Read Thado Chin 2 Lengte 4 Bible Online

2 Lengte 4 - Thado Chin bible

2 Lengte 4

¹Tun themgaoho chapate jite khatnin Elisha jah-a, nasohpa kajipa chu athitan; chule nasohpan Pakai aginje chu nahenai. Chule kachapa teni soh-a kaidingin kaleibat pao ahunge, tin akaptan ahi.

²Chuin Elisha'n amanu jah-a, ipi kabolpeh dingham? neisei peh-in, na in'a ipi naneijem? ati. Chuin amanun ajah-a, nasohnun ina thao belkhat tailou imacha kaneipoi, ati.

³Chuphatnin aman, naheng nakom jouse umle belho, akeoho ngeichu apadin galan, lhomcha gala hih beh-in.

⁴Chule nahunglut tengle, nangma le nachateni kot nakikha khumdiu; bel jouse nasun dimuva, chule adimho jouse achoma nakoi diu ahi, ati.

⁵Hitichun amanu ahenga konchun achedoh-in, bel hinchoi peh-a achapa teni toh kot akikhakhumun; aman asung sung jengtan ahi.

⁶Chuin ahitin ahi, belho adimsoh phatnin, amanun achapa jah-a, bel neihin choipeh nalaijin, ati. Chuin aman anu jah-a, beldang aumtapoi, ati. Chuin thao chu akangtai.

⁷Chuphatnin amanu ahungin Pathen mipa chu aseipehtai. Chuin aman, chen thao chu gakijoh inlang nabat gasan, chule amoh-a chun nangle nachapate kihinso taovin, ati.

⁸Chuin nikhat hi numei haotah khat chenna Shunem kho-a Elisha agachen, amanun an nedin asolin ahi. Chuin ahitin ahi, aman hiche mun ahin hopa chanin, hia chun an nedin alutjin ahi.

⁹Chuin amanun a-inneipu jah-a, tun vetemin, eihin hopa jinguva hi Pathen mitheng khat ahi kahetai.

¹⁰Katao ahi, bang chunga khun indan neokhat sempeh hitin; ama dingin jalkhun khat, dokhang khat, touna khat, chule meivah khom koipeh hite; chutia chu ama eini koma ahungji teng, hia chu lutji ding ahi, ati.

¹¹Chuin nikhat chu ahitin ahi, ama hilama chun ahungin, indan sunga chun alutnin, hia chun alumtai.

¹²Chuin aman asohpa Gehazi henga Shunem, numeinu gakouvin, ati. Chuin aman agakouvin, amanu amasanga adingtai.

¹³Chuin aman amapa jah-a, tun amanu jah-a, vetan, nangman keiho-a dingin najo chanin neikhoh sah-un; nangma ipi kabolpeh ding nahim? lengpa, ahiloule janel gallamkai henga thu kaseipeh diuham? tin dongin ati. Chuin amanun adonbutnin, keima kamite lah-a cheng kahi, ati.

¹⁴Chuin aman, achutile amanu dinga ipi kibolpeh tantem? ati. Chuin Gehazi'n adonbutnin, tahbeh-in amanu chabei ahin, chule ajipahi tehse ahitai, ati.

¹⁵Chuin aman, amanu chu kouvin, ati. Chuin amanu akouphatnin, amanu kotna adingtai.

¹⁶Chuin aman, khovei tulai phatteng chapa khat napom ding ahi, ati. Chuin amanun, ahipoi, ka pakai, Pathen mipa, nasohnu henga jousei hih-in, ati.

¹⁷Chuin phatche dungjuijin numei chu agaijin, Elisha'n ajah-a anasei phattah chun chapa khat ahingtan ahi.

¹⁸Chuin chapang chu akhandoh phatnin, nikhat hi chang at-ho lah-a apa henga agachen ahi.

¹⁹Chuin aman apa henga, kalu, kalu atin ahi. Chuin apan chapang khat henga, anu hengah puiloijin, ati.

²⁰Chuin aman chapangpa chu apoma, anu henga apui phatnin, anu khupchunga sun geijin atouvin, chujouvin athitai.

²¹Chuin amanu achetouvin, Pathen mipa jalkhun chunga alupsah-in, kot akha khumin, achedohtai.

²²Chuin aman a-inneipu akouvin, nahenga katao ahi, Pathen mipa henga kalhaija kahungkit theinadin, gollhangho lah-a khatle sangan holah-a khat neihin solpeh in, ati.

²³Chuin aman, lhathahni ahiloule cholngahni jongla ahipon, ibola tunitah-a ahenga nache ding ham? ati. Ahin amanun, hung phapha nante, ati.

²⁴Chuin amanu sangan chunga atouvin, asohpa jah-a, masang lama tilloi loijin; thu kapeh tilouvin keima-a dingin olchesah hih-in, ati.

