Read Thado Chin 1 Lengte 3 Bible Online

1 Lengte 3 - Thado Chin bible

1 Lengte 3

¹Chuin Solomon'in Egypt lengpa Pharoah toh kihet them tona abolin, Pharoah chanu akichenpin, ama inding, Pakai inding, chule Jerusalem kimvella bang asah chaisoh kahse-a dingin, David khopi sunga chun akipui luttai.

²Pakai mina in akisah loulai jeh-in, hiche nikho geija chun mihon munsang ho-a kilhaina abol jiuvin ahi.

³Chule Solomon'in Pakai angailun, apa David chonnadan anitjingin; amavang munsang ho-a kilhainale gimnamtui halna aboljin ahi.

⁴Chuin lengpa Gibeon'a ganlhaina boldin achetai; ajehchu hikom munchu munsang thupipen ahi. Solomon'in hiche maicham chunga chun govam thilto sangkhat jen atoh-in ahi.

⁵Gibeon mun'a Pakai chu jan-in Solomon manga ahung kilah-in; chule Pathen'in, thumin ipi kapeh ding nahim, ati.

⁶Chuin Solomon'in, Nangman nasoh kapa David namasanga thutah-a, chonphatna-a, chule lung dihtah pu-a nangma toh aum jeh-in, achunga hepina lentah nanamu sah-in; ama khohsahna jal-in hiche hepina chu nakoi jom jingin, tunikho-a banghin alaltouna-a touding chapa khat nanapetan ahi.

⁷Chule tun, vo Pakai ka Pathen, nangman nasohhi kapa David khelin lengin neisemtan, hinla keimala chapang neocha kahin; vaikonje vailhunje helou kahi.

⁸Chule nasohhi nalhendoh mite, mipi tamtah, atamjeh uva simjouhoi hiloule ajat hetjouhoi hilou lah-a hin kaumme.

⁹Hijeh chun nasohhin, asele apha kakhentoh theija, namite vai kahom thei nadin, hetkhen themna lung neipen; ajehchu hibanga tam namite hi kon vai ahom thei dingham? ati.

¹⁰Solomon'in hiche thil athumna-a athuseihin Pakai alunglhaisah lheh jengin ahi.

¹¹Chuin Pathen'in ajah-a, nangman hiche thil nathuma, na hinkhosot nading, nahao nading, ahiloule namelmate hinkho ding thumlouva, nangman vaihom themna dinga hetkhenthem theinajoh nathum jeh-in,

¹²Vetan, nathusei bang bangin kabolpeh tai. Ven, chihna le hetkhenthem theina lungthim kapeh nahitai; chutia chu namasanga jong nangma tobang ana um khalou, chule nanunga jong nangma tobang himhim hung umkit talou ding ahi.

¹³Chule nahin laise-a lengho lah-a nangma tobang himhim aum louhel nadingin, nangman nathumlou haonale jabolna jong kapehthan ahi

¹⁴Chule kadan kisunho le kadan thupeh ho nanitna, napa David'in ajui banga, kalampiho najuija ahile, nahinkho kasotsah ding ahi, ati.

¹⁵Chuin Solomon akhangtan ahileh, veuvin hichu amang anahi. Chuin ama Jerusalem'a ahungin, Pakai kitepna thingkhong masanga adingin, govam thilto le chamna thiltoho atoh-in, asohte jouse golvah khat abolpeh-in ahi.

¹⁶Chujouvin lengpa hengah numei kijoh ni ahunglhonin, chule a-angsunga ading lhonnin ahi.

¹⁷Chuin numei khatnu chun, Vo ka pakai, keile hichenu hi inkhatna kacheng lhonin; insunga amatoh kaum petnin cha khat kahingin ahi.

¹⁸Chuin ahitin ahi, kacha hinjou anithumnin, hiche numeinu jonghin cha ahingin ahi. Hitichun ka umkhom lhonin, hiche insunga chu keini tilou midang koimacha toh kaum khom louvu ahi.

¹⁹Chule hichenun anaocha chu adelpha khah jeh-in, jan-in ana thitan ahi.

²⁰Chuin jankhangin amanu athouvin, nasohnu ka-imut petnin kachapa kakoma konin akilah-in, apotnin a-anga alupsah-in, ama cha athisa chu keima angngah analupsah tan ahi.

²¹Chuin kanao noi chepsah dinga jingkah-a katho phatnin, vetan, athisa anahitai. Ahinla jingkah-a hoitah-a kavetchetna ahile, vetan, keiman kahin kachapa chu anahitapon ahi, ati.

²²Chuin numei khatjonu chun, ahipoi; ahingjoh chu keichapa ahin, athi chu nang chapa ahi, ati. Chuin amasanu chun, ahipoi; athijoh chu nang chapa ahin, ahing chu kei chapa ahi, ati. Hitichun anilhon chun lengpa angsunga asei lhontan ahi.

²³Chujouvin lengpan, khatnin ahinghi keicha ahin, athi hi nang chapa ahi natilhon in; chule khatnin, ahipoi, athijoh chu nang chapa ahin, athilou chu keichapa ahi natilhone, tin aseije.

²⁴Chuin lengpan, chemjam khat neihin peuvin, ati. Chuin lengpa anga chun chemjam khat ahinchoi taovin ahi.

²⁵Chuin lengpan, naosen ahingjoh chu bongni souvin, bongkhat lamchu khat peuvinlang, chule bong khat lamchu khat jonu peuvin, ati.

²⁶Chuphatnin naosen hingnu johchun lengpa jah-a, achapa alaigilga akhotona jeh-in, vo ka pakai, naosen hing chu amanu chu petan, thathih beh-un, ati. Ahinla khatjonu chun, keija jong hida henlang nanga jong hida hen, bongni souvin, atitai.

²⁷Chuphatnin lengpan adonbutnin, naosen hingchu amasajonu, that hih beh-un tinu chu peuvin, amanu chu ahinga anu ahi, atitai.

²⁸Chuin Israelte jousen lengpa thutanlhah danchu ajataovin; lengpa chu akichataove; ajehchu amahon thutan nadinga Pathen chihna ama-a aumchu amutaovin ahi.