Read Thado Chin 1 Lengte 20 Bible Online

1 Lengte 20 - Thado Chin bible

1 Lengte 20

¹Chuin Syria lengpa Benhadad'in asepai janel jouse akhom khomin; amato pangkhoma chu leng somthumle ni ahin, amaho chu asakol kangtalaiju toh ahitha cheh-u ahi. Chuin ama achetouvin Samaria aum kimvelin, achunga gal aboltai.

²Chuin aman khopi sunga Israelte lengpa Ahab henga thupo ho asolin, hitin agasei sah-e, Benhadad'in hitin aseije,

³Nasana le nadangka ho chu keija ahin; najite le nachate, aphapen ho geija keija ahi.

⁴Chuin Israel lengpa chun adonbutnin, ka pakai, vo lengpa, nathusei bangin keima le kaneijouse abonchan nanga ahi, ati.

⁵Chuin thupo ho chu ahungkitnun, hitin aseijuve, Benhadad'in hitin aseije, nahenga nadangka ho le nasana ho, najite le nachate neipeh ding ahi, tia mi kahinsol vangin,

⁶Jingle tuphat donahi kasohte kahinsola, amahon nangma inle nasohte inho aholdiu; chule hitiding ahi, ipi hile namit lachanchu, akhutnuva kona alah uva achoimang diu ahitai, ati.

⁷Chuin Israel lengpan gamsung upaho jouse akouvin, kangeh nahiuve, hichepan thilse aboldanhi melchih unlang vetemun; ajehchu kahenga kajite le kachate, kadangka le kasanaho ahin thumin; kana itpehlou ahi, ati.

⁸Chuin upa jousele mipi jousen, athu ngaihih-in, nopjong noppeh hih-in, atiuve.

⁹Hijeh chun aman Benhadad thupo ho henga, ka pakai lengpa chu seipeh-un, nasoh henga mi nahinsola na-ngeh masat jouse chu kabolding ahi: ahin hiche vanghi bolthei ponge. Chuin thupo ho chu akipat doh-un, hiche thuchu agalhut taove.

¹⁰Chuin Benhadad'in ahenga mi asolin, kanungjui mipi ho jouse-a dinga khutdim khat cheh tohding Samaria leivui kakhen poupoule, hitobang chun pathen hon kachunga lhunsah hen, chule akalvalin jong lhunsah hen, agati sah-e.

¹¹Chuin Israel lengpan adonbutnin, galvon kivonpa chu akisutlha sapa bangin hoitho hihhen, tin gaseipeh un, ati.

¹²Chuin ahitin ahi, Benhadad'in hiche thu chu ajah phatnin, ama le aleng chankhompi hon pon insunga ju adon petnu ahin, asohte jah-a, kigouvin, ati. Chuin amaho akhopi satdingin akigo taove.

¹³Chuin veuvin, themgao khat Israel lengpa Ahab henga ahungin, ajah-a, Pakaiyin hitin aseije; mipi tamtah hohi namu em? ven, tunia hicheho hi nakhutna kapehdoh ding ahin; chutengle keima Pakai chu kahi neihetding ahi, ati.

¹⁴Chuin Ahab'in, keija konin em? ati. Chuin aman, Pakaiyin hitin ati, gamkaiho-a pipui gollhang ho-a konin, ati. Chuphatnin aman galsatdinga koijin thu apeh dingham? ati. Chuin aman, nangman, ati.

¹⁵Chujouvin aman gamkaiho-a pipui gollhangho asimin, amahochu jani leh somthumle ni ahiuvin; chuin amaho nunga mijouse, Israel chate jouse asimle, sangsagi ahiuve.

¹⁶Chuin amaho sunkimin akipatdoh taove. Benhadad vang pon inho sunga, amale akithopi leng somthumle ni chun ju adonun, anakham tan ahi.

¹⁷Chuin gamkaiho-a pipui gollhangho apotdoh masaovin; chuin Benadad'in mi asolin, chule amaho chun, Samaria konin miho ahung potdoh uve, tin aseipeh uve.

¹⁸Chuin aman, cham boldinga hung ahijongle ahingin man-un; ahiloule galbol dinga ahung ahiu jongle ahingin man-un, ati.

¹⁹Hitichun gamkai lenho-a pipui gollhangho chu khopi-a konin ahungdoh uvin, galsatmi hochun anungu ahinjuijun ahi.

²⁰Chuin amitakipmin atokhahcheh-u athatnun ahile, Syria te chu ajam taovin; Israelte chun anung delun ahi; chuin Syria lengpa Benhadad chu sakol chunga atouvin, sakol tou them hotoh ajamdoh tan ahi.

²¹Chuin Israel lengpa chu apotdoh-in, sakolhole kangtalai ho chu asusen, Syria te chu tamtah athatnin ahi.

²²Chuin themgaopa chu Israel lengpa henga ahungin, ajah-a; chen, natha hatsah inlang melchih-in, chule ipi nabolding kingaiton; ajehchu kum kitle Syria lengpa nangma dou dinga hungding ahi, ati.

²³Chuin Syria lengpa sohten ajah-a, a-pathen hou chu thinglhang pathen ho ahin; hijeh-a chu eihosanga amaho hatjoa ahiuve; ahin eihon amaho phaichama kisatpiu hite, chutile amaho sanga thonlouva ihatjoh dingu ahi, ati.

