Read Thado Chin 2 Lengte 18 Bible Online

2 Lengte 18 - Thado Chin bible

2 Lengte 18

¹Tun ahitin ahi, Elah chapa Israel leng Hoshea lengchan kal kum thum na-in, Judah lengpa Ahaz chapa Hezekiah chu ahung lengchang panin ahi.

²Ama alengchan patchun kum somni le kum nga ahin; chule ama Jerusalem'a kum somni le kum ko alengchange. Anu minchu Abi ahin, Zachariah chanu ahi.

³Aman apa David'in anabol jouse dungjuijin, Pakai mitmun adih chu abolin ahi.

⁴ Munsang ho chu achon mangin, milimho chu asubongin, thingbomho aphuh lhun, Mosi'n anasem sum-eng gul chu avobongsele; ajehchu hiche nikholai geija chu Israel chaten hiche henga chu gimnamtui ahaljiu ahin; chule aman hichu Nehushtan asah-e.

⁵Aman Pakai Israel Pathen atahsanin; hitichun ama nungin Juda lengte jouse lah-a ama tobang aum tapon, ama masangin jong khatcha anaumpoi.

⁶Ajehchu Pakai atuhchah-in, ama ajuija konin achemangpon, Pakaiyin Mosi anapeh thuho chu anit jingin ahi.

⁷Chule Pakaiyin aumpin, achedohna lamjousea aphattheijin; Assyria lengpa dounan akiphinin, ama chu ajenpon ahi.

⁸Philistine te chu Gaza kho le agamgi chin gei, khongah ho insanga pat khopi kulnei geijin abantha gamin ahi.

⁹Chuin Hezekiah lengchan kumli alhinin, Israel leng Elah chapa Hoshea kum sagi alengchan kum-in ahitin ahi. Assyria leng Shalmaneser chu Samaria satdin ahung kontouvin, Chule aum kultan ahi.

¹⁰Chuin kumthum kichaijin alataovin ahi: Hezekiah lengchan kal kum gup lhina, Israel lengpa Hoshea lengchankal kum ko na-in, Samaria chu lah-in aumtan ahi.

¹¹Chuin Assyria lengpan Israelte chu Assyria-a apuimangin, Halah'a Gozan vapi pama Habor chule Medes khopiho-a chun amahochu akoitan ahi.

¹²Ajehchu amahon Pakai a-Pathen'u aw angaipouvin, akitepna le Pakai soh Mosi athupeh jouse asukhelun, ajui nomhih-un, boljong abolpouve.

¹³Tun Hezekiah Lengpa lengchan kal kum somle kum li lhinin, Assyria lengpa Sennacherib chu Judah gam khopi kulpi neijouse satdin ahungkon touvin, hicheho chu alatan ahi.

¹⁴Chuin Judah lengpa Hezekiah'in Lachish'a Assyria lengpa henga chun, thil kanabol kheltan ahi, tin thu agah thottai. Chuin Assyria lengpa chun Hezekiah chu dangka talent jathum le sana talent somthum atep pehtan ahi.

¹⁵Chuin Hezekiah'in Pakai in'a dangka umjouse le leng in'a goukhol na-a dangka umjouse chu apetan ahi.

¹⁶Hiche phatlai chun Hezekiah'in Pakai in kotna sanale, Juda leng Hezekiah'in khompi ho-a sana alonkhumho chu akhohdoh sohkeijin, Assyria lengpa chu apetan ahi.

¹⁷Chuin Assyria lengpan Tartan le Rabsaris chule Rabshakeh chu Lachish'a konin sepai janeltoh Jerusalem'a Hezekiah lengpa henga asolin ahi. Chuin amaho achetouvun Jerusalem alhung taove. Chuin amaho alhunun, ponsoppa lamlhah-a twikul sahnung, twilam panga chun adinguve.

¹⁸Chuin amahon lengpa akouvun ahile, insung vaipopa Hilkiah chapa Eliakim, lekhasunpa Shebna, chule thuchingpa Asaph chapa Joah chu ahungdoh-un ahi.

¹⁹Chuin Rabshakeh chun ajah uva, tun nanghon Hezekiah henga gaseijun, leng loupitah, Assyria lengpan hitin aseije, ipi tahsana nakingaija kisong nahim?

