Read Thado Chin 2 Lengte 10 Bible Online

2 Lengte 10 - Thado Chin bible

2 Lengte 10

¹Samaria'a chun Ahab'in chapa Somsagi aneijin ahi. Chuin Jehu'n Samaria'a Jezreel vaipoho, chule Ahab chate hinvah dohho henga chun lekha athotnin, hitin asune;

²Tun hiche lekha hi nahengu ahunglhun lhunle, napupao chapate chu naheng uva uma, chule kangtalai ho, sakol ho, kulpi kium le galvon jong naneiju ahin,

³Napu-u chapate lah-a aphapen veovin lang, apa laltouna chunga tousah-un, chule napu insung dingin gal sat uvin, ati.

⁴Ahinla amaho akicha behset jengun, veuvin, amasanga leng nibon dingjou louva; eiho iti idinthei dinguham? atiuve.

⁵Chuin leng insunga vaipopa, khopi chunga vaipopa, upaho jong, chule chapangho hinvah dohho nasan chun Jehu henga chun thu athotnun, keiho nasohte kahiuvin, nangin bolin neiti jouseu bolung ting; leng khatcha sem pouvinge: namitmu-a pha nasah chan boljengin, atiuvin ahi.

⁶Chujouvin aniveina-in lekha hitin asun kitnin, keima-a nahiuva, kathu nangai dinguva ahile, napupao chapate luchu hinlaovin lang jingle tuphat hin Jezreel'a kahenga hunguvin, tin asunin ahi. Tun leng chapate chu somsagi ahiuvin, ahin vahdoh-a khopi milen hotoh umngen ahiuve.

⁷Chuin ahitin ahi, lekha chu ahengu alhun phatnin, lengchapate chu amanun, asomsagi chun athatnun, alu chu boma akhumun, chule amahon hichu Jezreel'a athot taove.

⁸Chuin thangkou khat ahungin, amahon lengpa chapate lu ahinpo taove, tin amachu aseipeh-e. Chuin aman khopi lutna akhun lhuhnin lhu khomun lang, jingkah geijin umhen, ati.

⁹Chuin jingkah-in ama apotdoh-in, adingin, mijouse jah-a chun, nangho michonpha nahiuve: veuvin, kapu chu ka changlhin kathat tai. Ahinla hicheho jousehi koitha ham?

¹⁰Pakaiyin Ahab mite chungthu asei Pakai thuchu halkhat chajong tolla lhamang louding ahi ti tuhin hechennun: ajehchu Pakaiyin asoh Elijah kama aseichu atohdoh ahitai, ati.

¹¹ Hitichun Jehu'n Jezreel'a Ahab insung mi amoh jouse, amilenho jouse, chule asangkaiho, athempuho khatcha khenlou hela atha chai kahsen athatnin ahi.

¹²Chuin ama akipatdoh-in achen, Samaria ahungtai. Chuin lamdunga kelngoimul vona in'a aumchun,

¹³Jehu'n Judah lengpa Ahaziah sopiho amun, koi nahiuvem? ati. Chuin amahon keiho Ahaziah sopite kahiuvin; lengpa chate le lengnu chate chibai bohdinga chesuh kahiuve, tin adonbutnuve.

¹⁴Chuin aman ahingin man-un ati. Chuin amaho ahingin amanun, kelngoimul vona in kokhuh-a mi somlileni jen athatnun; amaho khatcha khen aneipoi.

¹⁵Chuin chukom adalhah phatnin, Rechab chapa Jehonadab ama lamto-a hung amun: chuin chibai aboh-in, ajah-a, nachunga lungdih kaput banga hi lungdih naputnem, ati. Jehonadab'in kapu nai, ati. Achutile nakhut neihinpen, ati. Chuin akhut agahpen ahile, ama henga kangtalai chunga akai luttai.

¹⁶Chuin aman kahenga hungin lang Pakai dinga katompanje hungven, ati. Hitichun akangtalai chunga atousah taove.

¹⁷Chuin ama Samaria ahunglhun phatnin, Elijah henga Pakai thusei dungjuijin, Ahab insungmi Samaria umjouse chu asuhmanghel kahsen abonchan athat gamtan ahi.

