Read Thado Chin 2 Lengte 14 Bible Online

2 Lengte 14 - Thado Chin bible

2 Lengte 14

¹Israel leng Jehoahaz chapa Joash lengchan kal kumni na-in, Judah leng Joash chapa Amaziah ahung lengchange.

²Ama alengchan phatchun kum somni le nga ahitan, Jerusalem'a kum somni le kumko alengchange. Chule anu minchu Jehoaddan ahin, Jerusalem mi ahi.

³Chule aman Pakai mitmun adihchu abolin, ahinla apa David bang ahi hihlaije: aman apa Joash boljouse chu anabolin ahi.

⁴Ahijeng vangin munsang ho chu akiladoh dehpon; munsang ho-a chun mipi ho chun ganlhaina le gimnamtui halna anei jiuvin ahi.

⁵Chuin ahung hitin ahi, lenggam chu ama khutna ahungdet detchun, apa lengpa anathat sohte chu ahin thatnin ahi.

⁶ Ahinla Mosi Danbua, chate jeh-a pate thading ahipon, pate jeh-a jong chate thading ahipoi, ahinla amitakip ama ama chonsetna jeh-a kithat ding ahi, tia kisun Pakai danthupeh anakisunsa bangin; tolthat ho chate chu anathatpon ahi.

⁷Edom mite chu chi phaichama sangsom athatnin, Selah khochu galin alan, hiche minchu tunichan geijin Joktheel asah-un ahi.

⁸Chujouvin Amaziah chun Israel lengpa, Jehu chapa Jehoahaz chapa Jehoash henga mi thupole mi asolin, hungin kimaiton khatle khat kivehite, ati.

⁹Chuin Israel lengpa Jehoash'in Judah lengpa Amaziah henga, Lebanon'a um meithai seltho lingin Lebanon'a um Cedar jah-a, kachapa jiding nachanu neipen ati. Chuin hiche munachun Lebanon gamsa khat ahungin meithai seltholing chu achonlhu deltan ahi.

¹⁰Nangman Edom chu najo tahbeh ahin, chule nalungthim chu kichoisang ahitai. Hiche-a chun loupi inlang, in'a kiumthimin; ajehchu ipidinga nangin nalungthima nangmatah le Judah mite toh lhuhtha nading nangaito dingham? ti thu agah thottai.

¹¹Ahinla Amaziah chun ngaipeh-in aneipon ahi. Hijeh chun Israel lengpa Jehoash akontouvin, amale Judah lengpa Amaziah chu Judah gam Bethshemesh'a khatle khat akimaito lhontan ahi.

¹²Chuin Israelte masanga chun Judah chu amaimoh taovin; hichun mitin aponbuh lam cheh-a ajamtaove.

¹³Chuin Israel lengpa Jehoash'in, Ahaziah chapa Jehoash chapa Amaziah Judah lengpa chu Bethshemesh'a amanin, chule Jerusalem'a ahungin, Jerusalem kulpi chu Ephraim kotpi apat aninglama kotpigei tong jalijen asuchimin ahi.

¹⁴Chuin Pakai inle leng in'a gou kholkhom na-a kimu sana le dangka jouse, chule um le bel manchah jouse alan, Samaria'a akiletai.

¹⁵Tun Jehoash'in atohdoh athilbol dangho jouse le athilbol theina, chule Judah leng Amaziah asatdanho chu Israel lengte thusimbua kisunlutna hilouham?

¹⁶Chuin Jehoash chu apu apate toh alumkhomin, Israel lengte toh Samaria'a avuitaove; chuin achapa Jeroboam akhelin alengchang tan ahi.

¹⁷Chuin Judah lengpa Joash chapa Amaziah chu, Israel leng Jehoahaz chapa Jehoash thinungin kum somle kum nga ahing nalaije.

¹⁸Chule Amaziah thilbol dangho chu Judah lengho thusimbua kisun hilouham?

¹⁹Chule tun amahon ama dounan Jerusalem'a thilguh agongun; chuin ama Lachish lama ajamin, ahinla Lachish lama anunga mi asolun, hiche munachun athat taove.

²⁰Chuin amahon sakol in ahinpouvin, David khopi Jerusalem'a apu apate toh avuitha taove.

²¹Chuin Judah mipite jousen kum somle kum gup lhingbep Azariah chu apuijun, apa Amaziah khelin alengchansah taove.

²²Aman Elath kho chu asadoh-in, Judah gama aumsah kitnin, hiche jouchun lengpa chu apu apate toh alumkhom tai.

²³Judah leng Joash chapa Amaziah lengchan kal kum somle kumnga alhinnin, Israel lengpa Joash chapa Jeroboam Samaria'a alengchang panin; kum somli le kum khat aleng changin ahi.

²⁴Chuin Pakai mitmun thilse abolin, Israelte chonsetsah Nebat chapa Jeroboam chonsetna jouse-a konin akikangse pon ahi.

²⁵ Pakai Israel Pathen'in Gath-hepher'a um Amittai chapa asoh themgao Jonah khutna athusei bangin, Hamath lutna-a kona phaicham luipi geijin Israel gamchu alelah kit tai.

²⁶Ajehchu Pakaiyin Israelte nasatah-a athohgimnao chu amun; ajehchu akihen oh-a hihen, akilha onga hile Israelte kithopi ding koimacha aumlou amun ahi.

²⁷Pakaiyin Israelte minhi vannoi'a kona asuhmang ding anaseipon; Joash chapa Jeroboam khutna konin amaho chu ahuhdohjon ahi.

²⁸Tun Jeroboam thilbol danghole anatoh jouse, chule athilbol theina, agal boldan, chule aman tumasanga Judah te chan anahijing Damascus le Hamath kho Israelte dia ahin lelahlut thuho hi Israel lengte thusimbua kisunlut hilouham?

²⁹Chuin Jeroboam chu apu apate, Israel lengte ngeitoh analum khomin; chule achapa Zekeriah ama khelin alengchang tan ahi.