²⁴Chule hitiho hi bolin, lengho chu amitakip ama muncheh-a konin ladoh-in, amaho mun'a chun sepai gal lamkaiho pansah-in.

²⁵Nangman namansah sepaiho tobang sepaiho, sakol khela sakol, kangtalai khela kangtalai kisimdoh-in; chule keihon phaichama amaho kisat piuvinge, chule amaho sanga thonlouva kahatjohdiu ahi, atiuve. Chuin aman athu-u chu angaijin, hitichun aboltai.

²⁶Chuin akum kitnin ahitin ahi, Benhadad'in Syria mite chu asim toh-in, Israelte satdingin Aphek'a achetou tan ahi.

²⁷Chuin Israel chate chu akisim taovin, abonun ahungcheh-un, amaho satding chun ache taove. Chule Israel chaten amaho masanga chun kelnou hon neocha ni bangin pon-in akisonuve; Syria te vang chun gamsung alodimsoh jengun ahi.

²⁸ Chuin Pathen mikhat ahungin, Israel lengpa henga thu aseijin; Pakaiyin hitin atie, Syria te Pakai chu thinglhangho pathen ahin, phaicham pathen ahipoi atiuvin, hijeh-a chu mipi atama tamho jousehi nakhutna kapeh ding, chutia chu keimahi Pakai chu kahi ti nahetdiu ahi, ati.

²⁹Chuin amaho chun khatle khat kigalsai ton ponbuh akisonun ahi. Chuin ahitin ahi, nisagi nin gal akipanin, Israel chaten Syria mite chu nikhat sungin mi sangjakhat athatnun ahi.

³⁰Ahin adangho vang Aphek khopi sunga ajamlutnun; aumnalaiho mi sangsomni le sangsagi chu kulpin achim khumin ahi. Chuin Benhadad chu ajam mangin, khopi sunga, indan sungnunga ajamlut tai.

³¹Chuin asohten ajah-a, tun vetemin Israel insunga lengho khu hepina-a dim lengho ahiuve ti kanajaove. Katao ahi, ikong uvah khaodip pon kichenu hitin, chule ilu uva khaokol kikhiu hitin, Israel lengpa henga gacheu hite; ijem itile aman nahinkho huhhing khatninte, atiuve.

³²Hitichun akonguvah khaodip pon akingah-un, aluva khaokol akikopmun, Israel lengpa henga ahungun, ahenga, nasoh Benhadad'in, katao ahi, neihing hoijin, atie, atiuve. Chuin aman hingnalaija ong? kasopipa hijachu, atin ahi.

³³Tun mihochun ama-a kona thu hungpot chu lunglut tah-in anitnun, chule ajoploi chelun; nasopipa Benhadad, atiuve. Chuin aman, gapuijun, ati. Chujouvin Benhadad ahenga ahungtan; chuin aman kangtalai ja akaldoh sah-in ahi.

³⁴Chuin Benhadad'in ajah-a, kapan napa-a kona analah khopiho chu kalepeh ding nahi; chule kapan Samaria'a abolbang chun nangman jong Damascus khosung lamlen kisemin, ati. Chuin Ahab'in keiman hiche kitepna hotoh nasoldoh tha nange, ati. Hitichun aman amatoh kitepna asemin, asolmangtai.

³⁵Chuin themgaoho chapate lah-a mikhatnin Pakai thu-in aheng akompa jah-a, nahenga katao ahi neivotem in, ati. Ahin mipa chun avonompoi.

³⁶ Chuin aman ajah-a, Pakai thu nangailou jeh-in, vetan, keija kona napotdoh dohle, keipi bahkaijin nathading ahi, ati. Chuin ama-a kona apotdoh doh-in, keipi bahkai khatnin amun, athat tai.

³⁷Chujouvin michom khat amun, katao ahi, neivotem in, ati. Chuin amapan avotan, chutichun avohna-a chun amavotan ahi.

³⁸Hitichun themgaopa chu apotdoh-in, lengpa chu lampia angah-in, amai vutvai anun alim achomsah-in ahi.

³⁹Chuin lengpa ahungphatnin, aman awsang tah-in lengpa jah-a chun; nasohhi galmun laitah-a kagachen; chule vetemin, mikhat akiheidoh-in kahenga mikhat ahinpuijin, hichepa hi chingphan; itihama amanle ahinkho khela nahinkho nachan ding, ahiloule dangka talent khat napehding ahi, ati.

⁴⁰Chule nasohhi hilamle khulama kakisahlel kah-in amapa ana achemang tai, ati. Chuin Israel lengpan ajah-a, hitobanga chu nathu kitanlha ding ahi; nangma le nangman nakitan lhah ahitai, ati.

⁴¹Chuin aman amaija kona vutvai chu aladoh loijin ahileh, Israel lengpa chun ama themgaoho lah-a ahi chu ahedohtan ahi.

⁴²Chuin aman ajah-a, Pakaiyin hitin aseije, suhgamhel dinga kagotsa chu nakhutna kona kakitol dohsah tahjeh-a, nahinkho chu ama hinkho khela, namite chu amite khela cheding ahiuve, ati.

⁴³Chuin Israel lengpa chun nguitah le lunghimo tah-in a-inlam jonin achen, Samaria ahung lhungtai.