Read Thado Chin 2 Lengte 16 Bible Online

2 Lengte 16 - Thado Chin bible

2 Lengte 16

¹Remaliah chapa Pekah lengchankal kum somle kum sagina-in, Judah lengpa Jotham chapa Ahaz chu alengchang panin ahi.

²Ahaz ahung lengchan patchun kum somni ahin, chule Jerusalem'a kum somle kum get vai apon, aman apa David bangin Pakai Pathen mitmun thildih abolpon ahi.

³ Ahin Israel lengte lamlhah jouse chu ajotnin; chule Israel chate masanga kona Pakaiyin apaidoh Pathen helouhon abolu thet umtah dungjuijin, achapa chu meija aselutsah-in ahi.

⁴Chule munsang ho le lhangho, chule thinghing jouse noija ganlhaina le gimnamtui ahaljin ahi.

⁵ Chuin Syria leng Rezin le Israel lengpa Remaliah chapa Pekah chu Jerusalem'a gal bolin ahungtou lhonin; chule Ahaz chu aumun, ahinla amachu ajoujou lhonpoi.

⁶Hiche laichun Syria lengpa Rezin'in Elath chu Syria gamdin alelah-in, Judah te chu Elath'a konin adelmangin, Syria te chu Elath na ahungun tugeijin achenguve.

⁷Hijeh chun Ahaz'in Assyria lengpa Tiglath-pileser henga thupole asolin; keima nasoh le nachapa kahi; hungtouvin lang eidou dinga hungkipat doh-a Syria lengpa le Israel lengpa khutna konin neihuh doh-in, ati.

⁸Chuin Ahaz'in Pakai in'a dangka le sana umjouse, chule leng in'a gou kholkhom na-a umjouse alan, Assyria lengpa chu thilmoh peh din athottai.

⁹Chuin Assyria lengpa chun athu angai pehtai; ajehchu Assyria lengpa chu Damascus dounan achetouvin, alan, amite chu Kir gama gal hingin akaijin, Rezin chu athat tai.

¹⁰Chuin Ahaz lengpa chun Assyria lengpa Tiglath-pileser chu kimupi ding Damascus'a achen, chule Damascus'a um maicham khat agamun ahi. Chule maicham lim le akisem dan, chule akigon bangtah chun, lengpan Uriah thempu agah thotnin ahi.

¹¹Chuin Uriah thempu chun Ahaz lengpan Damascus'a kona ahinthot dungjui chun maicham asemin; hitichun Uriah thempupan Damascus'a kona leng Ahaz ahung kilekah-in anasem joutan ahi.

¹²Chuin Damascus'a kona lengpa ahung chun, lengpan maicham chu amun; chule maicham chu anailutnin, hichea chun thilto atohtai.

¹³Chuin aman govam thilto le anneh thilto ahalin, chule donding thilto alheijin, maicham chung chu chamna thiltoho thisan chu athe khumin ahi.

¹⁴ Chuin houin maija kon, maicham thah le Pakai in kikah-a konin, Pakai masanga um sum-eng maicham jongchu aladoh-in, maicham sahlam panga chun akoitai.

¹⁵Chuin Ahaz lengpan Uriah thempu jah-a, maicham len chungahin jingkah govam thilto, nilhah anneh thilto, lengpa govam ganlhai, a-anneh thilto, chule gamsunga mijouse govam thilto, anneh thilto, chule dontho thilto toh-in; chule hiche chunga chun govam thilto thisan le kilhaina thilto jouse thisan chu thekhumin; sum-eng maicham vangchu keima houna ding ahi, tin athupeh-in ahi.

¹⁶Hitichun Uriah thempu chun Ahaz lengpa thupeh jouse dungjuijin aboltai.

¹⁷ Chuin Ahaz lengpan agamgi geisihho chu akhin neovin, hicheho-a konchun kisilna kong chu achondoh-in, twidol chu anoija um sum-eng bongchal ho-a konin alalhan, songlhongnal chunga atungtai.

¹⁸Chule houin sunga choldoni-a dinga pondal abolule, polama lengpa lutna chu Assyria lengpa jeh'in Pakai in'a konin atoldohtai.

¹⁹Tun Ahaz thilbol thusim dangho ama natohho chu Judah lengte thusimbu ho-a kisunlutna hilouham?

²⁰ Chuin Ahaz apu apate toh alumkhomin, chule David khopi-a apu apate toh avui khomuve. Chuin achapa Hezekiah chu ama khelin alengchang tai.