²⁵Hitichun achen Pathen mipa heng Carmel mollama ahungin ahi. Chuin ahitin ahi, Pathen mipan amanu gamlatah-a amuphatnin, asohpa Gehazi jah-a, vetemin, gallanga khu Shunem numeinu ahi;

²⁶Tun amanu kimupi din lhai jel-in, kangeh nahi, chule ajah-a, ima jouse phapha-a hinam? na inneipu phapha-a hinam? naocha chu phapha-a hinam? gatin, ati. Chuin amanun, apha phanai tin adonbutne.

²⁷Chuin amanu lhanga Pathen mipa heng ahung lhun phatnin, akeng atuh jengin ahile; amanu sondohdin Gehazi'n ahin naijin ahi. Chuin Pathen mipan, limsah hih in; ajehchu amanu lung gentheija ahi: Pakaiyin keija kona a-ima, eihetsahlou ahitai, ati.

²⁸Chuphatnin amanun, ka pakai pa-a kona chapa kangeh-em? neijoulhep hih-in tia kanasei hilou ham? ati.

²⁹Hitichun Gehazi jah-a, nakong kigah in, chule nakhutna katengol choijin lang chen; mikhat tou namujongle chun chibai boh hih-in, chule khat touvin na chibai jongle chun donhih-in; ka tenggol hi chapang maija gajamin, ati.

³⁰Chuin chapangpa nuchun, Pakai hinna le nangma hinna pana kasei ahi, keiman nangma kadalhah louhel ding nahi, ati. Chuin akipatdoh-in, amanu chu ajuitai.

³¹Chule Gehazi chu amani masanga anachen, tenggol chu naocha maija anajamtai; ahinla husale imacha jahding aumtapoi. Hijeh chun ama kimupi din achekitnin, ajah-a, chapang chu athoudoh dehpoi, tin aseipeh-in ahi.

³²Chuin Elisha insung ahunglhun phatnin, veuvin, chapang chu athisan ajalkhuna analumin ahi.

³³Hitichun alutnin, amani changseh insunga kot akikhakhum honin, Pakai henga ataotai.

³⁴Chuin lupna-a chun akaldoh-in, chapang chunga chun aboh-in, akamle akam, amitle amit, chule akhutle akhut asuton ahi. Chuin chapang chu a-op khumin ahile chapangpa tichu ahunglum jepjep tan ahi.

³⁵Chuin akumlha kitnin, insunga chun avahlelen; chuin akaltou kitnin, ama chu a-opkhum kitnin ahi. Chuin chapang chu sagi veijen achin, chuin chapang chu amit ahahtai.

³⁶Chuin aman Gehazi akouvin, Shunem numeinu hinkouvin, ati. Hitichun aman amanu ahinkoutan ahi. Chuin amanu ahenga ahung phatnin, nachapa hi kipomtan, ati.

³⁷Chuin amanu alutnin, akengbula alhun, tolla aboh khupmin, achapa chu akipomin, apotdohtai.

³⁸Chuin Elisha Gilgal'a ahungkit tai: chule gamsunga chun kel alhan; themgaoho chapate chu amasanga atouvun ahi. Chuin aman asohpa jah-a, bel lenchu songin lang themgaoho chapate din annoi honpeh in, ati.

³⁹Chuin mikhat anche louva loujaova achen ahile gam lengpi guikhat amun, agachu a-ang dimset-in ahinpomin, annoi bela chun alhahtai: ajehchu amahon hihochu ipi ahi ahet louvu ahi.

⁴⁰Hitichun mipi ho nehdin athuhpeh taove. Chuin ahitin ahi, annoi chu aneh petnun, amahon ahin samdoh-un, vo Pathen mipa, belsunga thina aume atiuve. Hitichun amahon hichu anethei tapouve.

⁴¹Ahinla aman, achutile anchu hinlaovin, ati. Chuin bela alhei lutnin; ajah uva, mihon anehtheina diuvin thuh-un, ati. Chuin belsunga chun imacha aphamo aumtapon ahi.

⁴²Chuin Baal-shalisha'a konin mikhat ahungin, Pathen mipi chu ga masa-a kona kisem changlhah, sakol changlhah somni toh chang ga thah lihleh vuikhat ahinpohpeh in ahi. Chuin aman ajah-a, amahon aneh theina diuvin mipi ho chu pen ati.

⁴³Chuin asohpan, mi jakhatjen anga hichehi kaluipeh dingham? ati. Aman mihon aneh theina diuvin pen, tin aseikitnin ahi: ajehchu Pakaiyin hitin aseije, amahon neuvintin, anehval nahlaidiu ahi, ati.

⁴⁴Hitichun a-anguva aluipeh-in, amahon aneuvin, Pakai thu dungjui chun, aneh valu akhen nalaijun ahi.