Read Thado Chin 2 Lengte 8 Bible Online

2 Lengte 8 - Thado Chin bible

2 Lengte 8

¹ Chuin Elisha'n achapa adamsah numei henga chun, kipatdoh-in, nangma le na-insung mite naumthei theina dinguvin, napem nathei chanun gapemun; ajehchu gamsunga Pakaiyin kumsagi jen kel alhahsah ding ahi, ati.

²Chuin Pathen mipan asei dungjuijin, numei chu akipat doh-in; a-insung mite toh acheuvin Philistine gama chun kumsagi agapemun ahi.

³Chuin kumsagi kichai chun ahitin ahi, numeinu chu Philistine'a konin ahungkile kitnin, lengpa henga a-inle alou ngeh dingin agachen ahi.

⁴Chule lengpan Pathen mipa soh Gehazi ana kihoulim pin, katao ahi, Elisha thilbol loupiho jouse chu neihilin, atin ahi.

⁵Chuin ahitin ahi, mithisa khat ahinsahkit asei laitah chun, veuvin, achapa kihinsahkit numeinu chu lengpa henga a-in le lou ngehnan ahung taovin ahi. Chuin Gehazi'n, ka pakai, vo lengpa, hichehi Elisha'n ahinsah numeinu le achapa chu ahi, ati.

⁶Chuin lengpan numeinu chu adongin ahile, amanun aseipehtan ahi. Hitichun lengpan vaipo khat angansen, hiche numeinu-a jouse chu lepeh kitnin, chule gamsung adalhah nikho-a pat tuchan geija loujaova agaho jouse lepeh kit tan, ati.

⁷Chuin Elisha Damascus'ah ahungin; chule Syria lengpa Benhadad chu anadampon; ahenga, Pathen mipa chu hilama ahunge, ti aseipeh-un ahi.

⁸Chuin lengpan Hazael jah-a, thilpeh kenginlang Pathen mipa gakimupin, chule hiche kanatna-a kona hi kadamdoh kitding hinam? Pakai chu gadohsah temin, ati.

⁹Hitichun ama kimupi din Hazael achen, thilpehdin Damascus'a konin thilpha tincheng sangongsao somli jen poh thil akengin, ahungin ama masanga adingin, nachapa Benhadad Syria lengpan nahenga eihinsolin, hiche natna-a kona hi kadamdoh kitding ham? atin ahi, ati.

¹⁰Chuin Elisha'n ajah-a, thonlouva nadamdoh kitding ahi gatipeh-in: ahinla thitei teiding ahi ti Pakaiyin eimusahtai, ati.

¹¹Chuin jachat umkhop leuvin amapa chu aven: chuin Pathen mipa chu akaptai.

¹²Chuin Hazael'in, kapu chu ibola kapjeng nahim? ati. Aman, Israel chate chunga thilse naboldingchu kahetjeh ahi; akuldetho halhan natin, agollhangho chemjamin thatnin natin, achateu chule anu oipi sunga umho jongchu nakhejalpeh ding ahi, tin adonbutne.

¹³ Chuin Hazael'in, nasoh keima hi uicha kahija, hitobang thil loupi chu katohthei ding hijaham? ati. Chuin Elisha'n, nangma Syria mite chunga leng nahiding Pakaiyin eimusah ahitai, ati.

¹⁴Hitichun ama Elisha'a konin apotnin, apu henga ahungtai. Aman ajah-a, Elisha'n nahenga ipi aseijem? ati. Chuin aman na damdoh teiding ahi, ti eiseipeh-e, tin adonbutnin ahi.

¹⁵Chuin ajingin ahitin ahi, ponsatah khat alan twija adekotnin, amai akhunan ahile, hitichun athitan ahi. Chuin Hazael alengchang tai.

¹⁶Chuin Israel leng Ahab chapa Jehoram lengchan kal kum ngana-in, Jehoshaphat chu Judah leng hija ahin, Judah lengpa Jehoshaphat chapa Jehoram chu ahung lengchang panin ahi.

¹⁷Ama alengchan patchun kum somthumle kum ni ahin, Jerusalem'a kumget aleng changin ahi.

¹⁸Chule aman Ahab insung chonna bangin, Israel lengte lamlhah ajotnin ahi: ajehchu a-inneipi chu Ahab chanu hija ahin; Pakai mitmun thilse abolin ahi.

¹⁹ Hijongle ama le achate henga meivah pehjing dinga ana thutep bangin, asoh David khohsahna jalchun Judah chu asumangpon ahi.

²⁰ Ama nikho laijin Edom chu Judah khutnoija konin akiphinun, achunguva lengkhat akisem taove.

²¹Hijeh chun Joram kangtalai jousetoh Zair'a achetouvin ahi. Chuin ama jan-in athou doh-in, ama umkimvel Edom miho le gal lamkai kangtalai ho athatgamin; mipi ho chu aponbuh sunguva ajamlut gamtaove.

²²Ahinla Edom Judah khutnoija konin tuni geijin akiphinun ahi. Chuin hiche phat mama chun Libna jong akiphinin ahi.

²³Chule Joram thilbol dangho jousele atoh jouse chu Judah lengte thusimbua kisun hilouham?

²⁴Chuin Joram apu apate toh alumkhomin, David khopi-a apu apate toh akivuitai. Chuin ama khelin achapa Ahaziah alengchang tai.

²⁵Israel leng Ahab chapa Joram lengchan kal kum somle kumni na-in, Judah leng Jehoram chapa Ahaziah alengchang panne.

²⁶Alengchan pat kumchun Ahaziah kum somni le kumni ahitai. Chuin ama Jerusalem'a kumkhat aleng changin ahi, chule anu minchu Athaliah ahin, Israel lengpa Omri chanu ahi.

²⁷Chuin aman Ahab insung lamlhah ajotnin, Pakai mitmun Ahab insung bol bangin thilse abolin ahi. Ajehchu ama Ahab insung tupa hija ahi.

²⁸Chuin ama Ramoth-gilead'ah Syria lengpa Hazael kisatpi dingin Ahab chapa Joram toh achen; chuin Syria miten Joram amavo taove.

²⁹Chuin Joram lengpa chu Syria lengpa Hazael to akisat petnuva Ramah mun'a akimavona kijen dinga Jezreel lama akinungle tan ahi. Chuin Judah lengpa Jehoram chapa Ahaziah chu, Jezreel'a um Ahab chapa Joram anat jeh-a vedin achesuh-in ahi.