Read Thado Chin 2 Lengte 9 Bible Online

2 Lengte 9 - Thado Chin bible

2 Lengte 9

¹Chuin Elisha themgaovin themgao chate khat akouvin, ajah-a, natai kigah-in, chule nakhutnin hiche thaobom hi choijin lang Ramoth-gilead'a gache-in:

²Chukoma nagalhun teng, Nimshi chapa Jehoshaphat chapa Jehu chu holdoh inlang lutnin; chule asopite lah-a konin kipatdohsah inlang, indan sungnung khatna puilutnin:

³Chule thaobom chu lanlang aluchunga sungin, chule ajah-a, Pakaiyin Israelte chunga lengdinga thao kanu nahitai, atie, tin seijin. Chuteng kot honginlang jamin, chule khongai hih-in, ati.

⁴Hitichun themgao gollhangpa chu Ramoth-gilead'a achetai.

⁵Chuin ahung lhunle, veuvin, janel gal lamkaiho chu ana toukhomun ahi; chuin aman, gal lamkaipa, nahenga thukhoh seiding kaneije, ati. Chuin Jehu'n koipen henga am? ati. Chuin aman, vo gallamkai, nangma henga, ati.

⁶ Chuin ama akipatdoh-in, insunga alut tai; chuin aman aluchanga thaochu asungin, ajah-a, Israel Pakai Pathen'in hitin aseije, Pakai mipite Israelte chunga lengdinga thao kanu nahitai.

⁷Kasohte themgaoho thisanle Pakai sohte jouse thisan phuchu Jezebel khutna kalah theina dinga, Ahab insung mite chu natha gamhel ding ahi.

⁸Ajehchu Ahab insung pumpi mangthah ding; Israel gamsunga Ahab'a kona cha pasal tapou chu, ongthol hihen akihen hijongle kasuhmang ding ahi.

⁹Chule Ahab insung chu Nebat chapa Jeroboam insung bangle, Ahijah chapa Baasha insung banga kasem ding ahi.

¹⁰ Uicha hon Jezebel chu Jezreel kulpanga anehdiu, amanu vuiding koimacha umlou ding ahi, ati. Chuin kot ahongin ajamtai.

¹¹Hitichun Jehu chu apu sohte henga ahungdohtan; chuin mikhatnin ajah-a, ijakai phasohnam? ibola mi ngolpahi nahenga hunga ham? ati. Chuin aman ajah uvah, nahetsao mi hija, athusei jong nahetnu chula-em, ati.

¹²Chuin amahon, kahe pouve; tun neihilun atiuve. Chuin aman ahenguva, hiti hitihin kahenga thu aseijin, Pakaiyin hitin aseije, Israelte chunga lengdinga thao kanu nahi, atie, ati.

¹³Chuin amaho amitakipmin aponu asutlhaloi chelun, kalbiho chungnung pena ama noija chun aphaovin; sumkon amutnun, Jehu alengchang tai, atiuve.

¹⁴Hitichun Nimshi chapa Jehoshaphat chapa Jehu chun Joram dounan aguh-a thil agong pantan ahi. (Tun Joram, amale Israelte jousen, Syria lengpa Hazael jeh-a Ramoth-gilead chu ana ngatupmu ahi.

¹⁵Joram lengpa vangchu Syria leng Hazael toh akisat laija Syria leng miten amavo chu Jezreel kho-a kisudam dinga kilekit ahitai.) Chuin Jehu'n, pha nasah ule koimacha Jezreel langa hiche thusei dingin potdohsah hih-un, ahiloule jam dohsah hihhelun, ati.

¹⁶Hitichun Jehu chu kangtalai ja atouvin, Jezreel lama chun achetan ahi; ajehchu chukoma Joram uma ahin, chule Judah lengpa Ahaziah chu Joram vedinga hungsuh-a ahi.

¹⁷Chuin Jezreel insung chunga chun khongah khat adingin, amachun Jehu loiho hungchu amulhin, mihon khat kamui, ati. Chuin Joram'in, amaho kimupi din sakol toumi solinlang, chamna thu hinam? gatisah-in, ati.

¹⁸Hitichun mikhat akimupidin sakol chunga atouvin achen, lengpan chamna thu hinam? atie agati. Chuin Jehu'n chamna iding natiham? kanunglama chen, ati. Chuin khongahpa chun aseijin, thupolepa chu ahenguva achen, ahinla ahungkile tapoi, ati.

