Read Thado Chin 2 Lengte 23 Bible Online

2 Lengte 23 - Thado Chin bible

2 Lengte 23

¹Chuin lengpan mi asolin, Judah gam le Jerusalem'a upaho jouse ahenga akhomin ahi.

²Chuin lengpa chu Judah mi jousele Jerusalem'a cheng jouse, chule thempuho le themgaoho, chule mijouse, alenle aneo agomin amatoh Pakai in'a achetouvun; Pakai in'a kimu kitepna lekhabua thujouse chu nakhang jouse jah dingin asimin ahi.

³Chuin lengpa chu khompi koma adingin, Pakai nung juidingle, adan thupeh ho, athu hettohsah ho, achondan kisunho chu alungthim pumpi le ahinna pumpi-a juiding le, hiche lekhabua kisun kitepna ho jouse tongdoh dingin, Pakai angsunga chun kitepna aneijin ahi. Chule mipi jouse chun kitepna chu adin piuvin ahi.

⁴ Chule lengpan thempu chungnung Hilkiah, anoidou thempuho, chule kotngah ho chu Baal ding, thingbom ding, chule van janelpi dinga kisem um le bel jouse Pakai in'a kona ladohdin thu apen ahi. Chuin aman hicheho chu Jerusalem pama Kidron loujaova agouvin, avamho chu Bethel'a apotai.

⁵Chule aman milimhou thempuho, Judah khopiho le Jerusalem kimvel munsang ho-a gimnamtui haldia Judah lengten anapansah hou; Baal, nisa, lhathah, vantham jola umho, chule van janelho henga gimnamtui hal hochu, ahaisah gamtai.

⁶Chule aman thingbom chu Pakai in'a konin Jerusalem pamlam, Kidron vachadunga apodoh-in; Kidron vachadunga ahalvamin, dijetnin achil ngemin, adi chu mipi ho chate buikhuh chunga apaijin ahi.

⁷Chule Pakai in koma pasal kijoh ho umna, thingbom dinga numei hon pon akhon jinao inho chu asuchim gamtan ahi.

⁸Chule Judah khopiho-a konin thempu jouse apuidoh-in, thempuho ginnamtui halna munsang ho Geba'a pat Bersheba geijin asuboh soh helin; khopi kotpi lutna veilam sanga khopi vaipo Joshua kotpi lutna-a munsang ho chu asuchimin ahi.

⁹Munsang thempuho chu Jerusalem'a Pakai maichama ahunglou vangun, asopiteu lah-a chol solou changlhah vang ane naove.

¹⁰ Chule koimachan achapa ahiloule achanu Molech koma meija alelut louna din, Hinnom chate phaichama um Tophet chu asuboh'in ahi.

¹¹Chule Pakai in lutna, lengpa noidou Nathan-melech indan koma um, Judah lenghon nisa dinga apeh-u sakol ho chu aladoh-in; nisa kangtalai ho chu meijin ahalin ahi.

¹² Chule Ahaz indan chungnung vuma Judah lenghon maicham asemhou, chule Manasseh'in Pakai inhong teni sunga maicham asemho chu lengpan avochimin, asubongin, aleivuiju chu Kidron vachadunga apai lutnin ahi.

¹³ Chule Jerusalem masang, kitahlouna molsang jetlama um munsang ho, Israel lengpa Solomon'in Zidon mite pathen thet umtah Ashtoreth ding, Moab miho Pathen thet umtah Chemosh ding, Ammon chate pathen thet umtah Milcom dinga anasah hochu, lengpan asubohtan ahi.

¹⁴Chuin milimho chu ahal halin asuchipmin, chule thingbomho chu aphuh lhun, amunho chun mihem gubuh-in adipme.

¹⁵ Chukal valin Israelte chonsetsah Nebat chapa Jeroboam'in Bethel'a maicham le munsang asem munho chu asuchim soh-in; munsang chu ahalvamin, achil ngemin, thingbom chu ahalvamtai.

¹⁶ Chuin Josiah agakiheile mola lhanho chu ahinmun, mi asolin, lhana konin guho chu agalahsah-in, hiche thu anasei, Pathen mipan anaphondoh Pakai thu dungjuijin, maicham chunga chun ahalvamin, asubohtai.

¹⁷ Chuphatnin aman, khuche kagah mukhu ipi songphu ham? ati. Chuin khopi miho chun, Pathen mi, Judah gama kona hunga Bethel maicham chunga nathilbol saho hung seichoi masapa lhan ahi, tin ahiluve.

