Read Thado Chin 1 Lengte 8 Bible Online

1 Lengte 8 - Thado Chin bible

1 Lengte 8

¹ Hitichun Solomon'in Israel upaho, phungho jouse upaho, Israel sonho lah-a upaho chu, David khopi Zion'a kona Pakai kitepna thingkhong potou dingin Jerusalem'a akhomin ahi.

² Hijeh chun Israel mijouse chu lha sagina, Ethanim lha-a kut kibola chun Solomon lengpa henga amaho le amaho ahung kikhomun ahi.

³Hitichun Israel upaho jouse chu ahungun, chule thempuho chun kitepna thingkhong chu apuvin ahi.

⁴Chuin amahon Pakai kitepna thingkhong, houkhomhole houbuh pon, chule houbuh-a um kong leh bel thengho chu ahin potouvun; hicheho jouse chu thempuho le Levi hon apotouvun ahi.

⁵Chule Solomon lengpa le Israel mipi kikhomho, ama henga hung kikhomho jouse chu amatoh kitepna thingkhong masanga aumuvin; kelngoile bongchal atamval jeh-a simjou hilou le ajat hetthei jouhoi hilouvin ganlhaina aneijuvin ahi.

⁶Chule thempuhon Pakai kitepna thingkhong chu aumnading mun, insunggil houna mun, muntheng pentah sung, Cherub teni lhaving noija chun akoi taove.

⁷Ajehchu Cherub teni chun kitepna thingkhong umna chung chu alhateni ajahkhuma, Cherub teni chun kitepna thingkhong le achunga moljol teni chu ahop sohkei ahi.

⁸Chule moljol teni chu agasao doh-in, houmun masang munthenga konchun akimu phan ahi, ahin polama konin vang akimupoi; chule hichu tunichan geijin chua chun aumjingin ahi.

⁹ Kitepna thingkhong sunga chun Egypt'a kon ahung potdoh laijuva, Pakaiyin Israel chate toh kitepna anei laija, Mosi'n Horeb molsanga anakoi songpheng ni tailou imadang aumpon ahi.

¹⁰ Chuin ahitin ahi, thempuho munthenga kona ahungdoh phatnun, Pakai in chu meipin ahinkhu dimtan ahi.

¹¹Hitichun thempuho chu meipi jeh-in kinbolin adingthei tapouve. Ajehchu Pakai loupina-in Pakai in chu alodim sohtan ahi.

¹² Chuin Solomon'in hitin aseije, Pakaiyin muthim satah-a chu kaumding ahi ati.

¹³Keiman tahbeh-in nachen nading in kasah peh-in, Tonsotna naum nading mun kasahpeh-e.

¹⁴Chuin lengpa akile heijin, Israel houkhom ho jouse chu phatthei aboh-in, (Israel houkhom ho jouse chu ading sohkeijun ahi.)

¹⁵Chuin aman, Israel Pakai Pathen chu nunnom hen, aman kapa David henga akam ngeijin anaseijin, akhut ngeijin asubulhitnin,

¹⁶ Keiman kami Israelte Egypt gama kona kapuidoh nikho-a pat, kamin umna ding in sah nadingin Israel namjouse lah-a khopi khatcha jong kanalheng khapon; ahinla kami Israelte chunga vaipodin David kana lhenge, ati.

¹⁷ Chuti chun kapa David'in Israel Pakai Pathen min dinga in sah ding chu alungelin anatupmin ahi.

¹⁸Ahin Pakaiyin kapa David jah-a, nalung gillin kamin dinga in sah ding natup lheh-in, hitobang lung naput hi aphalheh-in ahi.

¹⁹ Hijeng jongle nangman in chu nasah louding ahi; amavang nachapa, nataiguija hung pengdoh dingchun kamin dinga in chu asah ding ahi, ati.

²⁰Chuin Pakaiyin athusei chu asudetnin, Pakai thutan bangin kapa David munchu kahinlotan, Israel laltouna-a chun kahung toutan, Israel Pakai Pathen min dingin in chu kahin satan ahi.

²¹Chule hia chun, Egypt gama kona ana puidoh laija, Pakaiyin ipu ipateu to ana kitepna, hiche thingkhong umna ding mun chu kagongin ahi.

²²Chuin Solomon chu Pakai maicham masang, Israel houkhom ho jouse masanga adingin, van lama akhut ajahdoh in:

²³Vo Pakai, Israel Pathen, nasohte alung pumpiuva nangma masanga lamlhaho henga akitepna le khotona musah-a, nangma tobang Pathen himhim chunglam van'a le noilam leija aumpoi;

²⁴Nangman nasoh kapa David nathutep jouse nanit in; nangman nakamin thu naseijin, tunia banghin nakhutnin naguilhun sah-in ahi.

