Read Thado Chin 2 Lengte 21 Bible Online

2 Lengte 21 - Thado Chin bible

2 Lengte 21

¹Manasseh alengchan patchun kum somle kum ni ahin, ama Jerusalem'a kum somnga le kum nga analeng change. Chule anu minchu Hephzi-bah ahi.

² Chule aman Israelte masanga Pakaiyin ananodoh, Pathen helouho thil thet um bolji ho bangchun, Pakai mitmun thilse anabolin ahi.

³Ajehchu apa Hezekiah'in asuhmangsa munsang ho atungdoh kitnin; Israel leng Ahab bol bangin Baal maicham atungdoh in, thingbom asemin, van janelpi ahouvin, ajentaovin ahi.

⁴ Pakaiyin Jerusalem'a kamin kaum sah ding ahi atina, Pakai in'a chun maicham ho asemin ahi.

⁵Chuin aman Pakai in hongsung teni-a chun van janelho jousedin maicham ho aseme.

⁶Chuin aman achapa chu meija kilhaina-in amangin, phat ho anitnin, kilhimna ho amangchan, lhakou le doithemho amangin: lungsat sah-a lunghansah nadin, Pakai mitmun khangitlouna tamtah abolin ahi.

⁷ Aman thingbom [2] milim asem chu Pakai in'a chun atungdoh-e, hiche houin chungchang hi Pakaiyin David le achapa Solomon henga, hiche in le Jerusalem hi a-imatih chana kamin umjing nadinga, Israel phung jouse-a kona kalhendoh ahin,

⁸Keiman amaho kathupeh jouse dungjuile, kasoh Mosi'n amaho athupeh jouse dungjuija boldinga anit pou ule, apu apateu kanapehna leisetna kona Israel ten akalu asondoh louhel dingu ahi, anati.

⁹Ahinla amahon angaipouvin; Pakaiyin Israel chate masanga anasuhmang namho bolsanga phaloujo cheh-in Manasseh'in miho chu alhemlha tai.

¹⁰Chuin Pakaiyin asoh themgaoho-a thu aseijin,

¹¹Ajehchu Judah lengpa Manasseh in hichethil thet umtah abola, amaho masanga Amor mihon abol jouseu vuma giloutah-a abola, Judah jong milim houva achonsetsah jeh hin;

¹²Hijeh chun Pakai Israel Pathen'in hitin aseije, veuvin, hiche thuhi ajapha chanin anakol teni kichih lahlah leuva ajah nadinga, keiman Jerusalem le Judah chunga thilse kalhunsah ding ahi.

¹³Chule Samaria tena khao le Ahab insung tena thihkhai chu Jerusalem chunga kaman ding; min kong asoptheng banga Jerusalem kasuhtheng ding, chule kabung butun ding ahi.

¹⁴Chule kagou chan amoh chengse chu kadalhah-a, amelmateu khutna kapehdoh ding; chule amaho amelmateuva dinga anchahle thil kichom hidiu ahi.

¹⁵Ajehchu apateu Egypt'a kona ahungdoh uva pat tunigei hin kamitmun thilphalou jeng aboluvin, kalunghan nadin eilungsat sah-un ahi, ati.

¹⁶Chukal vallin Manasseh hin themona bei thisan aso tambeh seh'in, Jerusalem dunglevai adip jengin; ama chonset tilouvin Judah jong achonsetsah-in, hitichun Pakai mitmun thilse jeng abolin ahi.

¹⁷Tun Manasseh thilbol danghole chonsetna abol hochu Judah lengte thusimbua kisuna hilouham?

¹⁸Chuin Manasseh apu apate toh alumkhomin; a-in'a ama honsungtah, Uzza honsunga avuitaovin: achapa Amon ama khelin alengchang tai.

¹⁹Amon alengchan patchun kum somni le kumni ahin, Jerusalem'a kumni alengchange. Anu minchu Meshullemeth ahin, Jotbah kho-a Haruz chanu ahi.

²⁰Aman apa Manasseh bolbangin Pakai mitmun thilphalou jeng abolin ahi.

²¹Chule apa chena lampi chu ajotnin, apan milim kin abol hochu abolin, amaho chu ahouvin,

²²Hitichun apu apate Pakai Pathen chu adalhan, Pakai lamlhah chu ajotpon ahi.

²³Chuin Amon sohte chun ama dounan guhthimin thilgon aneijun, lengpa chu ama in'a athat taove.

²⁴Ahinla chuche gam miho chun Amon lengpa changlhiho chu athatgam helun; chuche gam miho chun achapa Josiah chu ama khelin alengchansah taove.

²⁵Tun Amon'in anabol anatoh dangho chu Judah lengte thusimbua kisuna hilou ham?

²⁶Chuin ama chu Uzza honsunga lhana chun avuijun, achapa Josiah ama khelin alengchang tai.