Read Thado Chin 1 Lengte 22 Bible Online

1 Lengte 22 - Thado Chin bible

1 Lengte 22

¹Chuin Israel le Syria kikah-a chun kumthum sungin gal ana umpon ahi.

²Chuin ahitin ahi, akumthum na-in Juda lengpa Jehoshaphat chu Israel lengpa henga ahungsuh-in ahi.

³Chuin Israel lengpan asohte jeh-a, Gilead gama Ramoth kho khu eihoa ahin, Syria lengpa khutna konin akiladoh hihlaije ti nahet lou uham? ati.

⁴Chuin aman Jehoshaphat jah-a, Ramoth-gilead gal neisat hu ding ham? ati. Chuin Jehoshaphat'in Israel lengpa jah-a, keima nangma tobang kahin, kamite jong namite tobang, chule kasakolte jong nasakol tobang ahi, ati.

⁵Chuin Jehoshaphat'in Israel lengpa jah-a, kangeh nahi, tunin Pakaiyin ipi thu aseijem dong photnin, ati.

⁶Chuphatnin Israel lengpan themgao mi jaliho akhom khomin, ajah uvah, Ramoth-gilead satdinga kakon dingha, kakon louding ham? ati. Chuin amahon, kontouvin, ajehchu Pakaiyin hichu lengpa khutna apehding ahi, atiuve.

⁷Chuin Jehoshaphat'in, eihon idohthei dingu Pakai themgao dang khattou hia hi umlou ham? ati.

⁸Chuin Israel lengpan Jehoshaphat jah-a, Pakai thu idoh theina diu mikhat, Imlah chapa Micaiah aum nalaijin, hinla amapan keima chungchang ase tailou apha aseikhah louhel jeh-a kahot ahi, ati. Chuin Jehoshaphat'in, lengpan chuti chun seihih hen, ati.

⁹Chuin Israel lengpan vaipo khat akouvin, Imlah chapa Micaiah hin puiloi temin, ati.

¹⁰Chuin Israel lengpa le Judah lengpa Jehoshaphat chu aleng vona kivon pumin, laltouna-a Samaria lutna kotpi phung mun ong laija atoulhonin; amasang lhona themgao jousen gaothu aseijuve.

¹¹Chuin Chenaanah chapa Zedekiah chun thih-in ki phabep asemin; chuin aman, Pakaiyin hitin ati: hiche-a hi nangman Syria mite chu nasuh manghel kahse-a nanoding ahi, ati.

¹²Chule themgaoho jousen chutobang machun gaothu aseijun, Ramoth-gilead'a chetouvin lang galolhing teijin; ajehchu Pakaiyin lengpa khutna hichu apehdoh ding ahi, atiuve.

¹³Chuin Micaiah kou-a che thupopan ajah-a aseijin, tun vetemin, themgaoho chun lengpa-a dingin kitohtah-in akamuva thupha aphong jalun ahi; katao ahi, nangma thu jong amaho khatpenpen thu tobang hihen lang, apha chu seijin, ati.

¹⁴Chuin Micaiah in, Pakai hing jing mina kasei ahi, Pakaiyin kahenga aseibou chu kaseiding ahi, ati.

¹⁵Hitichun lengpa henga ahungtai. Chuin lengpan ajah-a, Micaiah Ramoth-gilead satna kache diuha, kachelou diuham? ati. Chuin aman adonbutnin, chenlang galolhing taohiti: ajehchu Pakaiyin hichu lengpa khutna pedoh navehta, ati.

¹⁶Chuin lengpan ajah-a, thutah tailou kahenga Pakai mina naseilouna dinga ijatvei nangma kaki hahsel sah ding nahim? ati.

¹⁷ Chuin aman, Israelte jouse chu achingbei kelngoiho banga, lhang dunghoa achehchau gamhelu kamun; chule Pakaiyin, hihohin aching ding aneitapouve; mitin a-in lama lungmong tah-in kile taohen, atie, ati.

¹⁸Chuin Israel lengpan Jehoshaphat jah-a, kachung chang thu ase tailou apha himhim seiponte tia kahil nahilouham? ati.

¹⁹ Chuin Micaiah'in, hichejeh chun nangman Pakai thuhi ngaijin; Pakai chu alaltouna chunga atouva, vanmi janel ajetlam le aveilama adinu kamui.

²⁰Chuin Pakai chun Ahab hi Ramoth-gilead'a achea agathi nadinga kon agalhep ding ham? atin ahi. Chutichun khatnin hitin aseijin, chule adang khatnin khutin aseijin ahi.

²¹Chuin lhagao khat ahungdoh-in, Pakai anga adingin, keiman lheminge, ati.

²²Chuin Pakaiyin ajah-a, iti danin em? ati. Chuin aman gache ingting, athemgaoho jouse kama chun jousei lhagaovin gapanginge, ati. Chuin aman ajah-a, nangman nagalhep ding, chule jojong nagajoding ahi; hijeh chun gachenlang hitobang chun gaboltan, ati.

²³Hijeh chun tun, vetan, Pakaiyin hiche nathemgao ho jouse kama jousei lhagao akoijin, chule Pakaiyin nachung changa thilse aseitan ahi, ati.

²⁴Ahinla Chenaanah chapa Zedekiah'in aganaijin, Micaiah ngeiphe chu abengin, Pakai lhagao chu nahenga thu seidinga keija kona hoiche lampi-a potdoh-a ham? ati.

