Read Thado Chin 1 Lengte 9 Bible Online

1 Lengte 9 - Thado Chin bible

1 Lengte 9

¹Chuin ahitin ahi, Solomon'in Pakai in le leng in, Solomon'in ama lunglhaina bangtah-a boldinga atup jouse chu aboljou phatnin;

² Chuti chun Gibeon'a ahenga akilah bangchun, aniveinan Pakai chu Solomon henga ahung kilah-in ahi.

³Chuin Pakaiyin ahenga, ka-anga nataona le nathumna chu kangaipeh tan; a-imatih chana kamin umna dinga nasah hiche in hi kasu thengtan, kamit teni le kalungthim hia chu umjing ding ahi.

⁴Chule nangma jong kathupeh jouse bangle napa David umchan banga, lungthim dihtah le chondih tah-a kamit mua na-uma, kadan thuho le kathutanho najui jinga ahile,

⁵ Chutengle Israelte laltouna-a touding mi kisudong ponte tia napa David henga kana kitepna bangin, Israel chunga nalenggam laltouna chu a-itih-a dinga kaphudet ding ahi.

⁶Amavang nangma le nachaten keima neijui naova kona nakihei manguva, najuidaova na-ang uva kakoi kathupeh ho le kachonna dan kisunho najuidaova, pathen dangho kin nagabol uva, nagahou vuleh,

⁷Chutengle keiman amaho kapehsa gama kona chu Israelte chu kasuhmang ding; chule kamin dinga kasuhtheng hiche in hi kamitmu-a kona kapaidoh ding, chule Israel hi mijouse lah-a thuchih le paochamtuh-a pangding ahiuve.

⁸ Chule hiche in hi, kichoisang tah hijongle, ajotpa jousen adatmouva, akhoisat khumdiu; iti dana Pakaiyin hiche gamsung le hiche in hi hititah-a abol hitam? atidiu ahi.

⁹Chule amahon, Pakai a-Pathen'u, apu apateu Egypt'a kona puidohpa chu adalhah uva, pathen dangho akolchah uva, ahou uva, akinu aboltah jeh-uva Pakaiyin hiche thilse jousehi achunguva alhunsah ahi, ati dingu ahi.

¹⁰Solomon'in in ni, Pakai in le leng in asah kum somni akichaijin, ahitin ahi.

¹¹(Tun Tyre lengpa Hiram'in Solomon chu cedar thingho, chahthingho, sanaho, angaichat dungjuijin apen,) chule Solomon lengpan Hiram chu Galilee gama khopi somni apen ahi.

¹²Chuin Hiram Tyre'a konin Solomon'in apeh khopiho vedin ahungdoh-in, ahin hicheho chu alunglhaina ahipon ahi.

¹³Chuin aman kasopipa, nangman neipeh hohi itobang khopi bepseu hitam? ati. Chule aman hicheho chu Cabul gam asah-in, tuni geihin akisahden tan ahi.

¹⁴Chule Hiram'in lengpa chu sana talent jale somni athotnin ahi.

¹⁵Chule Solomon lengpan natong honkhat asemlona ajehchu hiche ahi: Pakai in le ama in chule Millo sah nading, chule Jerusalem, Hazor, Megiddo, chule Gezer kulbang sahna ding ahi.

¹⁶Ajehchu Egypt lengpa Pharoah chu achetouva, Gezer khopi agalah-a, hichu meijin ahala, chule khopi-a cheng Canaan miho chu atha gama, achanu, Solomon jinu chu kipaman thilpeh dinga apeh ahi.

¹⁷Chuin Solomon'in Gezer le Beth-horon lhangnung chu asan,

¹⁸Baalath chule chuche gamthipma Tadmor,

¹⁹Chule Solomon'in anei thilkhopna khopiho jouse, akangtalai ho ding khopiho, asakol chung touho ding khopiho, chule Solomon'in Jerusalem le Lebanon, chule ama gamvai pohnaho sunga sahdinga agot chanchu asaovin ahi.

²⁰Chuin Israel chate hilou, Amor mite, Hit mite, Perizz mite, Hiv mite, Jebus miteho-a kona kidalha mijouse,

²¹Chuche gama amaho nunga kidalha-a achateu, Israel chaten jong asuhmangsoh joulouho chu, hicheho chunga chun tuni chanin Solomon'in hunama soh natongin anasemin ahi.

²²Israel chate vang Solomon'in soh-in anasempon, ahinla amaho chu galbol mi, ama lhachate, ama pipuiho, agal lamkaiho, chule kangtalai ho le sakol chung touho vaipon apansah-in ahi.

²³Hichehohi Solomon natohna chunga pipui dehho ahiuvin, nakitoh na-a mipi ho chunga vaipoho chu janga le somnga ahiuve.

²⁴Ahinla Pharaoh chanu chu David khopi-a konin Solomon'in amanu dinga in asahpeh-a chun ahungtoutan ahi. Chuin aman Millo chu asan ahi.

²⁵ Chuin Pakai dinga asem amaicham chunga chun Solomon'in kumkhat sungin govam thiltoho le chamna thiltoho thumvei atohjin, chule Pakai masanga um maicham chunga chun namtui ahalin ahi. Hitichun houin chu ajoutai.

²⁶Chuin Solomon lengpan Edom gama, Twipisan pang, Eloth koma um, Ezion-geber mun'a chun kongho asemin ahi.

²⁷Chuin Hiram'in asohte, twipi lampanga thepna neiho chu Solomon sohte toh natongkhom dingin, kong khatna ahin solin ahi.

²⁸Chuin amaho chu Ophir'a ahungun, chua konchun sana talent jali leh somni ahin lapaovin, hichu Solomon lengpa henga ahinpouvin ahi.