Read Thado Chin 2 Lengte 5 Bible Online

2 Lengte 5 - Thado Chin bible

2 Lengte 5

¹ Tun Syria lengpa janel lamkai Naaman chu a-pakaipa mitmu-a dinga milentah le jabol changtah ahin, ajehchu ama jala Pakaiyin Syria te chu galjona anapeh ji ahi. Ama hi mihat hangsantah jong ahin; hinla miphah ahi.

²Syria mite chu ahon honin akitoldoh uvin, chule Israel gama konin numei chapang khat sohchangin ahin puidoh uvin; amanu chu Naaman inneipi jenin apangin ahi.

³Chuin amanu chun a-pakainu jah-a, ka pakaipa hi Samaria'a um themgaopa gakivetsah hitavele! ajehchu aman aphahhi athensah ding ahi, ati.

⁴Chuin Naaman agalutnin a-pakaipa jah-a chun, Israel gama kon nungahnu khun hiti tihin thu aseije agatin ahi.

⁵Chuin Syria lengpan, gache jengin, keiman Israel lengpa henga chun lekha khat jih nange, ati. Chuin ama akipatdoh-in, dangka talent som toh, sana nong sang gup toh, kikhelna von som akipoh-in ahi.

⁶Chuin aman lekha chu Israel lengpa henga ahin choijin, athuchu hitin akisune: Tun hiche lekha hi nahenga ahunglhun teng, vetan, keiman kasohpa Naaman hi aphah-a kona nathensah theina dingin, nahenga kahinsolin ahi.

⁷Chuin ahitin ahi, Israel lengpan lekha chu asimphatnin, apon asat telin, keihi Pathen kahia, mi kathisah-a, kahin sahthei hija, hichepa hin phah thensah dinga kahenga mi ahinsol ham? hijeh chun ngaitouvin, katao ahi, chule veuvin keimatoh kinahna nading iti ahol hitam, atin ahi.

⁸Chule Pathen mipa Elisha'n Israel lengpan aponho abot tele ti ajah phatnin, lengpa henga mi asolin, ibola napon nabotel ham? Israel gama themgao khat aume ti ahetnadin, tun amachu kahenga hinsolin, ati.

⁹Hitichun Naaman chu asakole akangtalai toh ahung kitolin, Elisha in kotphunga adingtai.

¹⁰Chuin Elisha'n thupole khat ahenga asolin, Jordan'a sagivei gaki soplhan, chutile natahsa hungkile kitnin tin, chutengle natheng ding ahitai, agatisah-e.

¹¹Ahinla Naaman alunghangin, ache mangin, hitin aseije, vetan, kei ngaiton ama kahenga hungdoh teijintin, dingintin, a-Pakai Pathen min kou intin, akhutna kanatna chung chu thamintin, chuteng phahna chu daminte kati ahi, ati.

¹²Damascus vapiho, Abana le Pharpar khu Israel gama twi jouse sanga phajo hilou ham? hicheho-a khu kakisop lhah-a kathen moham? ati. Hitichun lunghang tah-in akiheijin achemang tai.

¹³Chuin asohten ahin naijun, ahenga thu aseijun, hepa, themgaopan thil lentah boldia nasoleh, hichu nabolda theiding ham? Aman gakisoplhan lang thengtan, ati kalvalla ipiba asei nahlai dingham? atiuve.

¹⁴Chuphatnin ama achesuh-in, Pathen mipa sei dungjuijin, Jordan'a chun sagivei akiphumin ahi. Chuin avouchu chapangsen vou bangin ahungkile kitnin, athengseltan ahi.

¹⁵Chuin ama le aloiho jouse Pathen mipa henga ahungkile kitnun, amasanga ading taove. Chuin aman, vetan, leiset pumpi-a hin Pathen aumpon, Israel gama bou aumme ti tun kahetai; hijeh chun tun kangeh nahi, nasoh phatthei bohnahi neisan peh-in, ati.

¹⁶Ahinla aman, a-anga kadinjing Pakai hingjing mina kasei ahi, keiman imacha laponge, ati. Ahin alahteina dingin aman angeh-in, ahinla ama anompoi.

¹⁷Chuin Naaman'in nahenga, chuti ahile, katao ahi, nasoh hi sangan nin apoh khopset leiset neipeh thei dingham? ajehchu nasoh hin tua pat Pakai henga tilouva, govam thilto le ganlhaina himhim pathen dangho henga kalha louhel ding ahitai.

¹⁸Hiche thila hin Pakaiyin nasohhi ngaidam maihen; kapupa Rimmon houin'a chibaiboh dinga alut tengle, aman kakhut chunga akingaijin, chule keimatah hi Rimmon houin'a kunjia kahi. Keima Rimmon houin sunga kakunji teng nasohhi Pakai chun hiche thilahin eingai damhen, ati.

¹⁹Chuin aman ajah-a lung mongin chetan, ati. Hitichun ama-a konin apotdoh-in achesaohih laije.

²⁰Ahinla Pathen mi Elisha sohpa Gehazi chun, ven kapun Syria mi Naaman thil hinkenho lahpeh louvin alhadoh jengtan; ahinla Pakai hinna pana kasei ahi, nungdel ingting ipiham khatbeh galahpeh inge, atin ahi.

²¹Hitichun Gehazi'n Naaman anungdeltai. Chuin Naaman'in anunga min ahindel amuphatnin, akimupidin kangtalai ja konin akumlhan, ijakai phapha-a hinam, anati.

²²Chuin aman, ijakai aphanai; kapun vetan tutah chun Ephraim mola konin themgao chapate mini ahung lhonin ahi. Kangeh nahi, dangka talent khat le kikhelna pon ni amani chu pen tia eihinsol ahi, ati.

²³Chuin Naaman'in, lunglhai selin talent ni kilah jengin, ati. Chule akilah dingin hangeh-in angeh-in, sakhao ni sunga dangka talent nile kikhelna ponsil ni dipsunga athunin, asohte mini apohsah-in; chule Gahazi masanga chun ache lhonin ahi.

²⁴Chuin insang alhun phatnun, amani khutna konin alan, insunga chun akoitai. Chuin amani chu alesolin, amani achedoh lhontai.

²⁵Ahinla ama alutnin, apu anga adingtai. Chuin Elisha'n ajah-a, Gehazi hoilama kona hung nahim? ati. Chuin aman nasoh hoimacha kachepoi, ati.

²⁶Chuin aman ajah-a aseijin, nakimupi dingpa akangtalaija kona ahung kiheikitna chu, kalungthim hi nangma toh kilhona hilou ham? sum, ponsil, Olive hon, lengpi hon, bongchal ho, soh pasal ho, chule soh numei ho lah phat ham?

²⁷Hijeh chun Naaman phahna chu nangma chungle nachih lhahte chunga a-itih-a chujingding ahitai, ati. Chuin amasanga kona apotdoh doh-in buhbang bangin aphahtan ahi.