Read Thado Chin 1 Lengte 4 Bible Online

1 Lengte 4 - Thado Chin bible

1 Lengte 4

¹Chutichun Solomon lengpa Israel pumpi chunga leng anahi.

²Chule hichehohi amilen neiho chu ahiuve: Zadok chapa Azariah chu Thempu ahin,

³Elihoreph, le Shisha chapa Ahijah chu lekhasun ahin; Ahilud chapa Jehoshaphat chu thuching ahi.

⁴Chule Jehoiada chapa Benaiah chu janel gallamkai ahin; chule Zadok le Abiathar chu thempu ahilhone.

⁵Nathan chapa Azariah chu lamkaiho chunga ahin; Nathan chapa Zabud chu thempu le lengpa golpa ahi.

⁶Ahishar chu insung vaipo ahin; Abda chapa Adoniram chu sele kai choiho chunga vaipo ahi.

⁷Chule Solomon'in Israel pumpi chunga chun lamkai somleni aneijin, amaho chun lengpa le a-inkote dinga nehle chah angaito jiuvin; mikhatnin kumkhatna lhakhat sung nehding angaito cheh jiu ahi.

⁸Hichehi aminu ahi: Hur chapa chun Ephraim molsang apon,

⁹Derek chapa chu Makaz, Shaalbim, Bethshemesh chule Elonbethhanan mun apon;

¹⁰Hesed chapa chu Aruboth, Sochoh le Hepher gamsung pumpi apon;

¹¹Abinadab chapa chun Solomon chanu Taphath jin aneijin, Dor gamkol apumpi apon;

¹²Ahilud chapa Baana chun Taanach, Megiddo, Bethshean pumpi, Jezreel noija Zarthanah koma um Bethshean'a pat Abel-meholah gei, Jokmeam gallam mungeijin apon;

¹³Geber chapa chun Ramoth-gilead, Gilead'a umho Manasseh chapa Jair khopiho chu ama-a ahin, Bashana um Argob gamkai jong ama-a ahin, banghole akotgol ho sum-enga kisem cheh khopilen somgup ahin ahi.

¹⁴Iddo chapa Ahinadab'in Mahanaim apon;

¹⁵Ahimaaz'in Naphtali apon; Solomon chanu Bashemath chu jidin akipuijin ahi.

¹⁶Hushai chapa Baanah chun Asher le Aloth-a apo-in;

¹⁷Paruah chapa Jehoshaphat'in Issachar gamsung apon;

¹⁸Ela chapa Shimei chun Benjamin gamsung;

¹⁹Uri chapa Geber chun Gilead gamsung, Bashan lengpa Og chule Amor mite lengpa Sihon gamsung chu apon ahi. Chule agamsunga chu ama sehseh bou gamvaipo hia ahi.

²⁰Judah le Israel chu luipi kama neldi bangin atamlheh-un, aneuvin adonun, chule nop abollun ahi.

²¹ Chule Solomon chu luipi apat Philistine gamgi, chule Egypt gamgi chin geija lenggam jouse chunga chun vai ahomin; amahon thilpeh ahinchoijun, Solomon chu ahin laisen ajenun ahi.

²²Solomon nikhat anneh chu changbong neljet tena somthum, chule changbong an tena somgup ahi.

²³Sakhi chalho, sapeng chalho, sakhi gol, chule vacha kivahthao ho tilouvin; bongchal thao som, hamdonga kivah bongchal somni, chule kelngoi jakhat ahi.

²⁴Ajehchu aman luipipang hilamsang gamkai pumpi, Tiphsah apat Azzah gei, luipang hilamsang lengho jouse chunga lengvai apoh ahin; akimvel jouse toh chamna aneijin ahi.

²⁵Chule Judah le Israel chu Dan'a pat Beersheba geijin Solomon hinlaisen amitakip alengpi phungle atheichang phung noija mongtah-in achengun ahi.

²⁶ Chuin Solomon'in asakol kangtalai koinadin in sangsomli aneijin, chule sakol touthem mi sangsom le sangni aneije.

²⁷Chule vaipiho chu amitakipmin alha seh-in Solomon dingle, Solomon lengpa dokhanga hungjouse dingin nehding ahin peuvin; amaho ima alhasam pouve.

²⁸Amitakipmin akinganse dungjuijin sakolhole gancha kaljangho ding chun, sakolchang le changpol ahinpo jingun ahi.

²⁹Chuin Pathen'in Solomon chu chihna le hetthem theina nasatah, chule lungletna twipi panga neldi banghela tamin apen ahi.

³⁰Chule Solomon chihna chun solam gam chate chihnale, Egypt pumpi chihna jouse akhokheltan ahi.

³¹ Ajehchu ama mijouse sangin achingin; Ezrah mi Etham, Heman, Chalcol chule Derda, Mahol chapate sangin achingjon, chule akimvela namjouse lah-a akithangtan ahi.

³² Aman thuchih sangthum aseijin; chule la anabol chu sangkhat le nga ahi.

³³Chule thingphung jouse, Lebanon'a um cedar thinga pat, kulbanga kona hung kehdoh hyssop changeijin anaseijin; aman gamsaho, vachaho, a-opma kitholho, chule ngaho thu jong anaseije.

³⁴Ama chihna anajakha-a leiset lengho jouse-a konin, Solomon chihna ngai dingin namtin ahung jiuvin ahi.