¹⁸Chuin aman limsah hih-un, koiman aguchu suloh hih-un, ati. Hitichun Samaria'a kona hung kipotou themgaoho gutoh umkhom louvin, achomkoi taove.

¹⁹Chule Israel lengten Pakai lunghan sahna-a asah-u, Samaria khopiho-a munsang inho jouse jongchu, Joshiah'in alamangin, Bethel'a abol bangin abolsoh keijin ahi.

²⁰Chule munsang thempuho jouse jongchu maicham chunga athatnin; mi guho chu achunguva ahalin; chuin Jerusalem'a akiletai.

²¹Chuin lengpan mijouse henga, hiche kitepna lekhabua kisun banghin, Pakai na Pathen'u henga kalchuh kut mangun, tin thu apei.

²²Tabbeh-in Israelte chunga thutan hon thu atan laijuva pat, Israel leng tele Judah lengte nikholai jousen jong, chutobanga kalchuh kut chu ana umkhapon ahi.

²³Josiah lengchan kal kum somle kumget na-in, chuche kalchuh kut chu Jerusalem'a Pakai dingin ananei bepmun ahi.

²⁴Chukal valin Pakai in'a thempu Hilkiah'in amudoh lekhabua danthupeh kisunho suhbulhit ahina dingin, lhakou ho, doithemho, milimho, alim kisunthu bolho, chule le Judah gamle Jerusalem'a thil thet um amujiho jouse chu Josiah'in asumang soh hele.

²⁵Mosi danthupeh dungjuija Pakai lama alungthim pumpi, alhagao pumpi, chule athaneinao pumpi-a kipe-a amatobang leng khatcha anaumpon, anungin jong ama tobang khatcha jong aum tapoi.

²⁶Achuti jeng vangin Pakai chun alunghana tijat umtah, Manasseh'in alunghan sahna jouse jeh-a, Judah chunga alunghana deujejua konchun adai lhadeh pon ahi.

²⁷Chuin Pakaiyin, Israel kachon mang banga, Judah jonghi kamitmu-a kona kachon mang ding ahin; keiman kalhentum hiche khopi Jerusalem le, chu-a chu kamin umding ahi tia kanaseina hiche houin hi kapaidoh ding ahi, ati.

²⁸Tun Josiah thilbol dangho le anatoh jouse chu Judah lengte thusimbua kisuna hilouham?

²⁹Ama nikho laijin Egypt lengpa Pharoah-nechoh chu Assyria lengpa satdin Euphrates luipi-a akon touvin: chuin Josiah lengpa chu amapa kidoupidin achen; chuin Pharoah-nechoh'in ama amu phatnin Megiddo'a athat tai.

³⁰Chuin asohten Megiddo'a konin kangtalai khatna athilong chu apouvin, Jerusalem alhutnun, amatah lhana avuitaove. Chuin gamsung mite chun Josiah chapa Jehoahaz apuijun, thao anuvin, apa khelin lengin apansah taove.

³¹Jehoahaz alengchan patnin kum somni le kum thum ahin; Jerusalem'a lhathum aleng changin ahi. Anu minchu Hamutal ahin, Libnah'a Jeremiah chanu ahi.

³²Chule aman apu apate thilbol jouse bangin, Pakai mitmun thilphalou jeng abolin ahi.

³³Chuin Pharoah-nechoh chun Jerusalem'a alengchan theilouna dingin, Hamath gama um Riblah'a ahen nin; chule agamu chu dangka talent jakhat le sana talent khat kai apohsah tan ahi.

³⁴ Chuin Pharoah-nechoh chun Josiah chapa Eliakim chu apa Josiah indan sunga chun alengchan sah-in, aminchu Jehoiakim'in akhelin, Jehoahaz chu apuimangtai. Chuin Pharoah'in Jehoahaz chu Egypt'a apuisuh-in, chua chun Jehoahaz athitai.

³⁵Chuin Jehoiakim'in dangka le sana chu Pharoah apen; ahinla Pharaoh thupeh dungjuija sum pehdingin gamsung chu kai apohsah cheh-in ahi. Aman Pharoad-nechoh pehdinga mitin ateppeh cheh bangtah-in, chuche gam miho chu dangka le sana kaijin apehsah cheh-in ahi.

³⁶ Jahoiakim chu alengchan tilin kum somni le kum nga ahin, Jerusalem'a kum somle kum khat alengchange. Chule anu minchu Zebudah ahin, Rumah mi Pedaiah chanu ahi.

³⁷Chule aman apu apate bolho jouse bangin Pakai mitmun thilphalou ngen abolin ahi.