Read Thado Chin 2 Lengte 25 Bible Online

2 Lengte 25 - Thado Chin bible

2 Lengte 25

¹ Chuin Zedekiah lengchan kal kum ko na, lha somna, chuche lha nisom na-in ahitin ahi, Babylon lengpa Nebuchadnezzar chu, amale asepaite toh Jerusalem dounan ahung konun, pal akai khumun, akimvela kul akai khumun ahi.

²Zedekiah lengpa lengchan kal kum somle kum khat na-in, khopi chu aum kimvel taove.

³Chuin lha lina ni ko nichun khopi-a chun kel alhan, gamsung miho dingin an himhim aumtapoi.

⁴ Chuin khopi chu asukeh-un, galsatmi jouse chu lengpa honna kulbang ni kikah lampia chun jan-in ajamun; (tun Chaldea te chun khopi chu aum khumu ahin,) chuin lengpa chu phaicham lampi lama chun achen ahi.

⁵Chuin Chaldea sepaihon lengpa chu anung delun, Jericho phaichama aphapa taovin; asepaite jouse chu ama-a konin akithecheh taove.

⁶Hitichun lengpa chu amanun, Babylon lengpa henga Riblah'a apuitouvun; achungthu atan taove.

⁷ Chuin amahon Zedekiah chapate chu ama mitmu tah-in athatnun, chule Zedekiah chu amit akaldoh-un, sum-eng khaovin akanun, Babylon lama apuitaove.

⁸Chuin Babylon lengpa Nebuchadnezzar lengchan kal kum somle kumko na, alha ngana, chuche lha nisagi nichun, Babylon lengpa sohpa vetup ho gal lamkai Nebuzaradan chu Jerusalem'a ahungin;

⁹Pakai in le lengpa in, chule Jerusalem'a injouse le milentakip in chu meijin ahallha gamtan ahi.

¹⁰Chuin vetup vaipopa henga um chaldea sepai jouse chun, Jerusalem kimvela kulbangho chu asuchim gam taove.

¹¹Tun khopi sunga kidalha mipi dangho, chule Babylon lengpa henga kona jammangho, chule amoh tamtah ho chu vetuploi lamkai Nebuzaradan'in apuimang sohtai.

¹²Ahinla gamsunga mivaichaho chu vetup loi lamkaipa chun lengpilei lhouding le louboldin adalha tai.

¹³ Chuin Pakai insunga sum-eng khomho, chule twikongho, Pakai insunga sum-eng twidol, chule atunna sum-eng ho chu Babylon'a apotaove.

¹⁴ Chule bel ho, vutlonaho, chaicheho, thihkheho, chule sum-enga kisem um le bel jouse chu amahon apomang taovin ahi.

¹⁵Chule khangbelho, sumlheng ho, chule chutobang thilho chu, sana chu sana-in, dangka chu dangka-in ngahtup gallamkai pan apomangtai.

¹⁶Solomon in Pakai in dinga anasem khom ni, twidol khat, chule atunna, umle bel ho jouse sum-eng chu tejougol ahipoi.

¹⁷Khompi khat sanje chu tong somle tong get ahin, achunga aluboh chu sum-eng ahi; aluboh sanje chu tong thum ahin, chule aluboh chung kimvel chu kolbuthei lim kigeipol chitchetna, ajepna chu sum-eng jeng hija ahi. Hiche tobangma-a hi khompi nina-a jong chu akigeipol chitchet uma ahi.

¹⁸Chuin ngahtup vaipopa chun thempu chungnung Seraiah, thempu nina Zephaniah, chule kotngah thumho chu amanin;

¹⁹Chule aman khopi sunga galbolho chunga vaipo toh, khopi sunga lengpa anga ana umjing mi nga toh, gamsunga mipi ho min sunlutji janelho lekhasun pipuipa toh, khopisunga um gamsung mipilah a mi somgup toh amanin ahi.

²⁰Chuin ngahtup vaipo Nebuzaradan'in amaho chu akaijin, Riblah'a Babylon lengpa henga apuitai.

²¹Chuin Babylon lengpan amaho chu Hamath gamsunga um Riblah'a mun'a chun amaho chu athat gamin ahi. Hitichun Judah chu agamuva konin apuimangtai.

²²Chule Babylon lengpa Nebuchadnezzar'in adalhah, Judah gama umden hoding chun, aman Shaphan chapa Ahikam chapa Gedaliah chu achunguva gamvaipo din asem peh-in ahi.

²³Chuin galsat lamkaiho jouse, amahole amiteuvin Babylon lengpan Gedaliah chu gamvaipodin asemtai ti ajah phatnun, Nethaniah chapa Ishmael, Careah chapa Johanan, Netophah mi Tanhumeth chapa Seraiah, Maachath mi chapa Jaazaniah amahole amiteu chu Mizpah'a Gadaliah henga ahunguvin ahi.

²⁴Chuin Gedaliah amahole amiteu henga akihahselin, ajah uvah, Chaldea ho soh hiding kicha hih-un; gamsunga chun chengun lang Babylon lengpa jenmaijun; chutile nangho dinga thilpha hiding ahi, ati.

²⁵Ahinla lha sagina-in ahitin ahi, lengte chilhah-a kon Elisha chapa Nethania chapa Ishmael chu pasal somtoh ahungin, Gedaliah le Mizpah'a aumpi Judah tele Chaldea te chu anokhumun athat taovin ahi.

²⁶Chuin mijouse, alen aneo, chule galsat vaipoho, akipatnun Egypt'a ahungtaove; ajehchu Chaldea te chu akichatnu ahi.

²⁷Chuin ahitin ahi, Judah lengpa Jehoiachin sohchan kal kum somthumna, lha somle lhanina, nisomni le sagini na-in, Babylon lengpa Evil-merodach ahung lengchan kum kipat chun, Judah lengpa Jehoiachin chu songkul'a konin alhadoh tan ahi.

²⁸Chule ahenga lungsetna neitah-in thu aseijin, Babylon'a amatoh umkhom lengho jouselaltouna vuma chun ama laltouna adosangpeh-in;

²⁹Asongkul von akhelpeh-in, ahinkho lhumkeijin a-anga an anejom jingtan ahi.

³⁰Chule alo chu ahile, lengpan niseh-in a-an nehding ape jingin, ahinkho lhumkeijin niseh-in achang neijin ape jingin ahi.