Read Thado Chin 2 Lengte 11 Bible Online

2 Lengte 11 - Thado Chin bible

2 Lengte 11

¹Chuin Ahaziah nu Athaliah'in achapa athi amuphatnin, akipatnin leng chilhah jouse asumangtai.

²Ahinla Ahaziah sopinu, Joram lengpa chanu Jehosheba chun, Ahaziah chapa Joash chu leng chapate kithat ho lah-a konchun anagudoh-in; amale adon nutah chu Athaliah'a konin lupna indan sunga asel honin, hitichun amachu akithat tapoi.

³Chule amanu chutoh Pakai in'a kumget akisel lhone. Chule Athaliah chu hiche gama chun leng achangtan ahi.

⁴Chuin kum sagina-a chun Jehoiada'in mi asolin, jakhat chunga vaihomho, gal lamkaiho le ngahtupho agakou sah-in, amaho chu Pakai insunga ama henga apuilutnin, amaho chu kitepna aneipin, Pakai insunga chun akihahsel sah-in, chule leng chapa chu amaho avetsah-in ahi.

⁵Chuin amaho chu thu apen, hichehi nabol dingu thil chu ahi; nalah uva choldoni-a hunglut ho chu hopthum-a hopkhatnin leng in chu ngah untin,

⁶Chule hopthum-a hopkhat Sur kotpi-a umding, hopthum-a hopkhat ngatupna nunglam kotpi phunga umding: hiti achu in chu achimlhah louna dinga nangatup diu ahi.

⁷Chule nangho choldoni-a potdoh ho jouse lah-a hopni chun, lengpa kimvela Pakai in chu angadiu ahi.

⁸Chule amitakipmin manchah akichoicheh-a, lengpa chu na-umkim veldiu ahi. Chule aki-um sunga hunglut lutchu nanatha diu, chule lengpa apotdoh le ahunglut nalhonpi jingdingu ahi, ati.

⁹Chuin Jehoiada thempu thupeh dungjuijin, jakhat chunga gallamkai hochun abolun; chule amahon choldoni-a hunglut ding amite cheh-u, chule choldoni-a potdoh dingho chu ahinpuijun, Jehoiada thempu henga ahungcheh-un ahi.

¹⁰Chuin thempupan Pakai houin sunga um David lengpa tengcha ho le lumho chu sepai jakhat chunga gallamkai hochu apen ahi.

¹¹Chuin ngahtupa le amitakipmin amanchah-u akhut cheh uva akichoijun lengpa akimvelun, houin ning jetlama pat houin ning veilam gei akigolun, houin le maicham lhon lhungin adingun ahi.

¹²Chuin Jehoiada'in lengpa chapa chu ahinpui doh-in, Lallukhuh chu akhuhpeh-in, het tohsahna chu apen; chuin amahon amachu lengin atungun, thao anuvin; akhutnu abengun, Pathen'in lengpa huhhing hen atiuve.

¹³Chuin ngahtupho le mipi husa chu Athaliah'in ajah phatnin, Pakai in'a mipi ho lah-a chun ahunglut tan ahi.

¹⁴ Amanun agahven ahileh, veuvin, chonna ngaibangin sutpi phunga lengpa chu anadingin, pipuiho le sumkon mut ho lengpa koma chun adingun, gamsunga mipite jouse akipah-un, sumkon amutnuvin ahi. Chuin Athaliah'in apon abot eh-in, kidouna, kidouna tin apeng jah-in ahi.

¹⁵Ahinla jakhat chunga lamkaiho le sepai janel milenho chu Jehoiada thempupan thu apen, ajah uvah, ngahtupho kikah lah-a konin potdoh sah-un, chule amanu juitapou chu chemjamin thatnun, ati. Ajehchu thempupan, amanu chu Pakai houin sunga that hih-un ati ahi.

¹⁶Chuin amanu chunga khut alhaovin; amanu chu lengpa in'a sakol ho hunglutnaji lampia chun achen, chu-a chun amanu athat taove.

¹⁷Amaho chu Pakai mite ahitheina diuvin, Jehoiada'n Pakai le lengpa chule mipi kah-a kitepna asemin, leng le mipi kah-a jong chutichun aseme.

¹⁸Chuin gamsung mijouse Baal insunga alutnun, asuchimun, maicham ho masanga chun Baal thempu Mattan chu athat taove. Chuin thempupan Pakai inpi chunga vaipo ding alhengin ahi.

¹⁹Chuin jakhat chunga lamkaiho gal lamkaiho, ngahtuppa, chule gamsung mipite jouse apuijin; amahohin lengpa chu Pakai in'a konin ahinpuisuh-un, leng in ngahho kotpi lampi ahin houvin ahi. Chuin ama lengho laltouna-a atoutai.

²⁰Chuin gamsung mipi jouse akipah-un, khopi chu athip chetnin; chule Athaliah chu lengpa inpanga chemjamin athatnun ahi.

²¹Jehoash alengchan patchun kum sagibou ahi.