Read Thado Chin 1 Lengte 7 Bible Online

1 Lengte 7 - Thado Chin bible

1 Lengte 7

¹Ahin Solomon'in amatah in sahnan kumsomle kumthum alut sah-in, a-in chu abonchan ajoutai.

²Aman Lebanon gammang in jongchu asan: hichu adung tong jakhat, avai tong somnga, asanlam tong somthum ahin, cedar khom gol li kiphutna, hiche khomho chunga chu cedar thingtuma kisa-a ahi.

³Chule thingtumho chunga chu ceder thinga kikhu-a, khom somlenga cheh-a kigol, khom somli le nga chunga kisa-a ahi.

⁴Chule golthum na-a bangkot aumcheh-in, vahle vah chu golthumin akidongto cheh uve.

⁵Chule kotpi jousele khomho chu ningli cheh ahin, bangkot hotoh vahle vah chu golthumin akidongto cheh uve.

⁶Aman khomho neijin thutanna hongcha jongchu asemin, hichu asaodan tong somnga ahin, chule avai chu tong somthum ahi. Chule hongcha chu amai lama aumin, khom dangho leh inkam lentah chu amailam sanga aumin ahi.

⁷Chujouvin thu atan theinadin, laltouna hongcha asemin, thutanna hongcha jong asemin; hichu lhong langkhatna patna langkhat gei cedar thinga kikhu ahi.

⁸ Chule achenna in hongcha sunga chun inhong chomkhat aneijin, hiche jongchu chutobang ma-a kisa ahi. Solomon'in hiche hongcha tobanghin, ajidinga akipui Pharoah chanu dingin jong inkhat asahpeh-in ahi.

⁹Hicheho jousehi akikheng songho, song atna-a ki-at, song mantam tah jenga kisa ahin, a-inbula patna aleh gei, asung apo, chule inpilen hongsung apolam geija chutia chu kisa ahi.

¹⁰Chule inbulchu song mantam tah ho, song len tahtah, tongsom chenga sao le tong get sao ho-a kise ahi.

¹¹Chule achunglam chu song mantam tah ho, song kitetoh-a kikhengtoh ho, chule cedar thinga kisa ahi.

¹²Chule inlen chu akimvela song kikheng golthum le cedar thingtum golkhat kigola kisa ahin; Pakai indan sungnung le ahongcha jongchu chutobang ma-a chu kibola ahi.

¹³Chuin Solomon lengpan Tyre'a konin Hiram agapuisah-in ahi.

¹⁴Ama chu Naphtali phunga meithai khat chapa ahin, apa chu sum-eng kheng Tyre mi ahi. Amachu chihna le hetkhen themna dimset ahin, sum-eng khenalama thepna nei ahi. Chuin ama Solomon lengpa henga ahungin ana jouse chu atoh pehtai.

¹⁵Chuin aman tong somle tong getna sang sum-eng khomni alhan; chule aletdan chu tongsomle tongni cheh ahi.

¹⁶Chule khom teni vuma tundin, sum-eng kilhajol khom alujum ni asemin, khomjum khatchu tongnga asangin, khomjum khatpa jong tong ngama ahi.

¹⁷Chule khompiteni vuma khom lujum teni jeppahna dingin sum-eng guilen polchit chet asemin; khom lujum khatdin sagi ahin, chule khom lujum khatpa dingin jong sagima aseme.

¹⁸Aman khompiho asemin, avuma khom lujum teni khunadin kolbuthei lim lenvang golni asemin, chutimachun khom lujum khatpa jong abole.

¹⁹Chule hongcha khom vuma ajumchu molhoipah-in akijemin, tongli ahi.

²⁰Chule khom lujum teni chunga apoh dontah-a avang silsel koma chun kolbuthei lim asemin; khom lujum ni kimvella chun kolbuthei lim jani agolin aumin ahi.

²¹Chuin khom hochu houin hongcha-a aphutnin; jetlam khom aphutdoh-in, hiche minchu Jachin asah-in; chule veilam khom chu aphutdoh-in, hiche minchu Boaz asah-in ahi.

²²Chule khompi vuma chun molhoipah lim achongin, chutichun khom natoh akichaitai.

²³Chuin twibem khat asemin, ageikhatna pat langkhat gei tongsom ahin; apuma kikolsoh ahin, asanlam tong nga ahin; chule akimvela kikolchu tong somthum ahi.

²⁴Hiche ageinoi kimvel chu pahmun limin avelsoh-in, tongkhat sunga pahmun som cheh asemin, twibem chu pahmunin akolkhumin ahi; pahmunchu akisun chun golnin akisungin ahi.

²⁵Hichu bongchal somleni chunga kingam ahin, thumin sahlam angan, thumin lhumlam angan, thumin simlam angan, thumin solam angat ahi. Twibem chu amaho chunga kikhang ahin, ameiju chun sunglam angat cheh ahi.

