Read Thado Chin 1 Lengte 5 Bible Online

1 Lengte 5 - Thado Chin bible

1 Lengte 5

¹Chule apa indan sunga amahon amachu lengdin thao anuve ti ajah jeh-in, Tyre lengpa Hiram'in asohteho Solomon henga asoltan ahi. Ajehchu Hiram chu a-itih-a David ngailu jing anahi.

²Chuin Solomon'in Hiram henga mi asolin, ajah-a hitin aseije,

³Pakaiyin amaho akengto noija akoi masangse-a, galmiten ama aumkimvel jing jeh uva, kapa David'in Pakai a-Pathen mina in iti anasah joulou ham ti nangman nahen ahi.

⁴Ahinla tun Pakai ka Pathen'in ningtina konin choldona eipetan, hijeh chun kidoupi jong hamsetna jong aumtapoi.

⁵ Chule, vetan, Pakaiyin kapa David henga anasei, na indan sung nalaltouna-a katousah ding nachapa chun, keima mina in eisahpeh ding ahi, anati bangin, Pakai ka Pathen mina in sah ding kagon ahi.

⁶Hijeh chun tun Lebanon'a kona cedar thingho aphuh nadiuvin thu penlang; kasohte hi nangma sohte toh pangkhom untin, chule nanganse dungjuijin nasohte thaman keiman penange. Ajehchu Sidon mite banga thing tuthem kalah uvah aumpoi ti nahei, ati.

⁷Chuin ahitin ahi, Hiram'in Solomon thu ajah phatnin akipah lheh jengin, hiche mipi tamtah chunga chapa ching David pepa Pakai chu tuni hin nun nomhen, ati.

⁸Chuin Hiram'in Solomon henga mi asolin, neihin solnaho chu kangaiton, cedar thingle chahthing chungchanga nangaichat jouse chu bolnange.

⁹Kasohten Lebanon'a konin twipi geijin hintol lhaovintin; nangin neitepeh ding mungeijin twipia hintoling ting, chule chua chun sodohsah ing-katin, chua kona chu nangman nana kilah ding ahi. Chule ka insung nehding neipeh-a, kangaichat neisuh bulhit pehding ahi, ati.

¹⁰Chutichun Hiram'in Solomon chu angaichat jouse dungjuijin cedar thingle chahthing apetan ahi.

¹¹Chuin Solomon'in Hiram chu a-insung anneh dingin suhlou chang tena sangsomni, chule thaotheng tena somni apen; hitichun Solomon'in akum akumin Hiram apejin ahi.

¹²Chuin Pakaiyin akitepna bangin Solomon chu chihna apen; chutichun Hiram le Solomon kah-a chamna aumin; amanin kiguijopna aneigel lhonne.

¹³Chuin Solomon lengpan Israel jouse lah-a konin natong honkhat aphutdoh-in; natonghon hochu pasal sangsomthum ahiuve.

¹⁴ Chuin aman amaho chu Lebanon'a asolin, lhakhatna sangsom cheh-in akilhahsah-in; Lebanon'a lhakhat umjiuva, in'a lhani umji ahiuvin; chule Adoniram chu natongho vesuija pang ahi.

¹⁵Solomon'in molsang ho-a chun thilgih poho mi sangsomsagi aneijin, chule songkheng them mi sangsomget aneijin,

¹⁶Natohnaho chunga Solomon vaipo pipuiho tilouvin, natohna-a mipi ho chunga vaihom dingin mi sangthum leh jathum aneijin ahi.

¹⁷Chuin lengpan thu apen, inbul setna dingin song len tahtah, chule manlutahtah song kikhengho ahinpouvin ahi.

¹⁸Chuin Solomon insaho, Hiram insaho, chule Gebal mi song khengho chun hicheho chu akhengun, chutichun insah nadin thingle songho chu agong uvin ahi.