Read Thado Chin 2 Lengte 17 Bible Online

2 Lengte 17 - Thado Chin bible

2 Lengte 17

¹Judah lengpa Ahaz lengchan kal kumsomle kum ni na-in, Elah chapa Hoshea chu Israelte chung Samaria'a alengchang panin, kum ko alengchange.

²Chuin Pakai mitmu-a thilphalou chu anabolin, ama masanga Israel lengho tobang anahipon ahi.

³Assyria lengpa Shalmaneser chu ama dounan ahung kontouvin; chule Hoshea chu asoh-in ahungpangin, thilpeh ho apen ahi.

⁴Chuin Assyria lengpan Hoshea thilguh gonchu amudohtai: ajehchu aman Egypt lengpa So henga thu pole asolin, akumseh-a abolngai bangin Assyria lengpa henga thilpeh ahinpe tapon ahi. Hijeh chun Assyria lengpan songkul'a ahenin, akhachah khumtai.

⁵Chuin Assyria lengpan gamjouse ahin banchot touvin, Samaria'a achen, kumthum hel aum khumtai.

⁶Hoshea lengchan kal kumko lhinkum chun Samaria alan, Israelte chu Assyria gama atol mangin, Gozan vadunglen pama Medes te khopiho Halah le Habor'ah aumsah taovin ahi.

⁷Ajehchu ana hitin ahi, Egypt gama konle Egypt lengpa Pharoah khutnoija kona ahinpuidoh uva, Pakai a-Pathen'u dounan achonse taovin, chule pathen dangho joh aging taovin,

⁸Amahon Israel chate masanga kona Pakaiyin ana nodohsa Pathen hephalouho, chule amahon akitun'u Israel leng teho chonnadan chu ajuijun, ahi.

⁹Chule Israel chaten Pakai a-Pathen'u dounan guhthimin adihlou thilho chu anabolun; chule akhopiho jouse-a, khongahpa insangho-a pat, kulnei khopi geijin munsang ho akisemun ahi.

¹⁰ Chule lhangsang jouse le thingphung hing jouse noija, milimho le thingbomho akitundoh-un,

¹¹Chule chua munsang ho jouse-a, Pakaiyin amasanguva kona apaidoh Pathen hephalouho bangin gimnamtui ahalun; Pakai lunghana sodohna dingin thilphalou agongun ahi.

¹²Ajehchu Pakaiyin ahenguva, hitobanghi bolhih-un anati, milimho chu anajenun ahi.

¹³Ahin Pakai chun themgao jousele mitvahneiho jouse-a konin, Israelte le Judah te douna chu ana phongdoh jin, ahenguva, nakhangitlou naova konin hung kiheijun lang, naheng uva kasohte themgaoho kahinsola, napateu henga kathupeh ho jouse dungjuijin, kachondanho le kathupeh ho nit uvin, anati jin ahi.

¹⁴Achuti vangin amahon angai hih-un, Pakai a-Pathen'u ana tahsan lou apu apateu ngong bangin, angongu ahamsah-un ahi.

¹⁵Chule amahon apu apateu toh asemu achondanhou le akitepna, chule ahenguva athu hettohsah ho chu asandauvin; pannabei nungchu ajuijun, pannabei asoh-un, achung changuva Pakaiyin amaho bangin umhih-un anati, akimveluva Pathen hephalouho nung ajuijun ahi.

¹⁶ Chule Pakai a-Pathen'u thupeh jouse adalhaovin, akilhajol bongnou lim nitoh akisemun, thingbom akisemun, van janelpi ahouvun, Baal ajentaove.

¹⁷ Chule achapateule achanuteu mei apalsah-un, aisan le lhimna amangun, ama lungsat sah-a lung hansah nadin Pakai mitmun thilsetah boldingin akijoh doh-un ahi.

¹⁸Hijeh chun Israelte chunga Pakai alunghang behsetnin, amuphahna louva achon mangin; Judah phung tailou khatcha akhen aumtapoi.

¹⁹Judah jongchun a-Pakai Pathen'u thupeh chu anit tapon; ahinla Israel ten akisemu chondan kisema chun achontaove.

²⁰Chuin Pakaiyin Israel chilhah jouse chu adeitapon, asugentheijin, amitmua kona apaidoh kahsen michom mangho khutna chun apedohtan ahi.