²⁶Hichu asalam khutphang te-a sa ahin, ageichu khon gei tobang ahin molhoipah-a kijemin; asung chun twitena bath sangni adolin ahi.

²⁷Chuin aman sum-eng khomtodom som asemin, khomtodom khat chu adung tongli ahin, avai tongli, chule asan chu tong thum ahi.

²⁸Chule khomtodom boldan chu hiti ahi: hicheho chun agei anei cheh-un, hiche ageiho chu akoho kikah-a kikhumlut cheh ahiuve.

²⁹Chule ageiho kikah-a akoho-a chun keipi bahkaiho, bongchalho, Cherub ho lim aumin; ageiho chunga chun tunsonna aumin, keipi bahkai le bongchalho noilam chu khut thema jephoina akisemin akibelap cheh-in ahi.

³⁰Tunsonna tinin sum eng kangtalai li cheh, sum-eng kong licheh aneijun, aninglia kingapna aumcheh-in, kisilna bel noija kingapna kisung aumin, aning cheh-a belapna umcheh ahi.

³¹Alujum kikol sung akam chu tongkhat lha ahin, hiche akam vangchu tunsonna abem banga kikolbem ahin, tongkhat le akeh ahi. Chule akam gei kimvel chu kigeihoi ahin, aningli ahin, abem ahipoi.

³²Ageiho noija kangtalai li aumin, kangtalai ajolpi chu tunsonna toh akimatnin; akeng khatchu tong khatle akeh-a sang ahi.

³³Chule akang boldan chu sakol kangtalai kiboldan bang ahin, ajolpiho, alaibohho, akaldet naho, ajangho chu akisuntho cheh ahi.

³⁴Chule tunsonna ningli cheh-a akingapna licheh uma ahin; hiche akingapna hochu tunsonna toh pumkhat ahi.

³⁵Tunsonna chungvuma chun tong keh-a sang velkol khat aumin, tunsonna chunga ageihole akoho chu thakhat ahi.

³⁶Ajehchu chuche ageipehle akoho chunga chun ahithei bang bangin Cherub ho, keipiho, tumthingho lim achonsah-in, akimvela ajephoina aumsoh keijin,

³⁷Hiche tobang cheh hin tunsonna som abolin; abona pumkhatna kisung ahicheh-in, tena thakhat, alet thakhat cheh ahi.

³⁸ Chujouvin kisilna belson sum engin asemin, kisilna bel khatnin twitena dim somli adolin; bel jouse chu tongli cheh ahin, tunsonna som chunga kisilna bel khat akitung cheh-e.

³⁹Chule tunsonna nga houin jetlama atungin, ngama houin veilama atunge. Chule twibem chu houin jet lama niso lamngan atungin ahi.

⁴⁰Chule Hiram'in kisilna belho, vutloho, maiphet kongho asemin ahi. Chutichun Hiram'in Pakai houin'a dinga Solomon'in asemsah ho jouse chu ajousoh heltan:

⁴¹Khomni, khom ni chungvum alujum chunga kisem twithol teni, chule khom teni chungvuma alujum teni-a twidol tobang kikoi khuna-a kisem lenvang ni;

⁴²Chule chuche lenvang dinga kibol kolbuthei jali, khomteni chunga twidol khuna ding lenvang khatna kolbuthei vui ni;

⁴³Chule tunsonna somle tunsonna chunga kisilna bel som,

⁴⁴Chule twibem khatle twibem noija bongchal somleni,

⁴⁵Belho, vutloho le maiphetna kongho, chule kongle belho jouse, Pakai houin'a dinga Solomon lengpan Hiram asemsah hochu sum-eng duljet cheh ahi.

⁴⁶Jordan phaicham, Succoth le Zarthan kikah leilai mun'a lengpan hicheho chu asun sah ahi.

⁴⁷Chule kongle belhochu atam behseh jeh-in Solomon'in telouvin amoh koitan, sum-eng gih jong hetsoh jouhoi ahipoi.

⁴⁸ Chule Solomon'in Pakai in'a um kong leh bel jouse asemin: sana maicham le vetsahna changlhah koina sana dokhang,

⁴⁹ Chule houna mun masanga kikoi thaomei khom; jetlama nga, chule veilama nga, pahchaho leh meivah ho chule sana cheichaho,

⁵⁰Chule khonho, meivahpon, chena ho, maiphetna kongho, thihkheho, sanatheng sela kisem lhengho; insung gilla muntheng pentah kotkhah ho le houin kotkhah ho kibutona ho chu sana ngenin asemin ahi.

⁵¹ Chutichun Solomon lengpan Pakai in'a dinga asem jouse chu achaisoh tai. Chuin Solomon'in apa David pehdohsa dangka, sana, chule kong leh bel ho geijin ahin polutnin, Pakai in'a gouho lah-a chun akoitan ahi.