Read Thado Chin 2 Lengte 3 Bible Online

2 Lengte 3 - Thado Chin bible

2 Lengte 3

¹Tun Judah leng Jehoshaphat lengchan kal kum somle kumget lhinkumin, Ahab chapa Jehoram chu Samaria'a Israelte chunga alengchang panin; chule kum somle kumni aleng changin ahi.

²Aman Pakai mitmun thilse abolin, apale anu bang vang ahipoi. Ajehchu apan anasem Baal milim chu anapai mangin ahi.

³Hijeng jongle ama Israel chonsetsah Nebat chapa Jeroboam chonsetna a chun abeh jingin; hia konchun akikangse pon ahi.

⁴Chuin Moab lengpa Mesha chu kelngoi vahmi ahin, aman Israel lengpa henga kelngoinou sangjakhat le kelngoichal sangjakhat amul pumin anapen ahi.

⁵Ahinla ahitin ahi, Ahab athi phatnin, Israel lengpa dounan Moab lengpa akiphin tan ahi.

⁶Chuin Jehoram lengpa chuphat laitah chun Samaria'a konin apotdoh-in, Israelte jouse chu asimtan ahi.

⁷Chuin ama achen Judah leng Jehoshaphat henga mi asolin, Moab lengpan keima dounan akiphin tai; Moab douna galsat dinga keima toh nalhon dingham? agati sah-e. Chuin aman, ka chetou ding ahi: keima nang tobang kahin, kamite namite tobang ahin, kasakolho nangma sakol ho tobang ahi, ati.

⁸Chuin aman lampi hoichepena ikitoltou diuham? ati. Aman adonbutnin, Edom gamthip jotpaina lamlena, ati.

⁹Hitichun Israel lengpa chu Judah lengpa le Edom lengpa toh akontaove. Chuin nisagi achekolun ahile, anung juihou janel hole ganchaho donding twi aumtapon ahi.

¹⁰Chuin Israel lengpan, ohe! Pakaiyin leng thumho hi Moab mite khutna pehdoh dinga eikou khomu hitante, ati.

¹¹Ahinla Jehoshaphat'in, hikoma hi ama-a kona Pakai idopthei nadiu Pakai themgao khatbeh umlou ham? ati. Chuin Israel lengpa soh khatnin adonbutnin, Elijah khut twi sung jipa Shaphat chapa Elisha aume, ati.

¹²Chuin Jehoshaphat'in, Pakai thu chu ama henga uma ahi, ati. Hitichun Israel lengpa le Jehoshaphat, chule Edom lengpa chu ahenga achesuh-un ahi.

¹³Chuin Elisha'n Israel lengpa henga, keiman nangma toh ipi kiguijopna kaneijem? napa themgaoho le nanu themgaoho henga chen, ati. Chuin Israel lengpan ajah-a, chepong-e: ajehchu Pakaiyin hiche leng thumho hi Moab mite khutna pehdoh dinga akoukhom ahitai, ati.

¹⁴Chuin Elisha'n, a-anga kadin jing hingjing janelho Pakai min panna kasei ahi, Judah leng Jehoshaphat hungjao hi kakhohsahlou hile, nangma lamhi vetjong kavet louding, mujong kakimusah louding nahi.

¹⁵Hijongle tumging tumthem mikhat neihin puipeh-un ati. Chuin ahitin ahi, tumging tumthem chun ahintum phatnin, Pakai khut achunga achutan ahi.

¹⁶Chuin aman, Pakaiyin hitin aseije, hiche phaicham hi kotongin dimsah-un.

¹⁷Ajehchu Pakaiyin hitin aseije, nanghon hui himhim namu loudiu, go himhim jong namuloudiu ahi. Hijeng jongle hiche phaicham chu nadon diuva twi dimding, nanghole nagancha teo, chule nagamsa houvin adondingu ahi.

¹⁸Chule hichehi Pakai mitmu-a thil neocha bou ahi: aman Moab mite jong nakhut nuva apehdoh nahlai ding ahi.

¹⁹Khopi kul nei jouse le khopi deilhen jouse najo uva, thingphung phaho jouse naphuh lhuh diu, twikul jouse nasuh kangdiu, chule gamphaho jouse songa nasuhset dingu ahi, ati, ati.

²⁰Chuin jingkah anneh thilto tophat vellin ahitin ahi, hichun veuvin, Edom lampia konin twi ahung longin, gamsung chu twijin adimsoh tai.

²¹Chule Moab mite jousen, amaho satdingin lengho chu ahung kontou taove ti ajah phatnun, galvon kivon theija pat chunglam jouse akikhomun, gamgi china ading taove.

²²Chuin amaho jingkah matah-in athoudoh-un, twi chung chu nisan ahinkhon ahile, Moab miten apang langkhatna twi chu thisan bangin asanin amuvin ahi.

²³Chuin amahon, hichehi thisan ahi; lengho chu akithat mong mong ahiuve, amaho khatle khat kithat to ahitaove; hijeh chun tun, Moab mite, gachom taote atiuvin ahi.

²⁴Chuin amaho Israelte gebuh ahunglhun phatnun, Israelte akipat doh-un, Moab miho chu athat taovin, hitichun amaho amasanguva ajamtaove. Ahinla amahon amano peh-un, Moab mite chu agamsungu geisanin athatpeh jengun ahi.

²⁵Chule khopiho chu avochimun, agampha lai jouse amitakipmin song asekhumun avuhdimun, twikul jouse asubingun, thingphung phajouse aphuh lhuvin; Kirharaseth kho-a songho bouchu adalhaovin ahi. Ahinla ahsongse choiho acheleuvin, aga sumangun ahi.

²⁶Chuin Moab lengpan gal kisat chu ama dingin ahoise behsetne ti amuphatnin, chemjam themcheh mi jasagi akipuijin, Edom lengpa pan nalam suhkeh ding agongin; ahinla ajou joupouve.

²⁷Chujouvin akhela lengchang dingpa achapa lenpen chu amanin, kulvuma chun govam thilto dingin atohdoh-in; Israelte chunga hatah-in alunghangun ahi. Chuin ama chu adalhaovin, agamuva akile taove.