Read Thado Chin 1 Lengte 21 Bible Online

1 Lengte 21 - Thado Chin bible

1 Lengte 21

¹Chuin hicheng jouchun ahitin, Jazreel mi Naboth'in lengpi hon khat aneijin, hichu Jazreel mun'a um ahin, Samaria'a lengpa Ahab inpi bantah-a uma ahi.

²Chuin Ahab'in Naboth jah-a, nalengpi leihi ka in komcha-a um ahijeh-in, ka anche leidin neipetan, hiche khelchun asanga phajo hondang khat nape nange, ati.

³Chuin Naboth'in Ahab jah-a, kapu kapate gou nang kapeh ding chu Pakaiyin ajanompoi, atin ahi.

⁴Chuin Jezreel mi Naboth thusei jehchun Ahab chu nguichet le lunghimo tah-in a-in'a ahung tan ahi; ajehchu aman, kapu kapate gou nangma peponge ati ahi. Chuin ama ajalkhuna alumin, amai aheimangin, imacha anenom tapon ahi.

⁵Ahinla a-inneipi Jezebel ahenga ahungin, ajah-a, ibola nachuti lunggima, annelouva uma nahim? ati.

⁶Chuin aman amanu jah-a, ajehchu keiman Jezreel mi Naboth henga, nalengpilei chu sumin neikichoh sah-in; ahilouva nalung lhaina ahile, hiche khelchun lengpilei chomkhat nape nange kanatin ahi. Ahinla aman, keiman kalengpilei nangma peponge, tin einadon butnin ahi, ati.

⁷Chuin a-inneipi Jezebel'in ajah-a, nangma Israel lenggam vaipo nahilouham? thouvin lang an nen, nalung kipasah-in; keiman Jezreel mi Naboth lengpilei chu nangma kapeh ding nahi, ati.

⁸Hitichun amanun Ahab minin lekhathot khat asunin, lengpa mohor chu anamkhumin, lekhathot chu Naboth toh chenga khopisunga upa hole milal ho chu athotnin ahi.

⁹Amanun lekhathot ho-a chun, an ngol ding phongjalun lang, mipi lah-a chun Naboth chu domsangun;

¹⁰Chule mini, Belial chapateni chu amapa douna hettohsah dingin dinsah-un, nangman Pathen le lengpa nataitome, tin seisah-un; chujouteng puidoh unlang athina dingin songin sepmun, tin asunne.

¹¹Chuin akhopi sunga miho, akhopi sunga cheng upaho, milen milal ho chun, Jezebel'in ahenguva ahinthot lekhathotna kisunbang chun abol taovin ahi.

¹²Amahon an ngolthu aphongjalun, mipi lah-a Naboth chu adomsangun ahi.

¹³Chuin mini, Belial chate pasal ni ahunglut lhonin, amasanga atoulhone. Chuin Belial mi teni chun ama douna, Naboth dounan mipi anga chun ahettohsah lhonin, Naboth'in Pathen le lengpa ataitome, atilhone.Chujouvin amahon khopi-a konin akaidoh-un, songin asepmun ahile athitai.

¹⁴Chuin Jezebel henga, Naboth songin asepmun, athitai tin agah hetsah taove.

¹⁵Chuin ahitin ahi, Jezebel'in Naboth songin asepmun athitai ti ahet phatnin, Jezebel'in Ahab henga, kipat in, Jezreel mi Naboth lengpilei suma chohdinga aphalou chu galotan; ajehchu Naboth chu ahingtapoi, athitai atin ahi.

¹⁶Chuin Ahab'in Naboth athitai ti ajah phatnin, Ahab chu Jezreel mi Naboth lengpilei galo dingin akipat doh-in, achesuh tai.

¹⁷Chuin Tishbi mi Elijah henga Pakai thu ahung lhungin, aseije,

¹⁸Kipat doh-in, Samaria'a um Israel lengpa Ahab kimupi din chesuh-in; ven, galo dinga achesuh lona Naboth lengpi leija aume.

¹⁹ Chule nangman ajah-a, Pakaiyin hitihin aseije, nangman natha-a, agam hi nalo hilouham? chule nangman ajah-a, Pakaiyin aseije, uichan Naboth thisan alena mun'a chu, uicha hon nangma thisan ngeitah jong ale dingu ahi, tin jong gaseijin, ati.

²⁰Chuin Ahab'in Elijah jah-a, neimudoh hitam, vo kamelma pa? ati. Chuin aman adonbutnin, kamudoh nahitai; ajehchu Pakai mitmu-a thilse boldinga nangle nang kijoh nahitai.

²¹Vetan, keiman nachunga thilse kahin lhunsah ding, nachilhah kalah mangding, Israel gamsunga Ahab chilhah pasal jouse, akihen hihen, ongthol hijongle kasuh manghel ding ahi.

²²Chule nangman neilung hansah-a, Israelte nachonset sah jeh-a, na-insung chu Nebat chapa Jeroboam insung bangle Ahijah chapa Baasha insung banga kasuhmang ding ahi.

²³ Jezebel chungchang thujong Pakaiyin aseijin, kulpanga uichaten Jezebel anehdiu ahi.

²⁴Ahab insung mite khopi sunga thichan chu uichaten anehdiu; chule gama thichan chu chungleng vachaten anehdiu ahi.

²⁵Ahinla a inneipi Jezebel tildoh-a Pakai mitmu-a thilse tongdinga amale ama akijohdoh-a Ahab tobang koimacha aumpoi.

²⁶Pakaiyin Israel chate masanga ana nodoh Amor mite thilbol jouse bangin, thet umtah in milimho nung anajuijin ahi, ati.

²⁷Chuin ahitin ahi, hiche thuhochu Ahab'in ajah phatnin, apon abottelin, khaodip pon akisilin, an angolin, khaodip pon silin alumin, kangchan achedohtan ahi.

²⁸Chuin Tishbi mi Elijah henga Pakai thu ahung lhungin, aseije,

²⁹Ven ichana Ahab kamasanga amale ama kineosah hitam? kamasanga akineusah jeh-in ama hinkho sungin thilse lhunsah taponge; ahin achapa hinkho sungin vang a-insunga thilse kalhunsah ding ahi, ati.