Read Thado Chin 2 Lengte 1 Bible Online

2 Lengte 1 - Thado Chin bible

2 Lengte 1

¹Chuin Ahab thi nungin, Moab mite chu Israel dounan akiphin taovin ahi.

²Chuin Ahaziah chu Samaria'a um a-indan chungnung akalbi vang kah-a alhamangin, adammo tan ahi. Chuin thupole ho asolin ajah uva, kanatna-a konahi kadamdoh kitding hinam ti Ekron pathen Baalzebub chu gadop temun, ati.

³Ahinla Pakai vantil'in Tishbi mi Elijah jah-a, kipat inlang chen, Samaria lengpa thupole ho gakimupin, chule ajah uvah hitin gaseijin, Israel gamsunga Pathen umloujeh-a Ekron pathen Baalzebub donga che nahiuvem?

⁴Hijeh chun tun Pakaiyin aseije, nangma nakaltouna jalkhuna kona kumlha louva thiden teiding nahitai tin seipeh un, ati. Chuin Elijah akipatdoh tai.

⁵Chuin thupole ho ahenga ahung kilekit phatnun, aman ajah uvah ibola hung kinungle pai nahiuvem? ati.

⁶Chuin amahon ajah-a, Mikhat eikimupi diuvin ahung touvin kajah uvah, nahinsolpao lengpa henga kinung leovin lang ajah-a, Pakaiyin Ekron pathen Baalzebub donga nacheu chu, Israel gama Pathen umloujeh hijaham? hijeh chun nangma nakaldohna jalkhuna kona kumlha louva nathiden teitei ding joh ahi ati, atiuve.

⁷Chuin aman ajah uvah, nakimupi diuva hungtouva, hiche thuho nahilpao chu itobang melpu ham? ati.

⁸ Chuin amahon, ama mimul ahin, akonga savun konggah akigah-e, tin adonbutnuve. Chuin aman Tishbi mi Elijah ahi, ati.

⁹Chujouvin lengpan somnga chunga gal lamkaipa le anungjui somnga hochu ahenga asolin ahi. Chuin amapa ahenga achetouvin; chuin, vetan, ama lhangvum khatna anatouvin ahi. Chuin amapan ajah-a, Pathen mipa, lengpan hungkum suh-in tin aseije, ati.

¹⁰ Chuin mi somnga chunga gal lamkaipa chu Elijah'in adon butnin, keima Pathen mi kahia ahile, van'a konin mei hung lenglha henlang, nangma le nanungjui somnga hochu kavam helhen, ati. Chuin van'a konin mei ahungleng lhan, amale anungjui somnga hochu akavam heltan ahi.

¹¹Aman avelin, somnga chunga gallamkai le anungjui somnga ma asol kitnin ahi. Chuin amapan adonbutnin, ajah-a, vo Pathen mipa, lengpan hungkumlha loijin ati, ati.

¹²Chuin Elijah'in adonbutnin, ajah uvah, keima Pathen mi kahia ahile, van'a konin mei hung lenglha henlang, nangma le nanungjui somngaho kavamhen, ati. Chuin van'a konin mei ahungleng lhan, ama le anungjui somnga hochu akavam heltan ahi.

¹³Chuin aman athumvei channa-in somnga gallamkai khat anungjui somnga toh asolkitnin ahi. Chuin somnga vaipo thum channapa chu achetouvin, Elijah masanga akhupmin adilsun, ahenga ngehna aneijin, ajah-a, vo Pathen mipa, nahenga kathum ahi, keima hinkho le nasohte hicheho somngaho hinkho hi namitmun manlutah hisah-in.

¹⁴Vetan, van'a konin mei ahungleng lhan, somnga vaipo masa teni le anungjui somnga gelchu akavam heltan ahi. Hijeh chun kahinkho hi namitmun manlutah hisah-in, atitan ahi.

¹⁵Chuin Pakai vantil chun Elijah jah-a, ama toh chesuh-in; ama chu kicha hih-in, ati. Chuin ama akipat doh-in, amapa chutoh lengpa henga achesuh tai.

¹⁶Chuin aman ajah-a, Pakaiyin hitin aseije, Israel gamsunga Ekron pathen Baalzebub donga mi nasol chu, Israel gamsunga athu dopthei Pathen umloujeh ham? hichejeh-a chu nangma nakaldohna jalkhuna kona chu nahung kumlhah tahlouhel ding, nathi teitei ding ahi, ati.

¹⁷Hitichun Elijah in asei Pakai thu bangchun ama athitai. Chule Judah te lengpa Jehoshaphat chapa Jehoram lengchan kal kum nina-in, amakhelin Jehoram alengchang tai; ajehchu aman chapa aneipoi.

¹⁸Tun Ahaziah natohle athilbol dangho chu Israel lengte thusimbu ho-a kisuna hilouham?