²⁵ Hijeh chun tun, Israel Pakai Pathen, nasoh kapa David henga nanasei, nangma kamitmu-a nalam lhah banga, nachate achih theijuva alamlhah uleh, Israel laltouna-a keima angsunga touding losam ponte, tia naseichu nitnin.

²⁶Chule tun, vo Israelte Pathen, katao ahi, nangman nasoh kapa David henga nanaseisa chu sudet teijin.

²⁷ Hijeng jongle Pathen chu leija hin acheng mong nadem? vetan, vanle vanho van'in nadol joulou ahin; ka houin sah hi ichana lhasamjo hitam?

²⁸Ahivangin, vo Pakai, ka Pathen, nasoh taona le thumna hi nei jabolpeh-in lang; nasoh tunia ataona, nahenga angehna le ataona hi ngaipeh-in.

²⁹ Hitia chu hikoma hi kamin umding ahi tia nanaseina mun, hiche houin lam hi namitnin sunle jana avet jinga, chutia chu nasoh-in hiche houin munlam nga-a ataona nangaipeh theina ding kati ahi.

³⁰Chule nasoh, chule nami Israelte ngehna ngaipeh inlang, hiche munlam nga-a atao tenguleh; nachenna mun van'a konin ngaipeh inlang, chule najah teng, ngaidamin.

³¹Khattouvin aheng akom chunga asuhkhella, acham louva kihahsel dinga auma, hiche houin'a maicham masanga kihahsel dinga ahungleh;

³²Chuteng nangman van'a konin ngaipeh inlang, kipanin, nasohte thu tanpeh-in; migilou chu anatoh lampi chu aluchunga chuhsah inlang, chule michonpha chu achonphatna dungjuijin themchan sah-in.

³³Nami Israelte hin nang douna-a achonset jeh uva, melmate anga vohlhuh a aumuva; chuteng nangma lam ahin ngat kitnuva, namin aphondoh uva, hiche houin'a hi taona le ngehna aneijuva ahileh,

³⁴Chuteng nangman van'a konin ngaipeh inlang, nami Israelte setna chu ngaidamin, chule apu apateu napehna gamsunga lepui kitnin.

³⁵Nangma douna-a achonset jeh uva van akikha-a, go ajuhlou teng, hilam nga ataovuva, namin aphondoh uva, chule nangman amaho nabolgenthei jeh-a achonset naova kona alungu aheijuva ahileh,

³⁶Chutengle nangman van'a konin ngaipeh inlang, achenadiu lampipha nahila, chule namite goulo dinga napehna gama hi go najuhsah nadingin, nasohte le nami Israelte setna chu ngaidamin.

³⁷Gamsunga kel alhah-a, hise alanna, huise, thingtam, khaokho, ahiloule lungmul alana, amelma teovin akhopi houva aumkol uva, itobang suhgamna le itobang natna ahunglhuna ahijongle,

³⁸Khat touvin, ahiloule nami Israelte jousen, itobang taona hihen, itobang ngehna hijongle, alungsunga hahsat nei ahi akihetna, hilam nga-a akhut ahin jah-a ahile;

³⁹Chutengle nachenna mun van'a konin ngaipeh inlang, ngaidamin, kipan inlang, mitin alamlhah dungjui cheh le alung gelu nahet bangin lethuh-in, (ajeh chu nangma jengbou mihem chapate lungsung he-a nahi.)

⁴⁰Chutiachu nangman kapu kapateu napeh gamsunga hi achenlai seuva nangma nagin theidiu ahi.

⁴¹Chukalvalin, nami Israel hilouho gamdangmi, namin jala gamlatah-a kona hung kalsongho chungchanga;

⁴²(Ajehchu namin kithangtah le nakhut thahat tah, chule naban najahdohna chu ajah dingu ahin;) hiche inlam nga-a ahunga atao tengle;

⁴³Nami Israelte banga leiset mijousen nangma nagin theina dinguva namin ahetnuva; hiche ka insah hin namin apui ti ahet theina dinguvin, nangman nachenna van'a konin ngaijin lang, gamchom mihon athum bangu chun bolpeh-in.

⁴⁴Namite nangman nasol nalam lama amelmateu satdinga acheuva, chule nalhentum khopi lam leh, namin dinga kasahpeh hiche in lam nga-a Pakai henga ataovuleh;

⁴⁵Chuteng nangman van'a konin ataonao le angehnao ngaipeh inlang, chule athu uchu gelpeh-in.

