Read Thado Chin 2 Lengte 24 Bible Online

2 Lengte 24 - Thado Chin bible

2 Lengte 24

¹Ama nikho laichun Babylon lenga Nabuchadnezzar ahungtouvin, Jehoiakim chu kumthum asoh-in ahung pangin; chujouvin akile heijin chule ama douvin ahung pangtai.

²Chuin Pakaiyin ama doudin Chaldea loiho, Syria loiho, Moab loiho, chule Ammon chate asolin, Pakaiyin themgaoho kama anasei thu dungjuijin, Judah douva sumangdingin asoltan ahi.

³Tabbeh-in Manasseh chonsetna ho jouse le athilbolho jouse dungjuija, amitmua kona chondoh nadinga, Pakaiya kona hiche thupeh hi hunglhunga ahi.

⁴Chule themonabei thisan asojeh jong ahi: ajehchu Jerusalem chu monabei thisan sonan adiptan, Pakaiyin angaidam louding ahi.

⁵Tun Jehoiakim thilbol danghole atoh jouse chu Judah lengte thusimbua kisuna hilouham?

⁶Hitichun Jehoiakim apu apate toh alumkhomin, achapa Jehoiachin ama khelin alengchang tai.

⁷Chuin Egypt lengpa chu agama konin ahungkit tapoi: ajehchu Babylon lengpan Egypt vapidunga kona Euphrates vadunglen gei, Egypt lengpa gamhop jouse alah ahitai.

⁸Jehoiachin chu alengchan patnin kum somle kumget ahin, chule Jerusalem'a lhathum alengchange. Chule anu minchu Nehusta ahin, Jerusalem'a um Elnathan chanu ahi.

⁹Chuin aman apa thilbol jouse dungjuijin Pakai mitmun thilse jeng abolin ahi.

¹⁰Hiche laichun Babylon lengpa Nebuchadnezzar sohpa Jerusalem dounan ahung touvin, khopi chu aumkul taovin ahi.

¹¹Chuin Babylon lengpa Nebuchadnezzar khopi doudinga chu ahungleh, asohten anaumchah taovin ahi.

¹² Chuin Judah lengpa Jehoiachin chu ama le anu, asohte, amilenho, avaipoho toh Babylon lengpa henga achedoh-un; chuin alengchan kumget lhinin Babylon lengpan sohchangin akaitai.

¹³Chuin Pakaiyin anasei bangchun, Pakai in'a goujouse le leng in'a goujouse chu hiche mun'a konchun apodoh-in, Pakai houin'a Israelte lengpa Solomon'in sana kong leh bel anasem jouse chu avokeh sohkeijin ahi.

¹⁴Chuin Jerusalem'a mijouse, milen jouse, mihatle mihang jouse chu gal hing sangsom jen akaijin, khutthem jousele thih khengho jouse chu apuimang soh helin: gamsunga chun mipi avaicha dehho tailou koimacha aumtapoi.

¹⁵ Chuin Jehoiachin chu Babylon'a apui mangin, chule lengpa nu, lengpa jiteho, avaipoho, chule chuche gama mihat ho chu Jerusalem'a konin gal hingin Babylon'a akaitai.

¹⁶Chule pasal hatjouse chu sangsagi jen, khutthemhole thih khengho sangkhat ahiuvin, amaho chu mihat le gal bolthei cheh ahiuvin, Babylon lengpan gal hingin Babylon'a akaitai.

¹⁷Chuin Babylon lengpan Jehoiachin pa sopipa Mattaniah chu ama khelin alengchan sah-in, amin akhelpeh-in Zedekiah asahtai.

¹⁸Zedekiah alengchan patnin kum somni le kum khat ahin, Jerusalem'a kum somle kum khat alengchange, chule anu minchu Hamutal ahin, Libnah kho-a Jeremiah chanu ahi.

¹⁹Chule Jehoiakim'in anabol bangin Pakai mitmun thilphalou jeng anabolin ahi.

²⁰ Ajehchu Pakai lunghan na-a kona Jerusalem le Judah gamsung chu a-angsunga kona apaidoh kahse-a chuti chu soh-a ahi. Chuin Zedekiah chu Babylon lengpa dounan akiphin tan ahi.