Read Thado Chin 1 Lengte 6 Bible Online

1 Lengte 6 - Thado Chin bible

1 Lengte 6

¹Chuin ahitin ahi, Israel chate Egypt gama ahungpot doh-u kum jali le kum somget lhinkum, Israelte chunga Solomon alengchan kum li na, Zif lha, hichu alha ni chana ahin, Solomon'in Pakai houin ding chu asapan tan ahi.

²Pakai dinga Solomon lengpa houin sahchu adunglam tong somgup, availam tong somni, chule asanlam tong somthum ahi.

³Chule houin mailama ahongcha chu a-invai adungjuija adunglam tongsomni ahin, invailam amaichu tongsom ahi.

⁴Chule houin dinga chun bangkot jim vah lutna asemin ahi.

⁵Chule houin bang kimvela chun indan ahoi kimvelin, houin bangho jon kimvel, houin le houna mun'a chun indan ahoi kimvele.

⁶Dan noinungpen chu tong nga-in alenin, alai chu tong gupmin alenin, chule athumna chu tong sagin alenne. Inkamho chu inbangho-a akihendet lounadin inbang sunglama chun akingapna din akimvela chomcha adosah-e.

⁷Chule houin kisah sunga chu seh le heicha, ahiloule thih manchah gin insunga chu akijah louna dinga, insah na-a kimangcha songho chu kikheng tohsa-a hin kipolut ahi.

⁸Chuche danlai kotkhah chu houin jetlam sanga aumin; amaho chu kalbi-a danlailha-a chiu kaltoujiu, danlaija kona chu athumna-a kaltou jiu ahi.

⁹Hitichun houin chu asan, ajouvin, houin chu cedar thingtum le thingpeh-in atomin ahi.

¹⁰Aman houin jonna chun indanho asa-in, tong nga-a cheh-a sangin asan; hicheho chu houin chunga cedar thingtuma kingamin ahi.

¹¹Chuin Pakai thu Solomon henga ahung lhungin, hitin aseije;

¹²Nangman nasah houin chungchanga hin, kachonna dan kisunho najuija, kathutanho najopma, kathupeh ho jouse nanit na, hichu najuija ahile; napa David henga kanasei thu chu nachunga kalhunsah-a,

¹³Israel chate lah-a kachena, chule kami Israelte kanungsun louding ahi, ati.

¹⁴Chutichun Solomon'in in chu asan ajoutai.

¹⁵Chule houin sunglam bang ahin, lhong ahin, chuleh in chung ahin ceder thingpeh-in atomin; hiche chunga chun asunglam chu thingin atomin, inlhong chu chahthingpeh-in atomin ahi.

¹⁶ Chule inbangho chu tongsomni cheh-in lhongle bangho chu cedar thingpeh-in asan; houna mun, muntheng chungnung jenga jongchun asunglam hititah chun abolin ahi.

¹⁷Chule chuche houin mai chu tong somlia saova ahi.

¹⁸Chule insung lama chun apah mumle apahlha pahcha banga kijem cedar thing aumin; aboncha cedar thinga kisem ahi, song khatcha muding aumpon ahi.

¹⁹Chule Pakai kitepna thingkhong koina dingin insung lama chun Pathen houna muntheng agongin ahi.

²⁰Chule houna mun sunglam chu tong somni, atoa tong somni, alet tong somni, asan tong somni ahin, hichu sanathengin alonkhum cheh-in, chule cedar thing maicham chu chutima chun alonkhumin ahi.

²¹Chutichun Solomon'in insunglam chu sanathengin alonkhum sah-in; chule houna mun maicham chu sanaguijin indan khenna asemin, hichu sanatwi jin alonkhum sah-in ahi.

²² Chuin houin pumpi chu injouse ajosoh kah-un sana alonkhumin, houna mun koma maicham pumpi jongchu sana-in alonkhumin ahi.

²³ Chule houna mun sunga chun olive thingin Cherubim ni, tongsom cheh-a sangin asemin ahi.

²⁴Chule Cherub khatpa lhavingchu tong nga ahin, Cherub chompa lhaving chu tong nga ma ahi; khatpa lhaving monga pat, achompa lhaving mong geichu tongsom ahi.

²⁵Chule Cherub chompa chu tongsom ahin, Cherub teni chu alet aneu kibangchet ahi.

²⁶Cherub khat sandan chu tongsom ahin, Cherub khatpa jongchu chutima chu ahi.

²⁷Chule Cherub teni chu insung nunga chun atungin, Cherubim teni lhaving chu akijahdoh gelin; chutima chun Cherub khatpa lhavingin bang langkhat chu atongkhan, alhaving lhonchu inlailung tah-a akigotkhan ahi.

²⁸Chule Cherub teni chu sanatwijin kilonkhumin ahi.

²⁹Chule inbang jouse kimvel chu Cherubim le lusuphung, pahcha, chule pahcha pahlhan asungle apo ajem hoijin ahi.

³⁰Chule inlhong asungle apochu sanatwijin alonkhumin ahi.

³¹Chule houna mun lutnadin olive thingin kot asemin; kotchungle kotbang hochu bang hopnga-a hopkhatjen ahi.

³²Chule kot teni chu olive thing ahigelin; achung lhonchu Cherubim le lusuphung, chule pahchapah phungin ajempolin, hihochu sanatwijin alonkhumin, Cherubim le lusu phungho chung chu sanatwi athekhumin ahi.

³³Chutima chun houin kotbengho chu, bang hop li-a hopkhatjen olive thingin asemin ahi.

³⁴Chule kot teni chu chahthinga kisem ahin; kotkhahpeh tenichu akilhepthei ahin, kot pheng chompa peh teni jongchu akilhepthei ahi.

³⁵Hiche chungchu Cherubim le lusuphung, chule pahcha pahlhan ajemin; akijempah chungchu sanan atom nalaijin ahi.

³⁶Houin sungnung chu song kikhen jolsa golthum, chule cedar thingtum golkhatnin asan ahi.

³⁷Kum li lhina, Zif lha-a Pakai houin bul chu kiphutna ahin;

³⁸Chule kumsomle khatna, Bul lha, hichu lha getna ahin, houin pumpi chu akigon dungjui cheh-in akijou sohtan ahi. Chutichun hiche sahna-a chun kum sagi alutnin ahi.