⁴⁶Nangma douna-a achonsetnuva, (ajehchu koima chonselou aumpoi,) achunguva nalunghanna, melmate khutna napeh doh-a, amahon gamlatah ham ahiloule naicha gal hinga akai manguva;

⁴⁷Gal hinga akikai mangnao gama akingaito doh uva, akisih uva, chonset kabolun, lamvaijin, khangitlouna kaboltaove, tia gal hinga akaiteu gamachu nahenga thumna ahin neijule,

⁴⁸Chule chutia chu nahenga alung pumpiule alhagao pumpiuva gal hinga kaimanga aumnao, amelmateu gama kona, apu apateu napehna gam, nalhentum khopi, namin dinga kasahpeh houin lam nga-a ahung kileheijuva ataovule;

⁴⁹Chuteng nangin nachenna mun van'a chun ataonao le angehnao ngaipeh inlang, athu uchu gelpeh-in.

⁵⁰Namiten nangma douna-a chonset abol jouseule, nangma douna-a khangitlouna aboljouseu chu ngaidamin; chule soh-a akaimang houvin khotona aneitheina diuvin, a-angsunga khotona musah-in.

⁵¹Ajehchu amaho Egypt gama thih meikonga kona nahin puidoh, nangma mite le nagoulote ahiuve.

⁵²Chutia chu nasoh ngehna le nami Israelte ngehna lama hi namit nahasah-a, chule nahenga atao chanuleh nangaipeh ding ahi.

⁵³Ajehchu vo Pakai Pathen, nangman kapu kapateu Egypt gama kona napuidoh laija, nasoh Mosi-a kona nasei banga, nagou lodinga vannoi mijouse lah-a kona amaho chu nakhendoh anahi.

⁵⁴Chule chutichun Solomon'in Pakai henga taonale ngehna jouse achai phatnin, Pakai maicham masanga adilsuh na-a konin, akhut teni-a vanlam sangpumin ahung dingdoh tan ahi.

⁵⁵Chuin adingin, Israel houkhom ho jouse chu aw gingtah-in phatthei aboh-in, hitin aseije;

⁵⁶ Athutep dungjuija ami Israelte olna pepa Pakai chu nunnom hen, asoh Mosi khutna athutep phajouse chu thucheng khatcha athon aumpoi.

⁵⁷Pakai i-Pathen'un ipu ipateu anaumpi bangchun, eiho jong eiumpiu hen; Aman eidalha hih-u henlang, nungjong einungsun hih-u hen,

⁵⁸Chutile alampi jouse jotdingle, iputeu thu anapeh banga athupeh ho, adanthuho, athutanho nitna dinga ilungthimu ama lama eiheilut peh dingu ahi.

⁵⁹Chule phattina asohte ngaichatna le ami Israelte angaichat dungjuija angaitopeh theina dingin, Pakai anga kangehna hiche thucheng hohin, asun ajanin Pakai i-Pathen koma umjing hen;

⁶⁰Chutia chu leiset mijousen Pakai chu Pathen ahin, adang khatcha aumpoi ti ahet dingu ahi.

⁶¹Hijeh chun tunikho-a banghin adanthuho mangdingle, athupehho nitdingin, Pakai i-Pathen'u henga nalungthimu phachamkim hen, ati.

⁶²Chuin lengpa le aumpi Israelte jousen Pakai masanga ganlhaina apeuvin ahi.

⁶³Chuin Solomon'in chamna thiltoho, ganlhaina Pakai henga atochu, bongchal sangsomni le sangni, chule kelngoi sangjakhat le sangsomni ahi. Hitichun lengpa le Israel chate jousen Pakai in chu athenso taovin ahi.

⁶⁴Hiche nikho chun lengpan Pakai in masanga um hongcha lailung chu asuthengin ahi; ajehchu aman govam thiltoho, anneh thiltoho, chule chamna thiltoho thao chu atoh-in ahi: ajehchu Pakai masanga um sum-eng maicham chu govam thiltoho, anneh thiltoho chule chamna thiltoho thao sanna dinga chu neo behset ahi.

⁶⁵Chuin hiche petchun Solomon le Israelte jouse, Hamath kho lutna-a pat Egypt vapi geija houkhom mipi tamtah ho chun, nisagi, chule nisagi ma, ni somle nili sungin kut abolun ahi.

⁶⁶Anigetnin mipi ho chu asolmangin, chule amahon lengpa chu phatthei aboh-un; Pakaiyin asoh David dingle ami Israelte dinga aphatna jehchun aponbuh lamuvah kipahtah le lungkipah tah-in achetauve.