Read Thado Chin 2 Lengte 20 Bible Online

2 Lengte 20 - Thado Chin bible

2 Lengte 20

¹Hiche laichun Hezekiah chu thidingin anatan ahi. Chuin Amoz chapa Isaiah themgao chu ahenga ahungin, ajah-a, Pakaiyin hitin aseije, na insung kisemtoh-in; ajehchu nathi ding ahitan, nahinsot tahlou ding ahi, ati.

²Chujouvin amai banglama aheijin, Pakai henga ataovin, hitin aseije,

³Vo Pakai, kangeh nahi, namasanga thutah le lungdih pu-a chule namitmu-a thilpha kanabolho chu tuhin neigeldoh pehtan, ati. Chuin Hezekiah hakan akaptai.

⁴Chuin ahitin ahi, Isaiah chu hongsung lailunga apotdoh masangin, Pakai thu chu ahenga ahung lhungin,

⁵Kilekitnin lang kamite vaipipo Hezekiah chu gaseipeh-in, Pakai, napa David Pathen chun hitin aseije, keiman nataona kasangin, namitlhi lon kamutai: ven, kadamsah ding nahitai. Nithum chan nile nangma Pakai in'a nachetou ding ahi, ati.

⁶Nahinkho kum somle kum nga kajopbea, nangmale hiche khopihi Assyria lengpa khutna kona kahuhdoh ding; chule hiche khopihi keima le keima kikhoh sahna jaleh kasoh David kakhohsahna jala kahonbit ding ahi, ati.

⁷Chuin Isaiah'in, theichang pheng khat hinlaovin ati. Chuin ahinlaovin uilut chunga chu akoijun ahile a-ol domtan ahi.

⁸Chuin Hezekiah'in Isaiah jah-a, Pakaiyin eidamsah dingle nithum ni-a Pakai in'a kachetou nading melchihna chu ipi hintem? ati.

⁹Chuin Isaiah'in, Pakaiyin aseisa chu aboltei ding ahi tihi nangma-a dinga Pakaiya kona namelchihna chu ahi: nilim chu kalsom machon dingham, ahiloule kalsom nungchon dingham? ati.

¹⁰Chuin Hezekiah'in adonbutnin, nilim dinga kalsom chesuh dinghi thil bailam ahin; hichu hidahen, ahinla nilim chu kalsom kinungchon johen, ati.

¹¹Chuin Isaiah themgao chu Pakai henga ataovin; Ahaz nidan melchih na-a kumlhasa nilim chu kalsom ahinlepui kitnin ahi.

¹²Hiche laichun Babylon lengpa Baladan chapa Berodach-baladan'in Hezekiah henga lekhathot le thilpeh ahinthotnin ahi: ajehchu aman Hezekiah chu anai ti ajan ahi.

¹³Chuin Hezekiah'in amahochu ana sasah-in, athillu koina in jouse, dangka, sanaho, gimnamtui ho, thao mantamho, agalvon koina in jouse, chule agou kholna-a umjouse avetsah sohkeijin; a-insungle alenggam jouse Hezekiah'in amaho amusahlou khatcha aumpon ahi.

¹⁴Chujouvin Isaiah themgao chu Hezekiah lengpa henga ahungin, ajah-a, hiche teho hin ipi aseijum? hoija kona nahenga hunguva ham? ati. Chuin Hezekiah'in amaho gamlatah-a Babylon'a kona hunga ahiuve, ati.

¹⁵Chuin aman, na insunga hi ipipi amutah um? ati. Chuin Hezekiah'in adonbutnin, ka-insunga thil umjouse amutaove; kagouho lah-a kavetsahlou khatchabeh aumpoi, ati.

¹⁶Chuin Isaiah'in Hezekiah jah-a, Pakai thuhi ngaijin,

¹⁷ Vetan, na-insunga umjouse le napan tunigeija anakhol khomho chu Babylon gamsunga apohlutna dingu nikho hunglhung ding; imacha khen umlou ding ahi, tin Pakaiyin aseije.

¹⁸ Chule nangma nahin, nangma-a kona hungpot ding nachapate chu apuimangdiu; chule amaho chu Babylon lengpa leng insunga Nukiso ho hiding ahiuve, ati.

¹⁹Chuphatnin Hezekiah'in Isaiah henga, nangin naseidoh Pakai thuchu apha ahi. Chule aman, kahinkho sungbeh-a hi chamna le thutah aumle, hichu apha hijeng lou ham? ati.

²⁰Chule Hezekiah thilbol danghole athaneina jouse, chule twikul le twilam iti asema, chule khopi sunga twi iti ana lahlut ham tiho chu, Judah lengte thusimbua kisunlutna hilouham?

²¹Chuin Hezekiah chu apu apate toh alumkhomin, chule achapa Manasseh chu ama khelin alengchang tai.