Read Thado Chin 2 Lengte 22 Bible Online

2 Lengte 22 - Thado Chin bible

2 Lengte 22

¹ Josiah chu alengchan kipat chun kum get ahin, ama Jerusalem'a kum somthumle kumkhat aleng changin ahi. Chule anu minchu Jedidah ahin, Boskath kho-a Adaiah chanu ahi.

²Chuin aman Pakai mitmu-a thil dihtah abolin, apa David lamlhah jouse ajotnin, jetle veija akiheidohpon ahi.

³Chuin ahitin ahi, Josiah lengchan kumsomle kum getna-in, lengpan Meshullam chapa Azaliah chapa Shaphan lekhasun chu Pakai in'a asolin, aseije,

⁴Thempu chungnung Hilkiah henga chetouvin lang, kotngah hon miho-a kona alahkhomu, Pakai in'a kipo dangka chu simhen,

⁵Chule Pakai in'a natongho vesuiho khutna pedoh uhen; chule amahon houin selai semphat nadingin, Pakai in'a um natongho,

⁶Thingthem bol hole insaho chule songthem bolho hengah, insemphat nading thingtumle song kikhengho choh nadingin peson uhen, ati.

⁷ Ahivangin amahon tahsan umtah-a aboljeh-un, akhutnuva kipelut sumho chu vetsuina aumpoi.

⁸Chuin thempu chungnung Hilkiah'in lekhasun Shaphan jah-a, danthupeh lekhabu chu Pakai in'a kamutai, ati. Chuin Hilkiah'in lekhabu chu Shaphan apen, aman hichu asimtan ahi.

⁹Chuin lekha sunpa Shaphan chu lengpa henga ahungin hitihin thu ahinlhut tai; nasohten in'a um sumho chu natongho khutna Pakai insa-a natongho apesoh hel taove, ati.

¹⁰Chuin lekha sunpa Shaphan'in lengpa henga, Hilkiah thempupan lekhabu khat eipei, tin lengpa avetsah tai. Chuin Shaphan'in lengpa masanga hichu asimtai.

¹¹Chuin ahitin ahi, lengpan danthupeh lekhabua thuchu ajah phatnin, apon abottelin ahi.

¹²Chuin lengpan Hilkiah thempu, Shaphan chapa Ahikam, Michaiah chapa Achbor, lekhasun Shaphan, lengpa sohpa Asahiah chu thu apen,

¹³Cheovin, Pakai chu keima dingle mipi ho-a ding, chule Judah te jousedin hiche akimudoh lekhabua thu umho chungchang thuhi neigadop peh-un; ajehchu ijuidiuva hiche lekhabua kijih jousehi ipu ipateovin ajuilou jeh-un, ichunguva Pakai lungsatna deujeju ahi, ati.

¹⁴Hitichun Hilkiah thempu, Ahikam, Achbor, Shaphan, Asahiah chu ponsil chingtupma pang Harhas chapa Tikvah chapa Shallum inneipi Huldah themgaonu henga acheuvin,(Amachu Jerusalem vengsahlama cheng ahin,) amanu aga kihoupiu vin ahi.

¹⁵Chuin amanun ajah uvah, Pakai Israel Pathen'in hitin aseije, kahenga nahinsolpao jah-a chun seipeh taovin,

¹⁶Pakaiyin hitin ati, vetan, Judah lengpan asim lekhabua thucheng jouse banga chu, hikom munle asunga chengho jouse chunga thil phaloutah kalhunsah ding ahi:

¹⁷Ajehchu akhutsohho jouse-a eilung hansah theina dinguvin, amahon keima eidalhao vin, pathen dangho henga gimnamtui ahaluvin ahi; hijeh-a chu hiche mun douna-a hi kalungsatna deujah jengding, chule kisumit louding ahi.

¹⁸Ahinla Pakai dopdinga nahin soluvah Judah lengpa henga chun hitihin seijun, Pakai Israel Pathen'in hitin ati, nathu jah ho chungchanga;

¹⁹Hiche mun le asunga chengho chungchanga kathusei, amaho akamhel le sapset chang hung hidiu ahi tia kasei najah phatna nalung anema, Pakai anga nakineosah-a, napon nabotel jenga, kamasanga naka jeh-in; keiman nataona kasangtai tin Pakaiyin aseije.

²⁰Hijeh chun vetan, keiman nangma napu napate henga kapuiding, nalhansunga lhamong tah-a kipuilut ding nahin; hiche mun'a thilse kalhunsah dingchu namitna namulouhel ding ahi, tin gaseipeh-un ati. Hitichun hiche thuchu lengpa henga agalhut taovin ahi.