¹⁹Chuin aman aniveinan michom dang khat sakol chunga asolkitnin, ahenguva ahunglhunin, lengpan chamna thu hinam? atie ati. Chuin Jehu'n adonbutnin, chamna iding natiham, kanung lama chen, ati.

²⁰Chuin khongah pan, ama jong ahengu agalhungin, ahinla ahung kinungle kit tapoi: chule asakol tildan jong Nimshi chapa Jehu sakol tildan abange; ajehchu hamvevun atil jenge, ati.

²¹Chuin Joram'in kigon, ati. Chuin akangtalai agotpeh taove. Chuin Israel leng Joram le Juda leng Ahaziah akangtalai gela atoulhonin, Jehu kimupi din akondoh lhonin, chule Jezreel mi Naboth honsunga akimuto pi lhontan ahi.

²²Chuin ahitin ahi, Joram'in Jehu amu phatnin chamna thu hinam, Jehu? ati. Chuin aman adonbutnin, nanu Jezebel jonthanhoina le doithu hijatpi hi aumlai se-a ipi chamna umthei dingham? atin ahi.

²³Chuin Joram'in akhut aleheijin, ajam'in, chule Ahaziah jah-a, vo Ahaziah kiduha bolna aume, ati.

²⁴Chuin Jehu'n athanei chasunin thalpi chu aloijin, Joram dahteni kikahtah-a akapma ahile, athalmuh jumin aluchang adotpaijin, akangtalai chunga a-op dentai.

²⁵Chujouvin Jehu'n agal lamkaipa Bidkar jah-a, along chu lanlang, Jezreel mi Naboth loulai mun'a seplhatan; ajehchu hiche hi geldoh-in, nangle kei apa Ahab nunga itoukhom laija, Pakaiyin hiche pohgih hi achunga anangap ahitai;

²⁶ Pakaiyin, tahbeh-in janhin Naboth thisanle achapate thisan kamu mong mongin; chule hiche mun mama-a hi kalethuh ding nahi, tin Pakaiyin aseije. Hijeh chun tun Pakai thu dungjuijin ama chu lanlang, hiche leiset munahin seplhan, ati.

²⁷Ahin Judah lengpa Ahaziah chun hichu amuphatnin, hon inlampi lama ajamtan ahi. Chuin Jehu'n anung ajuijin, kangtalai ja chun amajong thatnun, ati. Chuin Ibleam khokenga Gur jot touna-a chun hitichun abol taovin ahi. Chuin ama Megiddo lama ajamin, hia chun athitai.

²⁸Chuin asohten Jerusalem lama kangtalai khatna apouvin, David khopi-a apu apate toh lhana avuitaove.

²⁹Chuin Ahab chapa Joram lengchan kal kum kumsomle kumkhat na-a chu Ahaziah chu Judah te chunga ana lengchang pan ahi.

³⁰Chuin Jezreel'a Jehu ahung phatnin, hichu Jezebel'in ajatan; amanun amai ajemin, asam akipo jolin, bangkotna konin ahinven ahi.

³¹Chuin Jehu kotpi-a alut tolhonin, amanun, apu thatpa Zimri'in chamna anei hinam? atin ahi.

³²Chuin Jehu bangkotlam ngan adahdoh-in, koiham keima lama pang? koiham? atin ahi. Chuin nukiso ni ham thum hamin ahin veuvin ahi.

³³Chuin aman, amanu chu hinson lhaovin, ati. Chuin mahon ahin sonlhaovin ahile, athisan phabeppi bang le sakol ho chunga akithe thangin ahi. Chuin aman akengton anachilin ahi.

³⁴Chuin ama alut phatnin, anen adon tan ahi. Chuin aman, cheovin, hiche sapset changnuhi gaveovin lang gavuijuvin; ajehchu amanuhi leng chanu khat ahi, ati.

³⁵Chuin amaho avui dingin ache taove; ahinla amahon alugu le akeng chule akhut phangho tailou adang amu tapouve.

³⁶ Hitichun amaho ahung kile kitnun, hichu ahung hetsah taove. Chuin aman, hichehi Pakaiyin asoh Tishbi mi Elijah'a kona anasei, Jezreel khomuna Jezebel phe uichaten anehdiu;

³⁷Chule koimachan, hilaija hin Jezebel akivuije atilouna dinguva, alongchu Jezreel gam loujaova eh tobang hiding ahi, tia anasei guilhuna ahi, ati.