²⁰Nangman naseijin, (ahinla hicheho chu mohthu mai maibou ahi,) keiman galbol nadin thumopthem le thahatna kaneije nati. Tun koichunga natahsan nangapma, keima douna-a kiphin nahim?

²¹Tun, vetan, hiche pumpeng kihehchip tenggol Egypt mite ngeichu natahsan ahin; ama chunga chun mikhattou kingaitaleh, akhutna lutna chule asutding ahi. Egypt lengpa Pharoah tahsan jouse chu chutiding ahi.

²²Ahinla nanghon kahenga, Pakai ka Pathen'u katahsanu ahi, tijong leuchun, hiche munsang ho le maicham ho chu hilouham, Hezekiah'in alah manga, Judah le Jerusalem mite henga, Jerusalem'a um hiche maicham masanga hi nahoudiu ahi, ati chu?

²³Hijeh chun tun kangeh nahiuve, ka pakai Assyria lengpa henga chun kitepna peuvin, chule achunga touding mi nanga jouding pou ule, sakol sangni napeu vinge.

²⁴Achutile iti dana kapupa sohteho lah-a gal lamkai neopen khat mai nahei manguva, Egypt mite kangtalai ho le sakol ho chunga natahsanu na-ngap muham?

²⁵Tu-a hi keima Pakai thulouva hiche munhi satna sumang dinga hunga kahim? Pakaiyin kajah-a, heche gam dounan chetouvin, chule gasumangin eiti ahi, ati.

²⁶Chujouvin Hilkiah chapa Eliakim, Shebna, chule Joah chun Rabshakeh jah-a, kangeh nahi, nasohte jah-a, Syria paovin thu seijin; ajehchu keihon kahecheh naove; chule kulpi vuma mipi jahdin Judah paovin neikihoupi hih-un, atiuve.

²⁷Ahinla Rabshakeh chun ajah uva, kapu chun napu hengle nangma henga hiche thuho seidinga eihinsol ham? Kulpi vuma touho hin nang hotoh aeh-u aneh uva ajunu adon theina dinguva ahenguva eihinsol hilouham? ati.

²⁸Chujouvin Rabshakeh adingin, Judah paovin aw sangtah-in asamin, thu aseijin, lenglen Assyria lengpa thu ngaijun;

²⁹Lengpan hitin aseije, Hezekiah chu kilheplhah sah hih-un; ajehchu aman ama khutna konin nahuhdoh jou pouvinte.

³⁰Chule Hezekiah'in, Pakaiyin thonlouva eihuhdoh teidingu ahin, hiche khopihi Assyria lengpa khutna jong kipedoh louhel ding ahi, tin Pakai natahsan sah daohen.

³¹Hezekiah thu ngai hih-un; ajehchu Assyria lengpan hitin aseije, thilpeh khatna konin keitoh kinoptona khat bolun lang kahenga hungun, hitichun mitinin alengpi gui cheh le atheichang phung cheh kineh hen, chule nangho mitinin atwibel cheh-u kidonuhen;

³²Thilouva nahina diuva nangho gam tobang gam, chang le lengpithei gam, changlhah le lengpilei gam, olive thao le khoiju lonna gam khatna dinga kahunga kahung puidoh kahseuvin: chule, Pakaiyin eihuhdoh naovinte tia najol tengule, Hezekiah thu ngai hih-un.

³³Namtin pathenho lah-a khat tou Assyria lengpa khutna kona agam huhdoh-a umkha tam?

³⁴Hamath le Arpad pathenho hoija umtaovam? Sepharvaim, Hena, chule Ivah pathenho hoilamba hitaovam? Amahon kakhutna kona Samaria ahuhdoh beh uvem?

³⁵Gamsung pathenho jouse lah-a kakhutna kona agamu huhdohpeh-a koi uma, Pakai chun kakhutna kona Jerusalem ahuhdoh ding hijaham? ati.

³⁶Ahinla mipi chu athipbeh-un, thu chengkhat chanjong adonbut pouve. Ajehchu lengpa thulhah chu, donbut hih-un, ti ahi.

³⁷Chujouvin leng insunga vaihom Hilkiah chapa Eliakim le lekhasun Shebna chule thuchingpa Asaph chapa Joash chu Hezekiah henga aponu kibottel pumin ahungun, Rabshakeh thusei ho chu ama aseipeh-un ahi.