Read Thado Chin 2 Lengte 12 Bible Online

2 Lengte 12 - Thado Chin bible

2 Lengte 12

¹Jehu lengchankal kumsagi na-in Jehoash alenchang panin; chule ama Jerusalem'a kum somli alengchange. Chule anu minchu Zibiah ahin, Beersheba mi ahi.

²Chuin Jehoash chu Jehoiada thempun ahilchah bangin, ahinkho lhum keijin Pakai mitmu-a adihchu abol jingin ahi.

³Ahivangin munsang ho chu akiladohpon; munsang ho-a chun mipi ho chun ganlhaina le gimnamtui halna aneijing nalaijun ahi.

⁴ Chuin Jehoash'in thempuho jah-a, Pakai insunga hinkipolutna akikat dohsa sum jouse, amitakipmin apeh dinga kitepeh dungjuija ato doh-u sum jouse, chule alungsunga Pakai insunga pohlutdinga akigelhah dungjuija atodoh sum jouse chu,

⁵Thempuhon hicheho chu lakhomu hen, mitinin amel hethouva konin lalutnu hen; chule houin selaiho, aselai kimuchanse chu semphat nan neiju hen, ati.

⁶Ahinla ahitin ahi, Jehoash lengchan kum somni le kumthum lhinin thempuhon houin selaiho chu asempha pouvin ahi.

⁷Chuin leng Jehoash'in Jehoiada thempu le thempu dangho akouvin, ajah uvah, ibola houin selaiho chu nasemphat lou uham? hijeh chun tun namel hethouva konin sum latahih-un, ahinla houin selaiho sempha dingho pedoh jengun, ati.

⁸Chuin thempuho chun miho-a kona sum lahtah loudingle amaho tah-in houin selaiho asemphat loudingu chu pha asaovin ahi.

⁹Ahivangin thempu Jehoiada'n thingkhong khat alan, asin agei vangin, Pakai in lutna jetlama maicham panga akoijin ahi. Hichea chun Pakai ina sum kichoilut jouse chu kotngah thempuho chun akoilutji jiuvin ahi.

¹⁰Chuin ahitin ahi, thingkhonga chun sum atamtai ti ahet tenguleh, lengpa lekha sunpa le thempu chungnung chu hungji-a, dipho-a akoijiuva, Pakai insunga kimu sum hochu asimjiu ahi.

¹¹Chutengle amaho asimsao sum chu natongho, Pakai insaho chunga vaipoho khutna apeh jiuva; amahon Pakai in bolna dinga natongho, thingthemho le insaho,

¹²Chule songbol ho, song khengho, chule Pakai in selaiho semphatna dinga thing le song kikhengsa ho chohna dingle, chule angaicha ho jouse-a dinga apehjiu ahi.

¹³Ahijeng vangin Pakai insunga sum hungkichoilut chun Pakai in'a dingin dangka khonho, kong leh bel, twikongho, sumkon ho, sanabelho, dangka belho asemhih laijuve.

¹⁴Ahinla natong miho henga apeuvin, hichu Pakai in semphatna-in amang chaovin ahi.

¹⁵ Chukal valin natongho hoppeh dinga akhutnuva sum apehlutna houchun tahsan umtah-a abol jeh-un, amaho chu avesuisam pouvin ahi.

¹⁶ Pakai in'a chun suhkhelna sumho le chonsetna sumho chu achoilutji pouve. Hichu thempu ho-a ahi.

¹⁷Chujouvin Syria lengpa Hazael achetouvin, Gath agasatnin alatai. Chuin Hazael chu Jerusalem lam ngan achetoutai.

¹⁸Chuin Juda lengpa Jehoash'in apu apate Judah lengho Jehoshaphat, Jehoram chule Ahaziah tehon anakatdoh-u thil thengho jouse, ama thilthengho jouse, chule Pakai in le lengpa in goukhol na-a kimu sana jouse chu alasoh keijin, Syria leng Hazael chu athotnin: chuin Jerusalem'a konin apotdohtai.

¹⁹Chuin Jehoash thilbol danghole anatoh jouse chu Judah lengte thusimbua kisun hilouham?

²⁰Chuin asohte akipat doh-un, achang lhiuvin, Jehoash chu Millo in'a Silla jotsuhna-a chun athat taove.

²¹Ajehchu asoh teni, Shimeath chapa Jozachar le Shomer chapa Jehozabad chun avoh lhona, thia ahi. Chuin amahon David khopi-a apu apatetoh avuitha taove. Chuin achapa Amaziah ama khelin alengchang tai.