¹⁸Chuin Jehu'n mijouse akoukhomin, ajah uvah, Ahab'in Baal chu anajen maimai ahin; Jehu'n vang aha jencheh ding ahi.

¹⁹Hijeh chun tun Baal themgao jouse, asohte jouse, chule athempu jouseu kahenga hinkouvun; koima alhasam umlou helding ahi: ajehchu Baal henga ganlhaina loupitah kabolding ahin; aumlouchan chu kihinghoi louhel ding ahi, ati. Ahinla Jehu'in Baal houho thagam nadinga, doha thuhtah-a abol ahi.

²⁰Chuin Jehu'n Baal houna dingin khoppilen phongjalun, ati. Chuin amahon aphongjal letaovin ahi.

²¹Chuin Jehu'n Israel pumpi thu athotnin; Baal houjouse ahungun, hitichun ahunglou mikhatcha jong aumpoi. Chuin amaho Baal insunga alutnun; Baal kotbula konin bangtom changei adimset jengun ahi.

²²Hitichun kivonna pon hompa jah-a chun, Baal houho jousehi kivonna pon pecheh in, ati. Hitichun kivonna pon chu apecheh-in ahi.

²³Chuin Jehu le Rechab chapa Jehonadab chu Baal insunga chun alutlhonin, chuin Baal houho jah-a chun, holun lang veleuvin, hiche-a hin Baal houho tailou Pakai mite jong umgetnunte, ati.

²⁴Chuin ganlhaina le govam thilto tohdinga alutphatnun, Jehu'n polama mi somget adinsah-in, ajah uva, nakhut uva kahinpuilut mikhattou ahoidoh auma, ajamdohsah aumle, ajamdohpa hinna khela aman ahinna achanding ahi, ati.

²⁵Chuin ahitin ahi, aman govam thilto achai chaijin, Jehu'n avetuphole gal lamkaiho jah-a, lutnun lang thatnun; khatcha hung dohsah hih-un, ati. Chuin amaho chu chemjamin athatnun; chuin ngahtuple gal lamkaiho chun ahinleh doh-un, khopi-a Baal in'a chun acheuvin ahi.

²⁶Chuin Baal in'a konin milimho ahinpodoh-un, ahalvam taove.

²⁷Chuin Baal milim chu asuchimun, Baal in chu asulhuvin, tunigeijin ehbuh in aneijuve.

²⁸Hitobang chun Jehu'n Israel lah-a konin Baal anasumang helin ahi.

²⁹ Ahijeng vangin Bethel le Dan'a um sana bongnou lim asema, Israel chonset sahpa, Nebat chapa Jeroboam chonset naho-a konin Jehu chu akiheimang dehpon ahi.

³⁰Chuin Pakaiyin Jehu jah-a, kamitmu-a thildih nabola, kalungsunga umho jouse dungjuija Ahab insung chunga nabolphat jeh-a, nachate khang li geija Israelte laltouna-a toudiu ahi, ati.

³¹Ahinla Jehu'n alungthim pumpi-a Israel Pakai Pathen dan thupeh-a chon ding chu akhohsahpon ahi; ajehchu Israelte chonsetsah Jeroboam chonset na-a konin akihei mangpon ahi.

³²Hiche laichun Pakaiyin Israel gamsung chu asukeh pantan; Hazael'in Israel gamsung jouse ahinjou pehtan ahi.

³³Jordan'a pat solamsang, Gilead gam jouse, Gad te, Reuben te, Manasseh te, Arnon vapidung panga Aroer kho-a pat Gilead le Basan geijin ahinlatan ahi.

³⁴Tun Jehu thilbol danghole anatoh jouse chu Israel lengte thusimbua kisunlut hilouham?

³⁵Chuin Jehu chu apu apate toh alumkhomin, amachu Samaria a avuitaove. Chuin achapa Jehoahaz ama khelin alengchang tan ahi.

³⁶Samaria'a Israelte chunga Jehu lengchan phatsung chu kum somni le kumget ahi.