²⁵Chuin Micaiah'in, vetan, indan sungnunga kisel dinga nalut niteng hetan nate, ati.

²⁶Chuin Israel lengpan, Micaiah hi puijun lang, khopi vaihompa Amon le leng chapa Joash henga lepuijun;

²⁷Chule hitin gaseijun, lengpan hitihin aseije, hichepahi songkul'a khumun lang, lungmonga kahung kahsen, gentheina an le gentheina twijin vah-un, ati.

²⁸Chuin Micaiah'in, lungmonga nahung kile pou poule, Pakaiyin kajah-a thu aseilou hinte, ati. Chuin aman, mipi ho, nangho kichih theijun, ati.

²⁹Hitichun Israel lengpa le Judah lengpa Jehoshaphat Ramoth-gilead'a achetou lhontai.

³⁰Chuin Israel lengpan Jehoshaphat jah-a, keiman kalim kheling ting galmuna lutninge; nangman vang nalengvon kivonin, ati. Chuin Israel lengpan alim akhelin, galmuna alut tai.

³¹Ahinla Syria lengpan kangtalai chunga vaipo gal lamkai somthumleni chu thu apen, Israel lengpa tailou alenjong aneojong kisatpi hih-un, ati.

³²Chuin ahitin ahi, kangtalai sepai vaipoho chun Jehoshaphat amuphatnun, amahon, amachu Israel lengpa ahimonge atiuvin ahi. Chuin ama satdingin akiheijun ahile, Jehoshaphat chu ahung pengjah-in ahi.

³³Chuin kangtalai sepai vaipipo ho chun Israel lengpa ahilou ahet phatnun, ama anungdel uva konin akinungle taovin ahi.

³⁴Ahin mikhatnin athal ajebongin amoh kapmin ahileh Israel lengpa galvon thokah akhan ahi. Hijeh chun akangtalai tolpa jah-a chun, kaiheijin lang mipi lah-a konin neipotdoh pin, keima machanga kahitai, ati.

³⁵Hicheni chun gal kisat akhohcheh chehtan, Syria mite lamngan lengpa chu kangtalai chunga akingaijin, nilhah lamin athitai. Chule amaha-a kona thisan along doh-in kangtalai sunga chun along lutnin ahi.

³⁶Chuin nilhum ding konin sepai janel lah-a konin, amitakip akhopile agamsung cheh-a chetouhen, tin ahung kisamin ahi.

³⁷Hitichun lengpa chu athin, Samaria'a ahinpouvin; chuin lengpa chu Samaria'a avui taove.

³⁸Chuin mikhatnin kangtalai chu Samaria twikul'a chun asopmin; Pakai thusei dungjuijin, uicha hon athichu aleh-un; agalvon chu asopmun ahi.

³⁹Tun Ahab thilbol danghole anatohho jouse, saiha-a a-in sah, chule ama sahdoh khopiho jouse chu Israel lengte thusimbua kisuna hilouham?

⁴⁰Hitichun Ahab chu apu apate toh alumkhomin, ama khelin achapa Ahaziah alengchang tai.

⁴¹Chuin Israel lengpa Ahab lengchan kal kum li na-in, Asa chapa Jehoshaphat chu Juda gama alengchang panin ahi.

⁴²Jehoshaphat alengchan kipat chun kum somthumle kum nga ahitan; Jerusalem'a kum somni le kum nga alengchange. Chule anu minchu Azubah ahin, Shili chanu ahi.

⁴³Chuin aman apa Asa lampi jouse chu ajotnin, chua kona kiheimang louvin Pakai mitmu-a adih jeng abolin ahi. Ahivangin munsang ho vangchu akiladoh dehpoi; ajehchu munsang ho-a chun mipin thilpehle gimnamtui halna aneijing nalaijun ahi.

⁴⁴Chule Jehoshaphat'in Israel lengpa toh chamna asemin ahi.

⁴⁵Tun Jehoshaphat thilbol danghole ahatna avetsahho, chule agalbol danho chu Judah lengte thusim buho-a kisuna hilou ham?

⁴⁶Chule apa Asa nikhoho-a jonthanhoija kimangcha ahingdoh amoh umsun chu, gamsunga konin anodohsoh helin ahi.

⁴⁷Chulaichun Edom'a leng ana umpon; gamvaihom chu leng anahijenge.

⁴⁸Jehoshaphat'in Ophir'a sana gapoding Tarshish kongho asemin, ahinla Ezion-geber'a kongho chu akegam jeh-in achetapoi.

⁴⁹Chuphatnin Ahab chapa Ahaziah chun Jehoshaphat jah-a, kasohte hi nasohtetoh kongho-a konkhom sah-u hite, ati. Ahinla Jehoshaphat anompon ahi.

⁵⁰Chuin Jehoshaphat apu apate toh alumkhom tan, apu apate toh apa David khopi-a avuitaovin ahi. Chuin ama khelin achapa Jehoram alengchang tai.

⁵¹Chuin Judah lengpa Jehoshaphat lengchan kal kum somle kumsagi alhinin, Samaria gama Israelte chunga Ahab chapa Ahaziah alengchang panin; Israelte chunga kum ni alengchange.

⁵²Aman Pakai mitmun thilse abol jingin, apa lamlhah le anu lamlhah, chule Israelte chonsetsah-a Nebat chapa Jeroboam lamlhah chu ajotpeh-in ahi;

⁵³Ajehchu apan anabol bangin Baal ajenin, ahouvin, Israel Pakai Pathen lung hansahna dingin aphinsen ahi.