houbuh phunga Benaiah ahungin, ahenga, lengpan hung doh-in ati, tin agaseijin ahi. Ahin aman, kanompoi, hikoma hin thijonge, ati. Chuin Benaiah'in lengpa thu ahetsah kitnin, Joab'in hitin aseijin, hitin eidonbutne, ati.

³¹Chuin lengpan ajah-a, aseibang bangin boljengin, that inlang vuitan; chutile keima le kapa insunga kona monabei thisan Joab'in asochu nalahmang theiding ahi.

³²Chule ama sanga dihjo le phajo mini, Ner chapa Abner Israel janel gallamkai le Jether chapa Judah janel gallamkai Amasa chu kapa David hetlouva achemjama athajeh-a, Pakaiyin athisan chu ama luchung tah-a achuhsah ding ahi.

³³Hijeh-a chu amani thisan chu Joab luchangle achilhahte luchunga a-itih-a dinga hungkile ding ahin; ahinla David chungle achilhahte chung, insung mite chungle alaltouna chunga vang Pakaiya kona a-itih a chamna leng ding ahi, ati.

³⁴Hitichun Jehoiada chapa Benaiah achetouvin, achunga achun, athattai. Chule gamthipma amatah in'a akivui tan ahi.

³⁵Chuin lengpan Jehoida chapa Benaiah chu ama khelin janel chunga vaihomin akoijin; chule Zadok thempu chu Abiathar mun'a akoitan ahi.

³⁶Chuin lengpan Shimei kouding asolin, ajah-a, Jerusalem'a inkhat kisah-in lang chuachun chengin, chua konin hoima danga chedoh hih-in.

³⁷Ajehchu hitiding ahi, nangma nachedoh-a Kidron vachadung nagalkai ninile, nangma thonlouva nathi teiding ahi ti kihetnin; nathisan chu nangmatah luchunga chuding ahi, ati.

³⁸Chuin Shimei'in lengpa henga, akiseichu aphai; kapu lengpan nasei bangin nasohpan bollinge, ati. Chuin Shimei Jerusalem'a nitamtah achengtai.

³⁹Chuin kumthum jouvin ahitin ahi, Shimei sohte mini Gath lengpa Maachah chapa Achish henga ajammang lhontai. Chule Shimei koma, ven, nasoh teni Gath'a aumlhone, tin aseipeh taove.

⁴⁰Chuin Shimei akipatnin, asangan chunga atouvin, Gath'a Achish henga asohteni hollin achetai; chuin Shimei achen, asohteni chu Gath'a konin ahinpuitai.

⁴¹Chule Shimei Jerusalem'a konin Gath'a achen, ahungkile kit tai tin Solomon aseipeh taovin ahi.

⁴²Chuin lengpan Shimei kouding mi asolin, ajah-a, keiman Pakai mina kaki hahsel sah-a, nangma napotdoh-a, mundanga navadoh ninileh nathi teiteiding ahi, chentah-in kihetnin, tia kagihsa nahi hilouham? chule nangman kajah-a, kathujah hohi aphai natin ahi.

⁴³Achutile ibola Pakaiya kihahselna le, thupeh kapeh chu nitlouva nahim?

⁴⁴Chukal valin lengpan Shimei jah-a, kapa David nabolna gitlouna jouse nahen, nalung gilin nahetpeh-e; hijeh chun nagitlouna chu Pakaiyin nangmatah luchunga achuhsah ding ahi.

⁴⁵Chule Leng Solomon vang nunnom mintin, chule leng David laltouna chu Pakai angsunga tonsotna phudetna umding ahi, ati.

⁴⁶Chuti chun lengpan Jehoiada chapa Benaiah thu apen; ama apotdoh-in, achunga achun, athat tai. Chule lenggam chu Solomon khutna akiphutdet tai.