Read Thado Chin 2 Lengte 6 Bible Online

2 Lengte 6 - Thado Chin bible

2 Lengte 6

¹Chuin themgaoho chapaten Elisha jah-a, vetemin, tuhin nangma toh ichen khomnao munhi eiho dingin aneo behsehtai.

²Kataovu ahi, Jordan lama cheohitin, mitinin thingtum khatcheh chua konchun laohitin, chumuna chun ichen nadiu mun kisemu hite, atiuve. Chuin aman, cheovin, ati.

³Chuin mikhatnin, katao ahi, nasohte neilhon piuvin, ati. Chuin aman, lhonpi naovinge, tin adonbutnin ahi.

⁴Hitichun amahotoh alhontai. Chuin Jordan alhun phatnun, thing aphuhtaove.

⁵Ahinla mikhatnin thingtum atana ahile heichang chu twija alhalut tai. Chuin ama apengjah-in, ohe, hepu! mi-a kapalah ahi, ati.

⁶Chuin Pathen mipan hoija lhamang ham? ati. Chuin amun chu ahilin ahi. Aman molkang khat asatnin, amuntah-a chu akholutnin ahile; heichang chu ahung kiletdoh tai.

⁷Hichun aman, kilah-in, ati, chuin aman akhut alhangin, akilahtai.

⁸Chuin Syria lengpan Israelte chunga gal abolin, asohte toh thumop anei khomun, hiche mun chuche munchu kagebuh hiding ahi, ati.

⁹Chuin Pathen mipan Israel lengpa henga mi asolin, chuche mun jotlounadin chingtheijin; ajehchu hilama chun Syria te ahungsuh uve agatisah-e.

¹⁰Chuin Israel lengpan Pathen mipa hilnale gihna mun'a chun mi asolin, hia konchun khatvei niveiseh hilouvin, akihuhhing jingin ahi.

¹¹Hijeh chun Syria lengpa chu hiche thil jeh hin alungkham lheh-in, asohte akouvin, ajah uva, ilah uva Israel lengpa lama pang koipen ihiu nei musah loudiu ham? ati.

¹²Chuin asohte lah-a khatnin, vo lengpa ka pakai, khatcha aumpoi: Israel gamsunga Elisha themgaopan najalkhun danna nathuseiho chu Israel lengpa ahilji ahibouve, ati.

¹³Chuin aman, keiman mi kasola kamat theinadin, chenlang hoija aum gavelhi temin, ati. Chuin ajah-a, vetan, Dothan'a aume, tin aseipeh-un ahi.

¹⁴Hijeh chun hilama chun sakol ho, kangtalai ho, chule mipi janle asolin; amaho jan-in ahungun, khopi chu a-um kimvel taove.

¹⁵Chuin Pathen mipa sohpa chu matah-a athodoh-a apotdohle, veuvin, mipi janelin khopi chu sakol ho le kangtalai toh anaum kimvelun ahi. Chuin sohpan ajah-a, ohe hepu! i-itiding hitam? ati.

¹⁶Chuin aman adonbutnin, kicha hih-in; ajehchu eini lama pangho chu amaho lama pangho sangin atamjouvin ahi, tin adonbutne.

¹⁷Chuin Elisha ataovin, Pakai, katao ahi, amuthei nadin amit hasah-in, ati. Chuin Pakaiyin gollhangpa mit ahasah-in ahile, aman amutan: chuin veuvin, Elisha kimvela molsang chu sakolle mei kangtalai ho adimsetnin ahi.

¹⁸Chuin amaho ahenga ahungsuh phatnun, Elisha Pakai henga ataovin, katao ahi, hiche mitehi amitnu chotsah-in, ati. Chuin Elisha thu dungjuijin amitnu achotsahtai.

¹⁹Chuin Elisha'n ajah uva, hichehi lampichu ahipon, chule khopi jongchu hichehi ahipoi; neijuijun, chutile naholpao henga chu kapuiding nahiuve, ati. Ahinla aman amaho Samaria lama apuitai.

²⁰Chuin ahitin ahi, amaho Samaria ahunglhun phatnun, Elisha'n, Pakai amutheina diuvin, hiteho mit hi hasahtan, ati. Chuin Pakaiyin amitnu ahasahtan ahile, kho amutaovin; chule veuvin, amaho Samaria lailunga um anahi taove.

²¹Chuin Israel lengpan amaho amu phatnin, Elisha henga, hepa amahohi katha dingham? katha dingham? ati.

²²Aman adonbutnin, nangman amahohi nasuhmang louding ahi; nangman soh changa namat ho chu nachemjam le nathalpi-a natha dingham? Amahon aneh uva adonuva, chule apupao henga ache theina diuvin, amasanguva an le twi luipeh-in, ati.

²³Chuin amaho nehding nasatah-in agonpeh-in; chule amahon aneh uva, adon jouvun, amaho chu asolmang tan, amaho a-pakaipa henga achetauve. Hitichun Syria miho chu Israel gamsunga ahungkit tapouve.

²⁴Chuin hiche jouhin ahitin ahi, Syria lengpa Benhadad'in janel honpi chu akhomin, akontouvin, Samaria aumkol tan ahi.

²⁵Chuin Samaria gama chun kel nasatah alhatan; chule veuvin, sangan lu khat dangka somgetna akijoh-a, vakhu eh hop li-a hop khat dangka nongsi nga-a akijoh kahsen, khopi chu aumchah jengun ahi.

²⁶Chuin Israel lengpa kulvuma ahung valea ahile, numei khatnin ama chu ahinsamin, ajah-a, neikithopin, ka pakai, vo lengpa, atin ahi.

²⁷Chuin aman, Pakaiyin nakithopi loule keiman hoija kona kakithopi dingham? Chang pholla konin em, ahiloule lengpi kichilna-a konin em? ati.

²⁸Chuin lengpan amanu jah-a, iti nahi ham? ati. Chuin amanun adonbutnin, hichenu hin kahenga, nachapa hintoh doh-in, tunin nehitin, chule jingle kei chapa nena hite, atin ahi.

²⁹ Hitichun kachapa kakihon lhonin, kane lhontai. Chuin ajing nikhon amanu henga, nachapa hintoh dohtan, neta hite, katin ahile; amanun achapa anaseltai.

³⁰Chuin ahitin ahi, lengpan numeinu thusei ajah phatnin, apon asat telin; chuin palvuma vahlen, mipi chun aveovin, chule veuvin, atichunga khaodip pon akisiltan ahi.

³¹Chuin aman, tunikho-a hi Shaphat chapa Elisha luchang achunga aum den poupouva ahile, Pathen'in chutobang chun eibol hen, chule akalvalin jong eibol hen, atin ahi.

³²Ahinla Elisha a-in'a atouvin, chule upahon atoupiuvin ahi. Chuin lengpan a-angsunga konin mikhat asolin; ahinla amapa chu ahunglhun masangin, aman upaho jah-a, hiche tolthatpa chapan kalu ladinga mi ahinsol hi nahet uvem? Veuvin, sottolpa ahungteng kot khah unlang, kotna lutsah hih helun: anunga khu apu kholhah gin hilouham? ati.

³³Chuin ama amahotoh akihou nalaijin, veuvin, thupo chu amaheng ahung lhungtai. Chuin aman, veuvin, hiche thilsehi Pakaiya kon ahin; Pakai chu ipi dinga kanga nahlai dingham? ati.