²¹Ajehchu Israel chu David insunga konin abottelin, chule amahon Nebat chapa Jeroboam chu lengin asemun; chuin Jeroboam'in Israelte chu Pakai ajuijuva konin anomangin, amaho chu chonsetna lentah-in achonset sahtai.

²²Ajehchu Israelte chu Jeroboam'in abol chonsetna jouse-a chun achonseuvin, hicheho-a konchun akiheimang theipouvin;

²³Asohte themgaoho jouse kama anasei bangin, Pakaiyin amitmua kona achon manghel kahsen hicheho-a konchun akichoidoh pouve. Hitichun atolmangin tunigeijin achengden taove.

²⁴Chuin Assyria lengpan Babylon'a kon, Cuthah'a kon, Ava'a kon, Hamath'a kon, chule Sepharvaim'a konin mi ahinpuijin; Israel chate khelin Samaria'a achensahtai. Amahon Samaria alovin, chua khopiho-a chun acheng taove.

²⁵Chuin ahitin ahi, chua achentilu chun, Pakai chu aging pouvin; hijeh chun Pakaiyin alah uva keipi bahkai asollin, mi phabep athatnin ahi.

²⁶Hijeh chun amaho Assyria lengpa henga, nangman nachon doh-a, Samaria khopi-a nachensah nam mite hin, hichegam Pathen houdan ahepouve. Hijeh chun aman alah uva keipi bahkai ahinsolin, vetan, hiche gam Pathen houdan ahetlou jeh-un, amaho chu athat taove, atiuve.

²⁷Chuin Assyria lengpan thu apen, khulama kona nahin puiho thempuho lah-a khat puijun lang; chule chua gacheng hen, chule chugam Pathen houdan chu amaho gahil hen, ati.

²⁸Chuin Samaria'a kona ahin puidoh hou lah-a thempu khat ahungin, Bethel'a achengin, amaho chu Pakai ginje ahiltan ahi.

²⁹Hijongle namtinin ama amacheh pathen akisemun, Samaria ten akisemu munsang ho, inho, chule namtinin achennao khopiho-a hicheho chu akikoicheh uve.

³⁰Chuin Babylon miten Succoth-benoth asemun, Kuth miten Nergal asemun, Hamath miten Ashima asemun,

³¹Avi miten Nibhaz le Tartak semun, chule Sepharv miten achateu chu Sepharvaim pathenho Adram-melech le Anam-melech henga din meija agou jiuve.

³²Hitichun Pakai chu agingun, chule alah uva anempenho chu munsang ho-a thempun akisemun, munsang inho-a chun kilhaina aneijiuve.

³³Amahon Pakai chu agingun, chule chua kona apuimangu namho houdan dungjuijin, amaho pathenho chu ajen jiuvin ahi.

³⁴ Tumasanga aboldan bangun tulai geijin abolun; Pakai chu agingpouvin, aman Israel tia aminvo Jacob chateho chonna dan kisunle houdan thupeh ho, chule Pakaiyin apeh dan thupeh ho jongchu anitpouvin;

³⁵ Amaho chutoh Pakaiyin kitepna asema, amaho chu athu lhah-a, nanghon pathen dangho naginloudiu, a-anguva jong nakunloudiu, jenjong najen loudiu, ahenguva jong naki lhai loudiu;

³⁶ Amavang thilboltheina nasatah le banjah puma Egypt gama kona napuidoh pao Pakai chu naginuva, nahou uva, ama hengabou kilhaina nabol dingu ahi.

³⁷Aman nangho dinga asut achondanho, houdanho, dan, chule danthupeh chu a-imatih chana chingthei tah-a nanit dingu; pathen dangho nagin loudingu ahi.

³⁸Chule nangho toh kitepna kasemhi nasuhmil loudingu, pathen dangho jong nagin louhel dingu ahi.

³⁹Ahinla Pakai na Pathen'u chu nagin dingu; aman namelma teu jouse khutna kona nahuhdoh dingu ahi, ati.

⁴⁰Achutijeng vangin amahon angaideh pouvin, tumasanga aumdanu bou abol jingun ahi.

⁴¹Hitihin hiche nam mite hin Pakai chu agingun, amilim semthu chu apu apateu vin anajen bangun, achateu le achate chateuvin jong ajenun; hitichun tulai geihin abolun ahi.