Read Thado Chin 2 Lengte 7 Bible Online

2 Lengte 7 - Thado Chin bible

2 Lengte 7

¹Chujouvin Elisha'n, Pakai thuhi ngaijun; Pakaiyin hitin aseije, jingle tuphat teng Samaria kotpi phunga changbong nelsel tena dan khat sekel khat, chule sakol chang tena dan ni sekel khatna kijoh ding ahi, ati.

²Chuin lengpa kingaina milen khatnin Pathen mipa chu adonbutnin, veuvin, Pakaiyin van'a bangkot ahonding hijongle, hichu hitheidi hinam? ati. Chuin aman, vetan hichehi namitna namu-a, neh vang naneh louding ahi, ati.

³Chuin kotpisung lutna-a chun miphah li aumin; amaho khatnin khat jah-a, hikomahi ibola ithi kahseuva itou diuham?

⁴Khosunga lutnu hite tileu henla, khosung kel alhan, chua chu ithi jeng dingu ahin; hilaija hin hiti tou jongleu hen, ithi thou thoudiu ahi. Hijeh chun tun hungtemun, Syria sepaiho lama kipelut jengu hite; eihing hoijule hingu hitin; eithaolela ithi maidingu hitante, akitiuve.

⁵Syria miteho gebuh-a chedingin khomut chipchep in akipatdoh taovin; chuin amaho Syria te gebuhpam nungpen ahung lhunule, veuvin, hichea chun koimacha anaum tapoi.

⁶Ajehchu Pakaiyin Syria mite janel chu kangtalai ho husagin, sakol ho hugin, janelho hugin chule janel tamtah ho hugin geijin ajahsah-in; chuin khatnin khat jah-a aseijun, veuvin, Israel lengpa hin Hit lengte, Egypt lengte hohi ichunguva galbol dinga apalah ahi, atiuve.

⁷Hijeh chun amaho akipatnun khomut chipchep in ajamun, apon inhou, asakolhou, asanganhou, chule agebuh-u chu atobang bangin ahinna diuvin adalhaovin, ajamtaovin ahi.

⁸Chuin hiche mi phahho chu gebuh manglhapen alhun phatnun, pon-in khatna agalutnun, aneuvin adonnun, chua konchun sana le dangka chule ponsil ho akilah uvin, acheuvin agaselun; chuin ahungkitnun gebuh chomdang khatna alut kitnun, chu-a kon jongchun alah kitnun, aselkitnun ahi.

⁹Chuin amaho khatnin khat jah-a aseijun, ithilbolu hi aphapoi; tuni hi kipana thupha lhunni ahin, eiho ithipbeh jengun ahi: jingkah khovah gei ingauva ahile, ichunguva thilse hunglhung thei ahi. Hijeh chun tun hungun, icheuva lengte insung igahil theina diuvin, akitiuve.

¹⁰Hitichun ahungun, khopi kotngahpa chu akouvun, ahenga, Syria miho gebuh-a kagacheuvin, chule vetan, chua chun mi koimacha aumpon, mi awjong akijapon, ahinla sakol ho, sanganho akihennin, pon inho chu abang bangin aume, atiuve.

¹¹Chuin aman kotngah ho chu akouvin, chuin amahon leng insunga miho chu ahilun ahi.

¹²Chuin lengpa chu ajanin athouvin, asohte henga, tun keiman Syria miten ichunguva ipi abolem navetsah uvinge, eiho igilkel uve tihi ahetnuva; hijeh-a chu agebuh uva kona chu gamlah-a kiseldinga potdoh uva, amaho khopi-a kona ahungdoh tengule ahingin man-u hitin, khopi sunga lutnu hite atiu ahi, ati.

¹³Chuin asohte lah-a khatnin adonbutnin, nahenga katao ahi, khopi sunga sakol umsun lah-a ngahi mi phabep gakaisah-in, (vetan, amahohi akidalha Israel mipi ho jouse tobang ahiuvin; vetan, amaho Israel mipi athigam saho tobang ahiuve:) hijeh chun amaho solu hitin, vetem uhite kati-e, ati.

¹⁴Hijeh chun amahon sakol kangtalai ni alauvin; chule lengpan Syria janelho nunga mi asolin, cheovinlang gaveovin, ati.

¹⁵Chuin amaho Jordan lama amaho nunglama acheule; veuvin, lampi jouse chun Syria miten akino nalam uva apaiju um le bel chule ponsil adimsetnin ahi. Chuin thupo ho akileuvin lengpa ahiltaove.

¹⁶Chuin mipi apotdoh-un, Syria mite ponbuh chu achom taove. Hitichun Pakai thu dungjuijin, changbong nel tena dim khat sekel khat manin akijoh-in, chule sakol chang tena ni chu sekel khat manin akijohtan ahi.

¹⁷Chuin lengpan kingaina milenpa chu kul kotpi ngah-in apansah-in ahi. Ahenga lengpa ahung kumsuh laija, Pathen mipan anasei bangin, amapa chu mipin kotphunga ana chotphaovin, athitai.

¹⁸Chuin Pathen mipan lengpa henga anasei, jingle tuphat vela Samaria kotbula sakol chang tena dimni sekel khat manna kijoh-a, chule changbong nel tena dimkhat sekel khat manna kijoh ding ahi, atia;

¹⁹Chule pipui pan, vetan, Pakaiyin van'a bangkot ahonding hijongle, hichu hitheidi hinam? tia ana donbutna; Elisha'n, ven, nangman hiche chu namitna namu ding, nehvang naneh louding ahi, tia anasei ahi.

²⁰Hitobang chun ama chunga achutai. Ajehchu mipin kotpiphunga achotphaovin, ama athitan ahi.