Read Thado Chin 2 Lengte 15 Bible Online

2 Lengte 15 - Thado Chin bible

2 Lengte 15

¹Israel leng Jeroboam lengchan kal kum somni le kum sagina-in, Judah leng Amaziah chapa Azariah alenchang panin ahi.

²Alengchan patchun kum somle kumgup ahin, Jerusalem'a kum somnga le kumni alengchange; chule anu minchu Jecholiah ahin, Jerusalem mi ahi.

³Chuin aman apa Amaziah boljouse dungjuijin Pakai mitmu-a adih chu abolin,

⁴Munsang ho-a bouchu achonmang dehpon; mihon munsang ho-a chun ganlhaina le gimnamtui hal aboljing nalai uve.

⁵Chuin Pakaiyin lengpa chu adengin, hitichun athi nikho geijin aphah-in, intumbeh-a achengtai. Chule leng chapa Jotham chu gamsung mite vaihomin insunglam vaipon apangtai.

⁶Chule Azariah thilbol danghole anatohho jouse chu Judah lengte thusimbu kisutlutna-a kisunlutna hilouham?

⁷ Hitichun Azariah apu apate toh alumkhomin, chule amahon David khopi-a apu apate toh avuitaove. Chuin ama khelin achapa Jotham alengchang tai.

⁸Judah lengpa Zakariah lengchankal kum somthumle kum get lhin na-in, Jeroboam chapa Zakariah chu Israelte chunga Samaria'a lhagup alengchange.

⁹Chule apu apate bolbangin Pakai mitmun dihloutah abol jingin, Israelte chonsetsah-a Nebat chapa Jeroboam chonset naho-a konin akiheimang dehpoi.

¹⁰Chuin Jabesh chapa Shallum'in ama douna-in thilguh agongin, miho anga ajepmin, athatnin, akhelin alengchang tai.

¹¹Chule Zakariah thilbol dangho chu vetan Israel lengte thusimbu sunga akisunin ahi.

¹² Hichehi Jehu henga Pakaiyin thu aseichu ahin, Nachapate chu Israelte laltouna-a khangli geija toudiu ahi tin aseije. Chuin hitichun aguilhung tan ahi.

¹³Juda lengpa Uzziah lengchan kal kum somthumle kumko lhin kum-in, Jabesh chapa Shallum chu alengchang panin, Samaria'a lhakhat lhingset alengchange.

¹⁴Ajehchu Gadi chapa Menahem chu Tirzah'a konin achetouvin, Samaria'a ahungin, Samaria'a Jabesh chapa Shaallum chu avon, athatnin, ama khelin alengchang tai.

¹⁵Chule Shallum thilbol danghole ama thilguh gonho chu, veuvin, Israel lengte thusimbu sunga akisunlut tan ahi.

¹⁶Chuin Menahem'in Tirzah le asunga umjouse, chule agamsung chu Tirzah'a patnin asatnin ahi. Ajehchu ama henga akipehlut loujeh uva asat ahin, chule chuche sunga um numei naovop jouse chu agai akhepeh-in ahi.

¹⁷Judah leng Azariah lengchan kal kum somthumle kum ko na-in, Gadi chapa Menahem Israelte chunga ahung lengchang panin, Samaria'a kum som alengchange.

¹⁸Chule aman Pakai mitmun thilse abol jingin, Israelte chonsetsah Nebat chapa Jeroboam chonset na-a konin ahinkho lhumkeijin akihei mangpon ahi.

¹⁹Chuin Assyria leng Pul chu agamu dounan ahungkonin; chule Menahem'in lenggam chu akhutna suhdet ahina dinga akhut chun aumpina dingin, Pul chu dangka talent sangkhat apen ahi.

²⁰Chuin Menahem'in Israelte mihaoho sum jouse chu, mikhat khatna dangka shekel somnga cheh Assyria lengpa pehdingin adongin ahi. Hitichun Assyria lengpa akinunglen gamsunga aumdenpoi.

²¹Chuin Menahem thilbol danghole atoh jouse chu Israel lengho thusimbua kisun hilouham?

²²Chuin Menahem chu apu apate toh alum khomin, ama khelin achapa Pekahiah alengchang tai.

²³Judah lengpa Azariah lengchan kal kum somnga na-in, Menahem chapa Pekahiah chu Israelte chunga Samaria'a aleng changin, kumni lengvai apon ahi.

²⁴Chule Pakai mitmun thilse abol jingin, Israelte chonsetsah Nebat chapa Jeroboam chonset naho-a konin akikangsepoi.

²⁵Chuin agal lamkai Remaliah chapa Pekah chun guhthimin thilgon aneijin, Samaria leng inpi sunga Argob le Arieh chule akiloipi Gilead mi somnga chutoh avouvin; chule athatnin, a-indan sunga alengchang tai.

²⁶Chule veuvin Pekahiah thilbol danghole atoh jouse chu Israel lengte thusimbua akisunlut cheh-e.

²⁷Judah leng Azariah lengchankal kum somnga le kum ni kum-in, Remaliah chapa Pekah chu Israelte chunga Samaria'a alengchang panin, kum somni alengchange.

²⁸Chule aman Pakai mitmu-a aphalou chu abol jingin, Israelte chonsetsah Nebat chapa Jeroboam chonset naho-a konin akikangsepoi.

²⁹Israel leng Pekah lallaijin, Assyria leng Tiglath-pileser ahungin Ijon, Abel-beth-maachah, Janoah, Kedesh, Hazor, Gilead, Galilee, chule Naphtali gam pumpi alan, Assyria gama amaho chu gal hingin akaitai.

³⁰Chuin Elah chapa Hoshea chu Remaliah chapa Pekah dounan guhthimin thilgon aneijin, asatnin, athatnin; Uzziah chapa Jotham lengchan kal kum somni na-a chun akhelin alengchang tai.

³¹Chule Pekah thilbol danghole atohjouse, veuvin, hicheho chu Israel lengte thusimbua kisunlutna ahi.

³²Israel lengpa Remaliah chapa Pekah lengchankal kumni na-in, Judah leng Uzziah chapa Jotham chu alengchang pantai.

³³Alengchan patchun kum somni le kum nga ahitan, Jerusalem'a kum somle kumgup aleng changin ahi. Chule anu minchu Jerusha ahin, Zadok chanu ahi.

³⁴Hitichun aman Pakai mitmu-a adih chu abolin; aman apa Uzziah boljouse bangchun abolin ahi.

³⁵Hitajongle munsang ho chu akiladohpon, miho chun munsang ho-a chun ganlhaile gimnamtui hal aboljing nalai uve. Aman Pakai in kotpi chungnung chu asan ahi.

³⁶Tun Jotham thilbol danghole anatohho chu Judah lengho thusim kisutlutna lekhabua kusuna hilouham?

³⁷Hiche laichun Pakaiyin Syria leng Rezin le Remaliah chapa Pekah chu Judah te doudin asol pantan ahi.

³⁸Chuin Jotham chu apu apate toh alumkhom tan, chule apa David khopi-a apu apate toh akivuitha tai. Chule achapa Ahaz chu ama khelin ahung lengchangtai.